อาเยเรมี 20
20
ลอง อาเยเรมี คัม ปี คาหนาบ อาบาซูรา
1ปัน อัน ตี ดา อี หลู ดี เฌาพรา อี จืร อาบาซูรา อี มูห ฆอน อาอีเมรา อัน บอ มูห ดา อี หลู ดี เฌาพรา บอ อึบ แคง โฮว เฌาพรา. อัน บอ ยึร ลอง อาเยเรมี แฮะ บยาน โฆรห เฌาพรา ปาย ตี. 2อัน บอ จัร เฆ มัห ดา อี บยาน โฆรห เฌาพรา อี จืร อาเยเรมี ตี. อัน บอ แตห เฆ ชึบ ทาง ดี เปลา อาเยเรมี บอ คร็อง อัน ดี มาโลห อี จืร อาเบนยาม, อี กอย คร็อง แดง โคบ โฮว เฌาพรา. 3ปา แคหณา อาบาซูรา บอ วี ดึห เลห ทาง ดี เปลา อาเยเรมี ตึอน. อาเยเรมี วี ต็อห ดี อัน, “เฌาพรา อาว ฮู แดะ แม จืร อาบาซูรา. อัน ดี วี แดะ แม ต็อห อามากอมีซาพีบ. ลอง ดาง อัน บอ เลห อี หมึอม โยว ดอน นา ดอน โปละ. 4โคว, เฌาพรา แฮะ ฮอต กาลาง, ‘โอว ดี แตห แม แบน อี หมึอม โยว ดี โดว บรีม แม บอ ดี ฆึก แม เฆ บอกาเฆลียด. เฆ ดี วี ลึร ชึม บอ ยัม ดี มาปัวะ ลาง รันซู เฆ. แม ดี บอ ยึร ดี งาย แม. โอว ดี ดึห มืง ยูดา, วี อาบ แตห คูนดีคัม มืง บาแบ วี อึบ. อัน ดี บอ เหมต ฮาว เฆ ดี มืง บาแบ บอ ง็อห ยัม เฆ อี ซี ฆีด ซี กอย ตา มาปัวะ ลาง อัน. 5โอว ดี ดึห แคะ กอย ครัม เฆ ดูอี แคง มืง นี บอ โกรวกราม แปะ แฮะ เหรต ตัห เฆ บอ คาฆูน ปี แฆบ อูน เฆ บอ โกรวกราม คูนดีคัม ยูดา ดอน โมยว, วี อาบ ดัว ดี รันซู เฆ. รันซู เฆ ดี บอ พาด ดึห ฌึร ตี ดอน โมยว, วี ฮาว อูน แคง มืง บาแบ. 6บอ แม บอ เฆ ดูอี แคง อึณโฮม แม, เบ บอกาเฆลียด ดี บอ คัม อี เหมต ฮาว เบ, แตห เบ กอ ฌัม แคง มืง บาแบ. บอ แม บอ เฆ ฆึก แม แปะ แฮะ กาลาง แม โฆรห ตู หมาน ดี เฆ, เบ ดี บอ ยัม โตต แคง มืง ตี. เฆ อี เฮา บอ ดีบ เบ แคง มืง ตี.’”
ลอง อาเยเรมี หงูน ดี เฌาพรา
7อึย แม เฌาพรา, โอว มืร แฮะ คัม แม เฌา ปีหล็อก ดี โอว. แม เฌา ยี มึห โปลม เฆ แฮณ หลึอม โอว, แตห แม ปึอน ดี อึบ โอว. โอว แฮะ กาดูห ดี คัม แบน ปี กาณัห อี เฮา บอ ปี แนนัะ อี เฮา บอ ดอง วัน.
8ดอ กาลาง โอว โฆรห ดี อี, โอว โลว ดัด ตาง, แตห เฆ นับ ลอง อาเพ อาเร บอ ลอง อี ดี กาปยาต ลึร โตต ดอน โมยว. ปาย ตี โกบ กาลาง โอว โฆรห เฌาพรา, โอว แฮะ แบน ปี ณ็อะ ปี บลัต อี เฮา ดอน ซีแง.
