อาเยเรมี 19
19
ลอง กาเปา กาดาย กาลาต
1เฌาพรา ปี วี กาลาง ต็อห, “แตห แม ฮาว จึห กาเปา กาดาย ดี ดา อี โบง กาโละ กาดาย.” แฮะ ฮอต, แม บอ วี แดะ เฆ อี มูห ดา ตาง แคง มืง บอ ดา ตาง อี อึบ เฆ ดูอี บอ เฆ ดูอี อี หลู ดี เฌาพรา. 2แตห เบ วี ฮาว โดง กอย ดีลัยะ เบนฮีนูม อี กอย กาตัด มาโลห อี จืร โดณ กาโละ กาลาต. แตห แม บอ กาลาง โฆรห แปะ แฮะ กาลาง อูน โอว ดี แม. 3แตห แม ต็อห, “อึย เบ คูนดีคัม แคง มืง ยูดา บอ เบ ดูอี แคง มืง เยรูซาแลม, แตห เบ โทม โฆรห เฌาพรา อี มูห เฌาพรา อี อึบ โตต ดอน โมยว. อัน เฌา บอ มูห เฌาพรา ปี กรึบ เฆ ดูอี อีซาเรลัะ. อัน แฮะ ต็อห, ‘โอว ดี แตห อาเพ อาเร ตัห ดี นี, แตห โหยะ เฆ ดูอี อี โทม ลอง อัน กอ กาอาว ดอน อี.’ 4โคว, เฆ แฮะ แวน โอว บอ วี โบง แตห โดง ตี กาดาต กาเซา. เฆ แฮะ วี โดะ หลู ซีนัม อูห หงูน ดี เฌา ปี กรึบ อี เฮา อี มูห เฌา ปี ตู ดึอม นับ เฆ บอ ปี ตู ดึอม นับ ฆูณ ดัง เฆ บอ คูนดีคัม เฆ. เฆ มืร แฮะ แตห หนาม เฆ ดูอี อี มึห น็อห ซืร น็อห หมาน แหล ดอน นา ดอน โปละ. 5เฆ แฮะ วี โบง โดง จา อาดา เฌา บาลัะ, แตห เฆ ปึอน ดี โดะ หลู ฆอน เฆ แคง เงา ดี เฌา บาลัะ ตี. ลอง อัน ตี อึณ บอ มูห ปี ตู จัร โอว เฆ โบง, ปี ตู มึห โอว ดี กาลาง. โอว มืร ตู ดึอม เฌณฌา ลอง อัน ตี ดอ เหมา. 6โกบ อึณ ปาย ตี เฌาพรา วี ต็อห, อึณ ดี บอ ฌัม อาคราว ดอ ตู แดะ เฆ จืร โดง ตี ต็อห ตอเพด บอ ดีลัยะ เบนฮีนูม. เฆ ดี บอ วี แดะ โดง ตี ต็อห ดีลัยะ โดง ง็อห ยัม เฆ ดูอี กืน.”
7โดง ตี โอว ยี ดี ปยาต แวน โตต ดอน โมยว ปี คราม ดูอี อายูดา บอ ดูอี เยรูซาแลม ดี โบง. เฆ ดี วี ยัม ดี มาปัวะ ลาง รันซู เฆ อี เหรต ดี ง็อห เฆ. โดว ยัม เฆ ตี, โอว ดี แตห เฆ วี แบน ปี ดี โฮม มาซีม อี กอย แคง เบลณ บอ ปี ดี โฮม มาโดว แปร. 8โอว ดี โบง แตห มืง ตี กาปยาต ลึร, โบง แตห เฆ ดูอี แคง มืง ตี กอ วี กาจัว, วี กาปึณ กาเซา. อี เฮา อี ดี กาโลห โดง ตี, เฆ ดี บอ มึห มี โฆรห พยาก ดีโลย. เฆ ดี บอ วี อาม กาเซา โกบ แฮะ คัม ดูอี แคง มืง ตี อาเพ อาเร ตาง. 9โอว ดี โบง แตห เฆ วี กาดูห ดี โฮม ยัง ฆอน อีบึณ ฆอน อีมาย เฆ. รันซู เฆ ดี แวง โรบ มืง ตี กอ เหลณ กาเซา, แตห เฆ กอ กาดูห ดี วี ลาย โฮม ยัง เฆ อู ฆึก. อึณ ดี บอ ดูก กาเซา ดี น็อห เฆ.’
10แฮะ ฮอต, แตห แม วี มัห กาลาต กาเปา อึม ปี โฆ็ง แม, แตห บอ เฆ ดูอี อี ฮาว รึม โดบ แม ยึร. 11แตห แม กาลาง ดี เฆ ต็อห, “เฌาพรา อี อึบ โตต ดอน โมยว แฮะ ต็อห, ‘โอว ดี บอ แตห มืง นี บอ ดูอี อี กอย แคง มืง นี ลึร ชึม ปี กาเปา กาดาย อี แฮะ กาลาต, แกวะ แตห อึณ ซี ปึอน วี อึณปราย. เฆ ดี บอ วี ดีบ โดว ยัม ดูอี ตี ดี โดง จืร ตอเพด, แกวะ แตห กาดาย โดง ตี ซี โฆรว อาดา ดี โลว ดีบ ดูอี ยัม เฆ ตี.’ 12เฌาพรา ปี วี กาลาง, ‘โอว ดี โบง แคง มืง นี บอ ดี ดูอี แคง มืง นี แตห อึณ กอ ปี ปี โบง โอว ดี โดง จืร ตอเพด ตี. 13กาง เฆ ดูอี แคง มืง เยรูซาแลม บอ โฮว เฆ คูนดีคัม อี อึบ กาดาย มืง ยูดา ดี วี กาดาต บอกาเฆลียด, แตห อึณ ปี อี แฮะ กาดาต ดี โดง จืร ตอเพด ตึอน. อึณ บอ มูห ดอน กาง แปะ แฮะ โดะ หลู เฆ ซีนัม อูห หงูน นา แดง บอ กรึบ ซีมัณ บอ หลู แบน โมยว แบน โมยว ดี เฌา ปี กรึบ ดูอี เฮา.’”
14วาย อัน ตี อาเยเรมี บอ วี เลห ดี โดง จืร ตอเพด อี มูห โดง แฮะ ดึอม จัร เฌาพรา อัน ฮาว กาลาง โฆรห เฌาพรา ดี เฆ. อัน บอ วี ตัห กอย แคง แวง โฮว เฌาพรา, วี กาลาง ดี เฆ ดูอี กืน. 15อัน ต็อห, “เฌาพรา อี อึบ โตต ดอน โมยว อี มูห เฌาพรา ปี กรึบ เฆ ดูอี อีซาเรลัะ, อัน ต็อห, ‘โอว ดี แตห เฆ ดูอี แคง มืง นี บอ แคง เรา เฆ คัม ดูก ตาง แปะ แฮะ ฮอต โอว กาลาง อูน. โคว, เฆ แฮะ วี ปีโปลม ฆีณ เฆ, ตู วี โทม โฆรห ปี กาลาง โอว.’”
Currently Selected:
อาเยเรมี 19: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
