อาอีซายัะ 65
65
ลอง เฌาพรา ดัม หมาบ ดี เฆ ดูอี อี กาบัห ดี อัน
1เฌาพรา วี ต็อห, “เฆ ดูอี อี ตู ดีหมอด โอว, โอว แตห เฆ นับ ลอง โอว. เฆ ดูอี อี ตู เหรต โอว, โอว แตห เฆ ยึร โอว. โอว แฮะ กาลาง ดี เฆ อาโมยว ดูอี อี ตู ฆาว ปวน โอว ต็อห, ‘แตห เบ ยอด โอว, โอว กอย ดี นี.’
2โอว แฮะ โซ็ง แด โอว บอ ดอง วัน, แตห โอว รวห เฆ ดูอี อี ดืร กาเซา, อี แฮะ โบง กาลึบ, โบง โดบ ปี คราม เฆ เซเซ.
3เฆ ยี ตู นับ ดี ซาย, เฆ บอ ยัะ โบง แตห โอว รู เซเซ. เฆ หลู ดี โอว โดง ตู กาอาบ หลู. เฆ บอ โดะ กาณัน เลโบน, หลู แดง มาว มาอูด.#65:3 ยอด เลห, คาน 20 กาบัก 25, เฌาพรา แฮะ ดึอม กาลาง ซีคยา ลอง อัน ตี.
4แคง หมึร เฆ บอ นับ ดี ฮาว กอย แคง บาเรว, บอ ปรา ดี โบง ปี ตู ปึอน ยึร อี. เฆ บอ วี โฮม ยัง เลต บอ อึม ยัง อี หมึอม กาอีห แปะ แฮะ ก็อง เฆ.
5ปาย ตี เฆ บอ นับ ดี กาลาง ดี อี เฮา ต็อห, ‘แตห เบ กอย ราม กาโต็ง ดี เย, เย มูห ดูอี อี ซีงา บอด หลึอม เบ. อาว กาอาบ เย ตา ดึร ตา โดง เบ.’ ปี โบง เฆ ฌึร ตี, อึณ บอ แตห โอว รู กาเซา. อึณ บอ ปี ดัก เงา ดี ฆูงมูห โอว บอ เงา อี กูห ดอง วัน.
6บัร เบ ยอด, อี เฮา แฮะ ฮอต แดม อูน ลอง โอว. อึณ ต็อห, ‘โอว ตู ปีว ลอง แปะ แฮะ ลูต เฆ ตี. โอว ดี วี โบง เวียะ, แตห อึณ กาดาน หมาบ เฆ.
7โอว ดี วี โบง เวียะ แตห อึณ กาดาน ดี หมาบ ปี โบง เฆ บอ หมาบ ปี โบง ฆูณ ดัง เฆ. เฆ แฮะ โดะ กาณัน เลโบน แดง นอน จา, ปี วี แนนัะ โอว ดี นอน เตียม. โกบ อึณ ปาย ตี โอว มืร ดี วี โบง เวียะ ดี เฆ แคะ กาดาน หมาบ เฆ, แตห อึณ ปี ดูอี อูน โกรว แคง ซีฆลึม เฆ.”
8เฌาพรา ปี วี ต็อห, “อาว มึห อาเซ อี ปยาต แวน อึณโป็ง เบล มางูน อี ซี มึห เบล อี แฮะ ชีด แฮะ ซีคยา. โคว, เฆ บอ ปึอน ดี กรีด แตห อึณ เลห อึม มางูน, แตห อึณ บอ แบน อาฆยึร ดี อี. ปาย ตี โอว มืร ตู บยัด แวน โตต เฆ ดูอี ปี ซูต ปี จัร โอว.
9โอว ดี บอ แตห ครึร อาโกบ มึห หลูกหลาน. โอว ดี แตห อึณ มึห อี ปลูะ นอน แคง มืง ยูดา. นอน เฆ ตี ดี แบน คาฆูน ดี เฆ ดูอี ปี ร็อห โอว. เฆ ดูอี ปี ซูต ปี จัร โอว ดี บอ กอย ดี ตี.
10แคง ดีลัยะ อี จืร ซาโรน อึณ ดี มึห พึง มาบู, บอ แคง ดีลัยะ อาคอ ดี แบน โดง อีด พึง มามัก. โคว, เฆ ดูอี ปี อึบ โอว แฮะ วี เหรต โอว.
11อี มูห เบ, เบ แฮะ แวน โอว. เบ แฮะ ปีว นอน อี ซีงา บอด อี มูห โดง กอย โอว. เบ แฮะ วี เฮียง เฌา ฆาด ตึอน บอ หลู ปี ดี เดียง ดี เฌา เมมี. #65:11 ดอ มึอน เฆ ต็อห เฌา ฆาด ดี แตห ซูลาบ บอ เฌา มานี ดี แตห ดูก.
12โกบ อึณ ปาย ตี โอว ดี แวน เบ บอกาเฆลียด, แตห เบ ยัม ดี มาปัวะ ลาง. โคว, ดอ แดะ โอว ดี เบ, เบ ตู อึร โฆรห โอว. ดอ กาลาง โอว โฆรห ดี เบ, เบ ตู โทม. เบ แฮะ วี ร็อห ดี โบง ปี ตู อึง โอว, วี โบง อี ตู บอด อี ตู หมึอม อี ตู ล็อะ น็อห โอว.
