อาอีซายัะ 1

1บับ พืน นี บอ แดม ลอง แปะ แฮะ บยัะ เฌาพรา ดี อาอีซายัะ อี มูห ฆอน อาโมด. เฌาพรา แฮะ บยัะ ดี อัน ลอง อี ดี ปาย มืง ยูดา ฆาย มืง เยรูซาแลม. ดอ อัน ตี อึณ บอ มูห โจว บาน คูนดีคัม อาอูฌียา, คูนดีคัม อาโยวทาม, คูนดีคัม อาคาด บอ คูนดีคัม อาเฮจัะกี อี อึบ มืง ยูดา.

ลอง เฆ ดูอี อีซาเรลัะ ตู ซี โทม โฆรห เฌาพรา

2อาอีซายัะ แฮะ ต็อห ปาย นี, “อึย เบ อี กอย ฆางหราว บอ เบ อี กอย แดง กาดาย แตห เบ บอกาเฆลียด โทม. โคว, อึณ มูห เฌาพรา อี กาลาง โฆรห ดี เบ. อัน แฮะ ต็อห, ‘โอว แฮะ เฮียง ฆอน โอว แตห เฆ แกร ดี ตาง. มาแล, ฆอน โอว เฆ ตี เฆ วี กาบัห ดี โอว.

3มามัก ซี บอ นับ ดา กาณา อัน. มาลา ซี บอ นับ กาลาต อัน อี มูห โดง ดี ดัว ดา กาณา อัน แตห อัน โฮม. เฆ ดูอี อีซาเรลัะ ยี ตู วี นับ โอว. เฆ อี มูห ดูอี อาโมยว ปี อึบ โอว, เฆ อาว ฮู วี นับ ลอง โอว.”

4เฌาพรา แฮะ ต็อห ปาย ตี. โคว, เฆ มูห ดูอี ฮาย ดูอี มืก อี มึห หมาบ กืน. หมาบ เฆ อึณ ปี โกรวกราม อี จัน กาเซา ปี โลว ปัห เฆ. เฆ บอ โบง หมาบ เซเซ ปี ฆูณ เฆ แฮะ ดึอม โบง. เฆ บอ โบง อี ตู ซืร ตู หมาน ปี ดา ดา เฆ แฮะ ดึอม โบง. เฆ แวน เฌาพรา บอ วี ดีณ กาตูะ เฆ ดี อัน เฌา อี มูห เฌาพรา อี ซีงา บอด อี อึบ ดูอี อีซาเรลัะ. เฆ แฮะ ปีว โตต เฌาพรา.

5เหมา อึณปาย ปี โบง กาบัห เบ ดี อัน เฌา เซเซ? เหมา อึณ ปาย ปี ซี คัม เบ ดูก ปอ อึณปัว? อึณ ปี ฆีณ เบ แฮะ มูห โตต ปัน ดีม ปัน ปลา ดีโลย. น็อห เบ มืร, แฮะ อึณจัม ดีย็อะ.

6จูห ดี ฆีณ เบ กอ ฌัม กาบา เปลา เบ อาว มึห กาซืร หมึอม คอ อู โปละ ดี โดว โบ็ง เบ. อึณ ปี แฮะ มูห โตต โดง มายัม ดีโลย. แฮะ อ็อห, แฮะ บึบ, แฮะ งัม อึม กาตึม บอ แฮะ บรัห แฮะ ดีม. กาซืร ดีม เบ เฆ ตี ยี ตู มึห อาเซ อี วี ซาเนียะ เลห อึม กาตึม, วี กาบัน ตา โดณ. ยี ตู มึห อาเซ อี วี พ็อห นามัน, แตห อัน วี อึณจัม วี แกน.

7มาน มืง เบ มืร แฮะ กาปยาต โตต. เงา มืร แฮะ กาซึม โตต กาง แคง มืง เบ. ดอ วี ยึร วี ยอด เบ, ดูอี อาโมยว เฮา แฮะ ฮอต วี ตัห พาด มืง เบ เฆ กาดาย เบ. อึณ แฮะ ฮอต กาปยาต ลึร โตต. โคว, อี เฮา แฮะ ฮอต ตัห อึบ ตัห ออง โตต.

8มืง เยรูซาแลม ยี ซี กอย. อัน บอ ปี มืง อี มึห รันซู อี แฮะ โรบ เฆ. อัน บอ ปี ทึบ อี กอย แคง มาน มางูน บอ ทึบ อี กอย แคง มาน ดีเฆีย.

