อาอีซายัะ 35
35
ลอง อึณเตณ อี ซีงา บอด
1โดง แปร กาฮ็อห, โดง ตู ลัต มาเซ, อึณ ดี วี แบน โดง กรึอม โดง ดาคึย, โดง เฮณ ดี วี มึห เปต เฆ โบห.
2อึณ ดี มึห โบห แบน โมยว แบน โมยว อี ชีด กาเซา. เฆ ดูอี ดี วี มึห ดี ดัด ต็อห โหมว โกบ แฮะ โบยว ดาคึย เฆ. อึณ ดี บอ เฌะฌูง มึห บอ อาพูง ดังโคว ปี นอน เลบานูน. อึณ ดี บอ ชีด กาเซา มึห ซาเร ปี นอน ฆาเมลัะ บอ ดีลัยะ อี จืร ซาโรน. เฆ ดูอี ดี บอ ยึร อาพูง ดังโคว เฌาพรา บอ ซาเร เฌาพรา ปี กรึบ เอ.
3แตห เบ จอย เฆ ดูอี อี แฮะ ดีหลัห, แตห เฆ วี มึห แฮณ. บอ แด ดูอี อี ตู มึห โปลม, แตห เบ จอย แตห เฆ วี มัน ซีคยา. บอ เซ กีณโกร็ง แฮะ ดียูห ดีเยณ, แตห เบ จอย, แตห เฆ วี มึห โปลม.
4เซ อึณ มึห ดูอี อี มึห น็อห โยว, แตห เบ ต็อห ดี เฆ, “แกวะ โยว, แตห เบ มึห น็อห ตาง. เฌาพรา ดี ตัห คยอด เบ บอ ดัม หมาบ ดี รันซู เบ.”
5แฮะ ฮอต ปาย ตี เฆ ดูอี งาย อับ ดี วี ปึอน ยึร. เฆ ดูอี โหยะ กาอาว ดี วี ปึอน โทม ซีคยา.
6เฆ ดูอี เจณ ชอย ดี บอ วี ปึอน ยีต แดน ยีต ฆา ปี มาฌัะ. เฆ ดูอี อี ตู นับ ดี กาลาง โฆรห, เฆ ดี วี ปึอน ต็อห โหมว โกบ แฮะ โบยว ดาคึย ดี น็อห เฆ. บอ แบลง อึม ดี บอ แหล ฮาว แคง แปร กาฮ็อห.
7กาฮาต อี ดาด กาเซา ดี บอ วี แบน อึม ดึง. แคง โดง กาดาย กาฮ็อห ดี วี มึห อึม โตห. โดง ดึอม กอย มาโประ ดี วี แบน โหนง อึม. โดง ดึอม มึห มี เปต ดี วี มึห กาบาง โฆล็ง เฆ แมออ.
8โดง ตี ดี บอ มึห อึณเตณ ตาง อี จืร อึณเตณ ซีงา บอด. วี อี ตู ซีงา ตู ปึอน ฮาว โดบ อึณเตณ ตี. อึณ ปี บอ มูห ดูอี รึร, เฆ ตู กาลึบ, เซ เฆ โดบ อึณเตณ ตี.
9โดง ตี, อาว มึห มาครังซี คอ อู โดว. อาว มึห โดว อี ฮาย อี กาโลห วีว กาโลห เวณ. เฆ ดูอี แปะ แฮะ คยอด เฌาพรา, เฆ ดี โดบ อึณเตณ ตี.
10ดูอี แปะ แฮะ คยอด เฌาพรา เฆ ตี, เฆ ดี บอ เวณ ฌัม มืง เยรูซาแลม. เฆ ดี บอ ต็อห โหมว ดาคึย. น็อห เฆ ดี โบยว ดาคึย เซเซ. เฆ มืร แฮะ ลอด คัม ดูก หณาบ ดี น็อห. เฆ ตู โลว วี กลึร วี เหงา ดอ เหมา.
Currently Selected:
อาอีซายัะ 35: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
