อาเยเรมี 10
10
ลอง กรึบ อารึบ ราง บอ กรึบ เฌาพรา อาคาคัร
1อึย เบ ดูอี อีซาเรลัะ, แตห เบ โทม โฆรห ปี วี กาลาง เฌาพรา ดี เบ.
2เฌาพรา แฮะ ต็อห, “แกวะ แตห เบ ณึง โดบ ปี ปาย ดูอี อาโมยว เฮา. แกวะ แตห เบ โยว บอ กาจัว อาโมยว อี กอย แคง ฆางหราว อี มูห ปี โยว ปี กาปึณ เฆ ดูอี อาโมยว เฮา.
3ฮีด ปี โดบ เฆ ดูอี อาโมยว เฮา อาว มึห ดีโคว. โกบ อึณ ปาย ตี เฆ นับ ดี ฮาว แดบ ตัห เฮ อู กาดัง แคง แปร. แฮะ ฮอต, เฆ ดา ลักซามา บอ วี ดึห ครึง ตา เฆ โบง อารึบ ราง.
4เฆ บอ ปีด รึอน เฆ ครีว, วี อึณปราย แตห อึณ ชีด. เฆ บอ ดึห มาฮีน วี ดอก, แกวะ แตห อึณ นับ ดี รัร, นับ ดี บลืง.
5อารึบ ปี โบง เฆ ตี, อึณ บอ ปี ราง กาโบยว ปี ฮอย อูน อี แคง มาน ดีเฆีย, แตห อึณ กาโบยว มากาอัะ เฆ มาซีม. โฆรห มืร, เฆ ตู นับ ดี กาลาง. ฮาว นา เหมา มืร, เฆ ตู นับ ดี ฮาว. ดูอี บอ โลว กาฆอด, โลว กาโย็ง โกบ ตู นับ เฆ ดี ฮาว. แกวะ แตห เบ โยว อารึบ ฌึร ตี. เฆ ตู ปึอน โบง นา ฮาย ดี เบ. นา หมึอม มืร, เฆ ตู นับ ดี โบง.”
6อึย เฌาพรา, อาว มึห อาเซ อี ปี แม เฌา. แม เฌา แฮะ บอด มยาด กาเซา. ปวน แม เฌา มืร แฮะ ตาง กาเซา บอ มึห อาพูง ดังโคว.
7แม เฌา มูห คูนดีคัม อี อึบ ดูอี ดอน ฌึร ดอน ครึร. เฆ บอกาเฆลียด โลว โรวเซ รีมาด แม เฌา. โคว, แม เฌา แฮะ กาอาบ โรวเซ แคง มาน มืง บอกาเฆลียด. แคะ กอย ดูอี ดอน โมยว อี มึห อางยาน, อาว มึห คอ อู วี อี ปี แม เฌา.
8น็อห เฆ ดูอี ตี แฮะ กาดัน ลัน, ตู นับ มาเซ. โคว, เฆ แฮะ คัม ปี มาโนว อารึบ ราง อี ตู มึห ดีโคว มาเซ.
9ดีแคลบ รึอน ปี มัห เฆ, เฆ แฮะ ดึห ตัห แคง มืง ทาซีด. ครีว เฆ บอ ดึห ตัห แคง มืง อูพาด. อาฌัะ ตี, อึณ บอ มูห โตต ปี โบง เฆ อี แหลว ดี โบง. อึณ บอ มูห ปี โบง เฆ ดา อี โหมว ดี จึม. ครึง ปี ชึบ เฆ ดี อารึบ ราง ตี บอ มูห บีก อี เรณ แฆ. อึณ มูห ปี โบง เฆ อี กยัะ ดี ด็อะ, กยัะ ดี จีณ.
10มาแล, อี มูห เฌาพรา, อัน มูห เฌาพรา อาคาคัร, เฌาพรา อี อีม. อัน มูห บอ คูนดีคัม อี กอย เซเซ. เซ อัน เฌา ฮี รู, กาดาย ดี ดียูห ดีเยณ. ดูอี ดอน ฌึร ดอน ครึร อาว มึห อี ปึอน คัม น็อห รู อัน เฌา.
11เฌาพรา ปี วี ต็อห, “โฆรห ปี โลว แม ฮาว กาลาง ดี เฆ ตี, อึณ บอ ปาย นี. ‘เฌา อารึบ อี ตู มึห ดี พาน เบลห ฆางหราว บอ กาดาย, เฆ ดี บอ ลึร หราย โตต แดง กาดาย บอ ครึม เบลณ.’”
12เฌาพรา แฮะ ตา ปวน อัน, พาน เบลห กาดาย. อัน เฌา บอ จัร อางยาน อัน แตห อึณ มึห ฆางหราว. อัน เฌา บอ จัร อี กาหลูห ดี น็อห อัน, โบง แตห เบลณ อึณบลัห.