9เฌาพรา ยี อึบ โตต ดอน โมยว. เซ อัน ตู อูน ดูอี อาโมยว เอ แคง มืง เยรูซาแลม แตห อึณ ซี ฆืด อี แจก, อึณ ดี บอ ปี มืง โซวโดม ฆาย มืง โฆวโมว ตึอน.

10อึย เบ ดา กาณา อี ปี ดูอี อี อึบ มืง โซวโดม บอ เบ อี ปี ดูอี อี กอย แคง มืง โฆวโมว, แตห เบ โทม โฆรห ปี กาลาง เฌาพรา ดี เบ.

11เฌาพรา แฮะ ต็อห, “เบ ทาง โอว ซี ปึอน โดว ปี ดี หลู เบ? โอว แฮะ ปึร โดว ปี ดี หลู เบ อี โดะ ดี เงา บอ ดีกลวน เบรียง โดว ซัด อี ฆลัณ ซีคยา ปี หลู เบ ตี. โอว มืร ตู โลว หนาม มามัก บอ หนาม มาบู เฆ มาแป เบ ตี.

12เซ เบ ตัห โดง กอย โอว, อาเซ แฮะ หมาณ, แตห เบ ตัห แณต แวง โอว?

13แกวะ แตห เบ ดึห ตัห ปี ดี หลู เบ อี ปีเยณ, อี ตู มึห ดีโคว มาเซ ตี. โอว แฮะ กาอีห อึณกรึห อูห หงูน ปี หลู เบ อี โดะ ดี เงา ตี. โอว ตู อึง บอ บลอย ปี โบง เบ ดอ มูห ซีแง มาเฆียน กามาย บอ ดอ มูห ซีแง ดีเหลา. โอว กาอีห บอ บลอย อาโมยว เฮา ดอ ตัห กาฌูะ เบ. โคว, โอว ตู คัม เบ โบง บลอย บอ โบง กาซู หมาบ.

14โอว แฮะ ฌ็อง บลอย ซีแง มาเฆียน กามาย บอ บลอย ซีแง บอด ปี โบง เบ. ซีแง เฆ ตี, อึณ แตห แล อึณ หณาบ ดี น็อห โอว. โอว อาว ฮู แป คัม ดี โด็ง ลอง อัน ตี.

15ดอ กรึบ ซาคึร เบ ดี โอว, โอว มืร ตู ยอด เบ. เบ ปี บอ ซาคึร แคะ เหมา, โอว ตู โทม. โคว, อึณ ปี แด เบ แฮะ แบ หนาม ดีโลย.

16แตห เบ บาย โดว เบ, แตห อัน ซีงา. แตห เบ แวน อี ตู หมึอม แปะ แฮะ โบง เบ ปี ยึร โอว ตี. แตห เบ วี จู โบง อี ตู หมึอม.

17แตห เบ วี เฮน ดี โบง นา บอด นา หมึอม, วี เหรต ดี โบง ซืร ซืร หมาน หมาน, วี จอย เฆ อี แฮะ คัม ปี คาหนาบ อี เฮา, แคร เฆ อี ซี โบง นา ตู หมึอม ดี ฆอน ซีปรัห, วี จอย ฆ็อง แร ยา ซีปรัห.”

18เฌาพรา บอ กาลาง ฮาว ต็อห, “ตัห, แตห เอ ลาย กาลาง ลาย แค, อาเซ แฮะ หมาน อาเซ ตู หมาน. หมาบ อี กอย แคง น็อห เบ ปี บอ แฮะ เรณ ดีเรียง, แตห อึณ กอ หณาบ บาย แวน มืร, โอว ยี ดี วี โบง แตห น็อห เบ วี ลูย กามาย, แตห อึณ กอ ลูย ราว ปี อึม ดาด. หมาบ เบ อี แตห น็อห เบ กาดาต, แตห อึณ กอ เรณ ว็อง มืร, โอว ดี วี โบง แตห อึณ ลูย ปี ฮึก มาบู.

19เซ เบ มึห น็อห ซี โทม โฆรห โอว, เบ ดี บอ ปึอน ดี โฮม อี หมึอม ดอน โมยว อี เลห แคง กาดาย นี.

20มาแล, เซ เบ วี แทณ โอว, วี กาบัห ดี โอว, เบ ดี บอ ยัม ดี มาปัวะ ลาง อี เฮา. โอว อี มูห เฌาพรา แฮะ ต็อห ปาย ตี.”