13เบ ยอด, โอว กาลาง แตห เบ นับ. เฆ แดเจณ โอว, เฆ ดี ปึอน ดี โฮม แพ. อี มูห เบ, เบ ยี ดี กาปราณ กาเซา. เฆ อี โดบ โอว, เฆ ดี โบยว ดาคึย, เบ ยี ดี โลว คัม อี หมึอม ซาย. เฆ แดเจณ โอว ดี บอ ปึอน ดี เดียง แพ. เบ ยี ตู มึห ดี เดียง.
14เฆ แดเจณ โอว ตี, เฆ ดี บอ ต็อห โหมว โบยว โบยว เกยา เกยา. อี มูห เบ, เบ ยี ดี โลว ยาม บอ มึห น็อห ลึร. เบ ดี บอ โลว ดัด โกบ มึห เบ น็อห กาปยาต.
15ดูอี แปะ แฮะ ร็อห โอว ตี, เฆ ดี บอ ดึห จืร เบ, แตห อึณ แบน กาซัม ดืง กาซัม เอห อี. โอว เฌาพรา อี อึบ โตต ดอน โมยว, โอว ดี บอ แดบ แวน เบ. อี มูห เฆ อี มูห แดเจณ โอว, โอว ดี บอ ดัว จืร กามาย ดี เฆ.
16ปัน อัน ตี, เซ อึณ บอ มึห ดูอี แคง มืง เฆ อี ซี ปึอน ม็องการา, อัน ดี หมาณ ดี เฌาพรา อี โบง นา มูห นา หมาน เซเซ. เซ อึณ มึห อี ซี ดืง, ซี ดัว กาดีก ซัดฌา, อัน ดี ดืง แตห เฌาพรา โทม. โคว, อัน เฌา มึห น็อห หมาน. อึณ ดี โบว แบน ปาย ตี โกบ แฮะ หราย แฮะ ปีว โอว ดูก ตาง แปะ แฮะ ดึอม คัม เฆ อาต นี.”
ลอง กาดาย กามาย บอ ฆางหราว กามาย
17แฮะ ฮอต, เฌาพรา ปี วี ต็อห, “โอว แฮะ คราม ดี โบง กาดาย อี กามาย บอ ฆางหราว อี กามาย. ลอง อี แฮะ ปวน ตัห นา ปัน ตึอน, อาว ฮู มึห อี โหลห อี โนว ดอ เหมา.
18แตห เบ โบยว ดาคึย โดบ ปี ดี พาน เบลห โอว ตี. มืง เยรูซาแลม กามาย ตี แตห อี โบยว ดาคึย. เฆ ดูอี อี กอย แคง มืง เยรูซาแลม ตี, เฆ มืร มึห น็อห โคย น็อห โบยว.
19โอว มืร ดี มึห น็อห โคย ดาคึย โกบ มืง เยรูซาแลม บอ โกบ ดูอี อี กอย แคง มืง ตี. อาว ฮู มึห อี ยาม อี ดัด.
20ฆอน อางัะ มืร ตู ยัม ดอ ซี อางัะ อัน. ดูอี บอกาเฆลียด ดี บอ มึห อาซาก โต็ง กาเซา. เซ อาซาก เฆ แฮะ โนะ อู มาย็อห ซีนัม, เฆ ยี ปี ดูอี หนึม. เซ อี ยัม อาต โนะ อาซาก อัน อู มาย็อห ซีนัม, อึณ มูห ดูอี แปะ แฮะ ดืง โอว.
21เฆ ดี บอ โบง กาง บอ กอย ดี ตี. เฆ ดี บอ ซัม เฮ มางูน บอ ปึอน ดี โฮม เบล อัน.
22อาว ฮู ปี คา อาต, ดอ ซัม เฆ กาง เฆ, ยี มึห อี เฮา ตัห กอย. ดอ ซัม เฆ มาน มางูน เฆ, ยี มึห อี เฮา ตัห โฮม. โคว, เฆ ดูอี ปี อึบ โอว, เฆ ดี มึห อาซาก โต็ง ปี เฮ. เฆ ดี บอ โบยว ดาคึย โกบ แฮะ ปึอน เฆ ดี บึง แปะ แฮะ โบง เฆ, แปะ แฮะ ลึมลา เฆ.
23ฆาน ปี โบง ปี รัณ เฆ, อึณ ดี บอ กยัะ บอ ออง. อึณกรึห เฆ, อาว มึห อี ดูก อี หณาบ ดี น็อห ดอ เหมา. โคว, โอว ดี บอ ม็องการา ดัว นา บอด นา หมึอม ดี เฆ บอ ดี หลูกหลาน เฆ.
24ซีณ อาต ฮอต ซาคึร เฆ, โอว แฮะ ฮอต โทม โฆรห เฆ. ดอ ซี กาลาง เฆ โอว ดี บอ ดัว ปี หมาณ เฆ.
25ดอ อัน ตี, มาโซว แปร ฆาย ฆอน มาบู ดี กอย กาโดบ โฮม รึม. มาครังซี ดี บอ โฮม เหรียง ปี มามัก. แคะ กอย อาโมยว มาฮัณ, เฆ ดี บอ โฮม กาปูห. อึณ มืร ฮู มึห อาเพ อาเร มาเซ ดี นอน ฌีโอน อี มูห โดง ซีงา บอด, โดง กอย โอว.” แคะ ตี แปะ แฮะ กาลาง เฌาพรา.
Currently Selected:
อาอีซายัะ 65: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