13ดอ โบง อัน เฌา แตห อึณ มึห ฮัม กานัม, อึม ฆลาย นา แดง แคง ฆางหราว บอ ฮัม ดีงึณ ซีนัน ซีนืง. อัน เฌา บอ แตห อึณอูะ ตัห โดง ซืด กาดาย. อัน บอ โบง ปลัะ อึณเปลต, แตห อึณ ตัห โดบ ฆลาย. บอ คูน อัน เฌา บอ ดึห เลห แคง โดง อูน อัน.
14ดูอี ดอน อี แฮะ กาดัน ลัน, อาว มึห อี กาหลูห ดี น็อห เฆ. เฆ ดา อี นับ ดี จึม ครีว, เฆ ดี วี ซาย อี โกบ อารึบ ราง ปี จึม เฆ. อารึบ ราง ตี ยี ตู มูห อี มูห อี หมาน. เฆ ตู นับ ดี ฮึห ลึบ ฮึห เลห พึอม เฆ.
15เฆ ตู มึห ดีโคว มาเซ. อึณ บอ มูห ปี ลูกตาย อี เฮา. เซ ฮี ฌัม ปัน ดี ดัม อัน เฌา หมาบ ดี เฆ, เฆ ดี บอ ลึร ชึม หราย โตต.
16อี มูห เฌาพรา ปี กรึบ อาโกบ ตึอน, อัน ตู ปี อาโมยว ฌึร ตี. โคว, อัน มูห ดา กาณา อี พาน เบลห ฌึร ตี ดอน โมยว. เฆ ดูอี อีซาเรลัะ, เฆ แฮะ คัม ดี แบน ปี คาฆูน อัน เฌา. เฆ บอ แดะ อัน เฌา ต็อห, “เฌาพรา อี อึบ โตต ดอน โมยว.”
17อึย เบ ดูอี อี กอย โดง แฮะ แวง โรบ อี เฮา, แตห เบ ดีเฆรียบ อูน โกรวกราม เบ, แตห เบ ปึอน ดี เลห โดง กอย เบ.
18โคว, เฌาพรา แฮะ ต็อห, “ดอ ตี นี โอว ดี โฮว เตา ดูอี บอ เรา บอ มืง แตห เฆ เลห แคง มืง นี, แตห เฆ คัม อี ดูก อี หณาบ กาเซา.”
19โอว แฮะ คัม โวด กืน กาเซา โกบ แฮะ มึห โอว ดีม ตาง อี ตู ปึอน ซีนัม แตห อึณ แกน. มาแล, โอว วี ต็อห, ‘อึณ บอ มูห เซา ปี โลว คัม โอว.’
20ทึบ โดง กอย โอว แฮะ ฮอต กาปยาต. วัน ปัก ทึบ มืร แฮะ ฮอต กาดัด. ฆอน อีมาย โอว แฮะ ฮอต เลห ตัะ โอว. อาว มึห อาเซ อี ดี วี ซัม ทึบ ดัว ดี โอว. อาว มึห อี ดี ฆ็อง บีก ดัว ดี โอว.”
21โคว, เฆ ดา อี เฮียง มาบู ตู มึห อางยาน. เฆ มืร ตู ดีหมอด เฌาพรา. ฆาน ปี โบง เฆ ตู ออง. พึง มาบู เฆ มืร แฮะ ฮอต กาย็อห กาเรห โตต.
22แตห เบ โทม ซาดาง อี ดี ตัห. อึณ ดี มึห ซีนัน ซีนืง ตาง ดีงึณ ตัห นา กัว. เฆ ดูอี กืน ดี บอ ตัห โบง แตห มืง ดอน มืง อี กอย แคง กาดาย มืง ยูดา กาปยาต ราม โตต, แตห อึณ วี แบน โดง กอย มาโซว แปร.
23อึย แม เฌาพรา, โอว แฮะ ฮอต นับ, ดูอี ตู ปึอน อึบ อาซาก อัน. อัน ตู ปึอน วี แยต โดว บรีม อัน ราง อัน.
24แม เฌาพรา, หมาณ, แกวะ แตห แม เฌา รู กาเซา ดี โอว. แตห แม เฌา ซูงพยาด บอ มาโนว โอว แคะ ดี กางยา อัน. เซ อาว ปาย ตี แม เฌา นับ ดี โบง แกวะ แตห โอว มึห ดีโคว มาเซ.
25แตห แม เฌา รู ดี เฆ ดูอี อาโมยว เฮา บอ ดี เฆ ดูอี อี ตู ดึอม นับ แม เฌา, อี ตู ซาคึร ดี แม. โคว, อึณ ปี เฆ แฮะ ก็อะ โฮม โตต ดูอี อาโมยว อาโกบ บอกาเฆลียด. เฆ แฮะ ปยาต แวน บอ มืง ดอน มืง อี มูห แคง กาดาย โดง กอย เฆ ดูอี อาโมยว อาโกบ ตี.
Currently Selected:
อาเยเรมี 10: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
