อาอีซายัะ 48
48
ลอง ปี คราม เฌาพรา ดี โบง นา อาต ฮาว
1อึย เบ ดูอี อี มูห อาโมยว อาโกบ, อี จืร ดูอี อีซาเรลัะ, อี ตัห แคง ครึร อายูดา, เบ ปี บอ แฮะ ฆาว ปวน เฌาพรา, แฮะ ดืง ต็อห, เบ ดี กรึบ มี เฌาพรา ปี กรึบ ดูอี อีซาเรลัะ. โฆรห เบ ตี ยี ตู มูห ตู หมาน. อึณ ตู เลห แคง น็อห ซืร น็อห หมาน.
2ปี บอ แฮะ ปาย ตี มืร, เบ ยี วี ปีพูง เบ ต็อห, “เย มูห ดูอี แคง เรา แคง มืง อี ซีงา บอด. เย บอ บึง เฌาพรา ปี กรึบ เฆ ดูอี อีซาเรลัะ. อัน เฌา อี จืร ‘เฌาพรา อี อึบ โตต ดอน โมยว.’”
3เฌาพรา ปี วี กาลาง ดี เฆ ดูอี อีซาเรลัะ ต็อห, “ดอ มึอน โอว แฮะ ฮอต กาลาง อูน ดี อาต ลอง อี ดี โบว แบน. วาย อัน ตี ดอ ตู นัมโหลห อี, โอว มืร แฮะ โบง แตห อึณ โบว แบน อู เฌณ. โอว แฮะ กาลาง ลอง อัน ตี, แตห อี นับ.
4โอว แฮะ นับ, เบ มึห น็อห ดืร กาเซา. ซีนัะ แมง เบ บอ โปลม ดีฆัต ปี ฮีน. กาต็อห เบ มืร บอ ปี ดีฆัร บ็อง เดณ.
5โคว, โอว แฮะ ฮอต กาลาง อูน ลอง อัน ตี อู ซีณ ดอ มึอน. โอว มืร แฮะ ฮอต กาลาง บยัะ ดี เบ อู ซีณ อาต โบว แบน ลอง อัน ตี. แกวะ แตห เบ วี ปึอน ดี ต็อห, ‘อารึบ ราง ปี โบง โอว แฮะ โบง ฌึร ตี. อารึบ ราง แปะ แฮะ โบลห โอว บอ อารึบ ราง แปะ แฮะ โหลว โอว, เฆ แฮะ โบง แตห อึณ แบน ปาย ตี.’
6เบ แฮะ ยึร ซาดาง ลอง อัน ตี บอ แฮะ ยึร ดี งาย เบ ลอง แปะ แฮะ โบง โอว. เบ ยี ตู วี กาลาง ดี ดูอี เฮา. โอว ยี ต็อห ดี เบ, ซีณ ดอ ตี นี โอว ดี วี กาลาง ดี เบ ลอง อี กามาย, โมยว ปี ตู ดึอม กาลาง โอว คอ อู เฌณ.
7ลอง อัน ตี โอว แฮะ โบง แตห อึณ แบน ดอ ตี นี. ลอง อัน ตี อู ซีณ ดอ มึอน กอ ฌัม ดอ ตี นี, เบ ตู ดึอม ยึร ดอ เหมา. โคว, เบ ตู ปึอน ต็อห, ‘โอว แฮะ ฮอต นับ.’
8เบ ตู ดึอม โทม ปี ต็อห โอว, อึณ มืร ตู ดึอม กาหลูห ดี น็อห เบ. ซีณ ดอ มึอน โฆรห โอว ตู ดึอม ลึบ แคง โหยะ เบ. โอว แฮะ ฮอต นับ, เบ มูห ดูอี ตู ปึอน หณึม. โอว แฮะ ฮอต ยึร, เบ ดืน ดี กาบัห ดี โอว เซเซ.
9โอว คัม ดี โอด ดี ยืน น็อห รู โอว ดี เบ. โคว, โอว ซี แตห อี เฮา นับ น็อห โอว. โอว ตู โบง แตห เบ ลึร ชึม. โคว, โอว ซี แตห อี เฮา อืบ มยูก โอว.
10โอว แฮะ มาโนว เบ. โอว ตู โบง ดี เบ ปี ดูอี ดัง รึอน แคง เงา. โอว แฮะ แตห เบ คัม ดูก อี ปี อี ดัง รึอน แคง เงา. โอว ยี ตู โบง ดี เบ ปี อี ทารอง รึอน.
11ลอง ปี โบง โอว ตี, โอว แฮะ โบง แตห อี นับ น็อห โอว. แกวะ แตห ซาเร โอว คย็อะ. อาพูง ดังโคว โอว, โอว ตู แตห อาเซ พาด ดึห.” เฌาพรา แฮะ กาลาง ปาย ตี ดี ดูอี อีซาเรลัะ อี ดืร กาเซา.