9เซ โอว ยี ต็อห, “โอว อาว ฮู กาลาง ลอง เฌาพรา, โอว อาว ฮู บยาน โฆรห อัน เฌา,” โฆรห เฌาพรา อี กอย แคง น็อห โอว ปี เงา. อึณ ปี เงา แฮะ กอย แคง กาอาง โอว, อาว ปึอน เลห. โอว มืร แฮะ นูน กาเซา ดี ยืน, แกวะ แตห โฆรห เฌาพรา เลห. มาแล, โอว ยี ตู แป ดี คัม ปาย ตี ปอ อึณปัว.
10โอว แฮะ ยึร โฆรห เฆ อี ลาย พูพาบ, อี ซี พยาก โอว. เฆ แฮะ กืน กาเซา ต็อห, “อัน นับ มี ดี กาลาง ลอง อี หมึอม โยว อี หมึอม กาฮีว. อัน ตู นับ ปอ โมยว. แตห เอ พยาก อัน, แตห เฆ ดา ตาง ดัม หมาบ ดี อัน.” แคะ กอย เฆ ฆึก กาล็อะ โอว บอกาเฆลียด, เฆ บอ บัร ดี ยอด ปัน ดี เกห ดี ชึม โอว. เฆ บอ ต็อห, “อาว เหลณ อึณ ดี ลึห ซีคยา ลอง แปะ แฮะ กาโลว อัน. ดอ อัน ตี, เอ ดี แป อัน บอ ปึอน ดี โบง เวียะ ดี อัน, แตห อึณ กอ เบระ ดี น็อห เอ.”
11ปี บอ แฮะ ปาย ตี มืร, เฌาพรา ยี กอย รึม โดบ โอว. อัน บอ ปี ดา ซึก อี มึห โปลม ตาง อี หมึอม โยว กาเซา. ปาย ตี เฆ อี คาหนาบ โอว มืร เฆ ตู แป โอว. โคว, ปี คราม เฆ ดี โบง อาว อัห, อาว ฮู มึห ดีโคว มาเซ. เฆ ดี บอ วี ซาย อี เซเซ, อาว ปีว ดอ เหมา.
12อึย แม เฌาพรา อี อึบ โตต ดอน โมยว, แม มูห อัน เฌา อี แฌด ดี ยอด น็อห ดูอี. แม เฌา มืร นับ ปี ปาย แคง น็อห แคง พึอม เฆ. โอว หมาณ, แตห โอว ยึร ปัน ดี โบง เวียะ แม เฌา ดี เฆ รันซู โอว แคะ แปะ แฮะ โบง เฆ ดี โอว. โคว, โอว มืร แฮะ ฮอต อาบ แตห แม เฌา ซูงพยาด อามู โอว.
13แตห เอ ต็อห โหมว ดี เฌาพรา. แตห เอ ต็อห โหมว อี อืบ เฌาพรา. โคว, อัน เฌา แฮะ คยอด เฆ อี แฮะ ฌูด ลูด, แตห เฆ ลอด ดี ดูอี ฮาย ดูอี มืก.
14โอว ดืง แตห ซีแง ฆึอด โอว วี แบน อี ตู หมึอม. ซีแง ฆึอด ตัห โอว ดี มา โอว ตี, แกวะ แตห อึณ แบน ซีแง โคย ดาคึย.
15โอว แฮะ ดืง ดูอี อี กาลาง ดี ฆูณ โอว ต็อห, “แม แฮะ มึห ฆอน อีมาย.” แปะ แฮะ กาลาง อัน, แฮะ แตห ฆูณ โอว โคย กาเซา.
16ดูอี วี ตี แตห อัน ปี มืง แบน มืง แบน มืง ปี ปยาต เฌาพรา. เจว หณา แตห อึณ มึห มี โฆรห อี ยาม เฆ อี ดัด. ดอ กาแต ซีแง, แตห อึณ มึห มี ปี ดัด เรียง เฆ รันซู.
17โคว, อัน เฌา ปี ตู แตห โอว ยัม ซีณ อาต ฆึอด เลห โอว แคง วัต มา โอว. อัน ปี ตู แตห วัต มา โอว วี แบน บาเรว โอว, ปี ตู แตห วัต มา โอว ตี ฆึห เซเซ.
18เหมา อึณ ปาย ปี ฆึอด ตัห โอว, แตห โอว ยึร มี อี ดูก อี หณาบ บอ อี แหม ดี น็อห? เหมา อึณ ปาย ปี แตห เฌาพรา โอว โลว ซาย อี, แตห อึณ กอ ฌัม โตต อาซาก โอว?
Currently Selected:
อาเยเรมี 20: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