21แคง มืง เยรูซาแลม เฆ ดูอี แฮะ ดึอม โดบ ซีคยา เฌาพรา. เฆ ยี แฮะ วี แวน เฌาพรา, วี โบง ดี อัน ปี ปี โบง ยา มาลัม ดี อีมาย บรีม อัน. อาต นี, อึณ บอ มูห ดูอี อี มึห น็อห ซืร น็อห หมาน ดีโลย. ดอ ตี นี ยี วี มึห มี ดูอี อี ง็อห ยัม อาซาก อี.

22อาต นี เฆ ปี บอ แฮะ ปี รึอน แฌด มืร, ดอ ตี นี เฆ แฮะ วี ปี เอียง รึอน. อึม มางูน อี หมึอม ตึอน มืร, แฮะ วี กาซู กาวัร อึม อัห.

23เฆ ดา กาณา เบ อี อึบ มืง มืร แฮะ วี กาบัห ดี มืง ตี. เฆ แฮะ วี แบน ฆึก ดา โฌน เฆ ดา ปรา. เฆ ดอน อี บอ วี ดึห ดี โฮม ลักซอง ปี ดัว อี เฮา. เฆ อาว ฮู ฆ็อง แร ฆอน ซีปรัห แคง มืง. เฆ อาว ฮู ซูงพยาด อามู ปี กาลาง ยา ซีปรัห.

24โกบ อึณ ปาย ตี เฌาพรา อี อึบ โตต ดอน โมยว, อี มูห บอ เฌาพรา อี อึบ ดูอี อีซาเรลัะ อัน แฮะ วี ต็อห, “บัร เบ ยอด, โอว มืร ดี แวน เฆ อี แบน รันซู โอว. โอว ดี วี โบง เวียะ ดี เฆ อี มูห รันซู โอว.

25โอว ดี วี ดัม หมาบ ดี เบ, แตห อึณ ปี อี ทารอง รึอน, แตห เอียง อัน เลห. ปาย ตี โอว ดี ดึห แวน โตต อี ตู หมึอม อี กอย แคง น็อห เบ.

26โอว ดี วี ดาง แตห อึณ มึห ดา ตาง อี ซูงพยาด ดารา, แตห อึณ วี ปี ดอ โฆว ตึอน, แตห อึณ บอ มึห ดา อี ดัว อากยาม อางยาน ดี เบ ปี คา อาต. วาย อัน ตี อี เฮา ดี วี ต็อห, ‘แคง มืง เยรูซาแลม อึณ มึห มี ดูอี น็อห ซืร น็อห หมาน บอ เฆ อี โบง นา หมาน เซเซ.” เฌาพรา แฮะ กาลาง ปาย ตี.

27โอว ยี ต็อห ดี เบ, เฌาพรา ดี บอ คยอด เฆ ดูอี แคง มืง ฌีโอน แตห อึณ โดบ นา มูห นา หมาน. เฆ ดูอี อี แฮะ กาปลูะ น็อห, อี แฮะ โหลห หมาบ เฆ, อัน เฌา ดี วี กาเว เฆ โกบ มึห อัน น็อห ซืร น็อห หมาน.

28มาแล, อัน เฌา ดี แวน เฆ อี โบง นา ตู หมึอม, อี กาบัห ดี อัน ดอน อี. อัน ดี บอ แวน เฆ อี แวน อัน, แตห เฆ ลึร ชึม ดอน อี.

29เบ ดี บอ หมึอม ซาย ดี อาต เฌาพรา โกบ แฮะ ดึอม กรึบ เบ ดัง เฮ เทเรบ. บอ โกบ แฮะ ดึอม โคย กาเซา เบ ดอ กรึบ เบ ปาย ตี. เฌาพรา ดี บอ แตห เบ ชึม ซาเร โกบ กาปึม แปะ แฮะ ร็อห เบ ตึอน.

30โคว อัน ตี, เบ ดี บอ ปี เฮ อี มึห หลา อี แฮะ เฮียะ กาฮ็อห. เบ ดี ปี บอ กาปึม อี ตู มึห อึม ดี รึก.

31เซ อึณ มึห ดูอี อี มึห โปลม ตาง, อัน ดี บอ วี ปี กาฮึม ปลาย. ปี โบง อัน, อึณ ดี บอ ปี กาชัต เงา. บอ อา โมยว ตี ดี บอ กาซึม ดี รึม โตต. เงา ตี ยี ตู มึห อาเซ อี ปึอน บยัด แตห อัน ยัด.” อาอีซายัะ แฮะ กาลาง ปาย ตี ดี เฆ ดา ตาง อี อึบ เฆ ดูอี อายูดา.

Currently Selected:

อาอีซายัะ 1: pce

Highlight

Copy

Compare