12วาย อัน ตี เฌาพรา ปี วี ต็อห, “อึย เบ ดูอี อีซาเรลัะ อี มูห ดูอี ปี ร็อห โอว, แตห เบ โทม โฆรห โอว. โอว มูห อัน เฌา อี กาจูห โตต ดอน โมยว, โอว ดี บอ โบง แตห อึณ กอ ฮอต.
13แด โอว นี อี แฮะ โบง ดัง กาดาย บอ บลัห ฆางหราว. ดอ แดะ โอว ดี เฆ บอ กาดาย บอ ฆางหราว แฮะ แบน อู เฌณ.
14แคะ กอย เบ บอกาเฆลียด, แตห เบ ตัห กาฌูะ โทม โฆรห โอว. กาแต เฆ เฌา ปี กรึบ อี เฮา วี เหมา แฮะ ปึอน กาลาง ดี อาต ต็อห, ‘วี ปี ร็อห โอว อัน ดี กาโฆห ดี มืง บาแบ. วี ปี ร็อห โอว ตี, อัน ดี โบง ดี อี เฮา แคะ ปี ซี แตห โอว อัน โบง.’
15อึณ มูห โอว อี แฮะ กาลาง อูน ลอง อัน ตี. โอว อี แดะ วี ตี. โอว แฮะ แดะ ตัห อัน, โอว ดี บอ แตห อัน ออง.
16แตห เบ วี ตัห กอย กาตัด โอว, แตห เบ โทม โฆรห ปี กาลาง โอว. ซีณ ดอ โฆว อัน โอว แฮะ กาลาง, โอว ตู เครียง โฆรห โอว. โอว แฮะ กาลาง แตห อึณ ลึห ซีคยา ดี ดอน อี. ดอ แฮะ วี โบว แบน แคะ ปี กาลาง โอว, โอว แฮะ กอย.” ดอ ตี นี, เฌาพรา อี อึบ โตต ดอน โมยว แฮะ อาบ น็อห พึอม อัน ดี โอว.
17เฌาพรา อี ซีงา บอด อี มูห เฌาพรา ปี กรึบ ดูอี อีซาเรลัะ, เฌาพรา อี แฮะ ทูด เลห เบ, อัน แฮะ ต็อห, “โอว มูห เฌาพรา อี มาโนว เบ, แตห อึณ แบน อาฆยึร ดี เบ. โอว ตึย แตห เบ โดบ อึณเตณ ปี กาอาบ เบ โดบ.
18อาต นี เซ เบ โบง โดบ ดารา โอว, เบ บอ ปึอน ม็องการา อี ปี อึม แบลง อี แหล ตู ฮีด ดอ เหมา. น็อห ซืร น็อห หมาน เบ มืร, อึณ บอ ปี ซีลอย อึม นัมมูกซารา.
19โอว มืร ดี แตห ครึร เบ แบร กืน ปี กาฮาต. บอ หลูกหลาน เบ ปี กาฮาต ดอน เฆา อี กอย โคบ อึม นัมมูกซารา. โอว มืร ตู ซี แตห เฆ ลึร ชึม ดอ เหมา. โกบ ตู โทม เฆ โฆรห โอว, อึณ ยี ตู แบน ปาย ตี.”
20แตห เบ เลห แคง มืง บาแบ ตี. แตห เบ บอ เลห ฮาว ดาคึย ดาคึย. แตห เบ ดัด ต็อห โหมว โบยว โบยว เกยา เกยา, กาลาง ลอง ดาง เบ, แตห อึณ กอ ฌัม โดง ซืด กาดาย. แตห เบ ต็อห, “เฌาพรา แฮะ ฮอต ทูด เลห เฆ ดูอี อี มูห แดเจณ อัน อี มูห ดูอี อาโมยว อาโกบ.
21ดอ ตึย ฮาว เฌาพรา เฆ ดูอี ปี อึบ อัน โดบ อึณเตณ แคง แปร กาฮ็อห อี แฮะ ซอดาด กาเซา, เฆ ยี ตู เอต อึม. อัน เฌา แฮะ แตห อึม โตห เลห ดี ดาอาง มาว แตห เฆ เดียง. อัน แฮะ ดัห มาว ตี, อึม มืร บอ กาโชต เลห อู เฌณ.
22เฆ อี มึห หมาบ, เฆ ยี ตู ยึร ฆยามซา ดอ เหมา.” เฌาพรา แฮะ กาลาง อูน ปาย ตี.
Currently Selected:
อาอีซายัะ 48: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
