ฮบ 13

1แตห เบ ลาย ร็อก ปี อู บีนอง ลาย ร็อก. 2แกวะ แตห เบ ปีว ดี รวห แคต ปี ตู นับ เบ, อี ตัห ดี กาง เบ. โคว, อึณ แฮะ ดึอม มึห ดูอี อี แฮะ รวห อามู อามาด เฌาพรา ลึบ แคง กาง เฆ. เฆ ยี ตู นับ ลอง อัน ตี. 3แตห เบ โหลห บอ เฆ อี แฮะ โจห กาปึม. มาด แตห อึณ ปี บอ เบ แฮะ โจห กาปึม. แตห เบ โหลห บอ เฆ ดูอี ปี คาหนาบ อี เฮา, มาด แตห อึณ ปี, บอ เบ แฮะ คัม ดูก ตี.

4เซ ดูอี แฮะ คัด, แตห เบ ดอน อี มาด, อึณ มูห อี หมึอม. แตห บอ อีบึณ บอ อีมาย ลาย มึห น็อห ซืร. โคว, เฌาพรา ดี ดัม หมาบ ดี เฆ อี ลาย ลูต ลาย ลาย. 5บอ โจว เบ, แกวะ แตห เบ มึห น็อห ลอพัะ ซี ปึอน รึอน เฆ ครีว. แตห น็อห เบ จู แคะ โกรวกราม แปะ แฮะ มึห เบ. โคว, เฌาพรา แฮะ ต็อห, “โอว ตู กาฆ็อห ดี เบ, โอว ตู เบลห แวน เบ ดอ เหมา.” 6โคว อัน ตี แตห เอ มึห น็อห ยัะ ดี กาลาง ต็อห, “เฌาพรา แฮะ จอย โอว, โอว มืร ตู โลว โยว มาเซ. อาว มึห อาเซ อี ปึอน โบง นา จาว ดี โอว.”

7แตห เบ โหลห เฆ ดา ตาง อี แฮะ แยต เบ, อี แฮะ กาลาง โฆรห เฌาพรา แตห เบ โทม. แตห เบ กาดัวะ กาพา ลอง อาฆยึร แปะ แฮะ โบง เฆ, แตห เบ วี หณึม ปี เฆ. 8เฌา เยซู ยี ตู บยอง ดอ เหมา. บอ อาหมึร บอ อาตึร, บอ นา อาต ฮาว ดอน โจว ดอน บาน, อัน ปี บรีม.

9แกวะ แตห เบ วี โทม โฆรห ปี มาโนว อี เฮา แบน โมยว แบน โมยว อี ตู ปี ปี มาโนว เย. โคว, เอ ดี มึห โปลม มึห แฮณ แคง น็อห โกบ ปี เฆฌู เฌาพรา. อาว มูห ปี ดี โฮม อี แตห น็อห เอ มึห โปลม. เซ ดูอี โฆยวฆยา ดี โฮม มี ปี ดี โฮม ปี ดัม ดารา, อึณ ตู มึห อาฆยึร มาเซ. 10อึณ ปี เอ แฮะ มึห กาโช็ง หลู ปอ อู โบ็ง. เฆ ดา อี หลู ดี เฌาพรา อี โบง ฆาน แคง ทึบ บีก บอด ตึอน, เฆ ยี ตู ปึอน ดึห โฮม ปี หลู อี กอย แดง กาโช็ง หลู เอ ตี.

11ดา ตาง อี อึบ โตต ดูอี อี หลู ดี เฌาพรา, อัน แฮะ ดึห หนาม โดว ปี หลู เฆ ตึอน, เบลห อูน แคง โดง อี ซีงา บอด หลึอม โตต, แตห อึณ แบน ปี ดี หลู อี ฆ็อห แวน หมาบ. แฮะ ฮอต, เฆ ปี วี ดึห โดว ซัด ปี หลู เฆ ตี, วี ฮาว โดะ นา เรต โดง คยัะ เฆ. 12เฌา เยซู มืร แฮะ คัม ดี ยัม นา เรต มืง, แตห อัน ปึอน ดี ฆ็อห แวน หมาบ ดูอี บอกาเฆลียด, แตห เฆ วี แบน ดูอี อี ซีงา บอด. 13โกบ อึณ ปาย ตี, แตห บอ เอ ฮาว โดง กอย เฌา เยซู นา เรต โดง คยัะ ดูอี. แตห เอ คัม อี หมึอม ซาย ปี เฌา เยซู แฮะ คัม. 14โคว, ดอ กอย เอ แดง กาดาย นี, อึณ ตู มึห มืง อี ดี แตห เอ ปึอน กอย เซเซ. เอ ยี ซี ลึบ แคง มืง อี ดี วี ตัห วาย นี.

15เซ อึณ ปาย ตี, แตห เอ บึง เฌา เยซู บอ อืบ เฌาพรา เซเซ, แตห อึณ ปี เอ หลู ปี ดี หลู โดว ซัด. ปี ดี หลู เอ ตี, อึณ บอ มูห โฆรห เอ อี ต็อห, อัน เฌา มูห เฌาพรา อี อึบ เอ. 16แกวะ แตห เอ ปีว ดี ลาย จอย ลาย เฆฌู. เซ เอ โบง ปาย ตี, อึณ บอ ปี, เอ แฮะ หลู ปี ดี หลู อี แฮะ ล็อะ น็อห เฌาพรา.

17แตห เบ โทม โฆรห เฆ ดา ตาง อี แฮะ แยต เบ. ดูอี เฆ ตี, เฆ มืร ตู กอย ปีเยณ, ตู ดีเหลา. เฆ บอ โบง เซเซ, แตห อึณ แบน อาฆยึร ดี เบ. เฆ โบง ปาย ตี โคว, เฆ แฮะ นับ, เฆ โลว วี กาลาง โตต ดี เฌาพรา, แตห อัน ซูงพยาด โยว อึณ หมึอม ตู หมึอม. เซ เบ โทม โฆรห เฆ, อึณ แตห เฆ วี โคย ดาคึย ดี โบง ฆาน เฆ. เซ เบ ตู โบง ปาย ตี, อึณ ดี บอ แบน น็อห กลึร น็อห เตียะ ดี เฆ. บอ ดี เบ อาว แบน อาฆยึร มาเซ.

18แตห เบ ซาคึร บอ ดาง เย. เย แฮะ นับ ซีคยา, เย มึห น็อห ลูย. เย มืร มึห น็อห ซี โบง มี นา บอด เซเซ. 19โคว, โอว กาซูห เบ, แตห เบ ซาคึร ดาง โอว, แตห โอว บอ ปึอน ดี เจว ฮาว โดง กอย เบ. 20-21เย ยี หมาณ, แตห เฌาพรา อี แตห เอ มึห น็อห เฆียด, ดัว ดี เบ ดอน โมยว แคะ ปี โลว เบ, แตห เบ ปึอน ดี โบง โดบ ปี อึง อัน เฌา. เฌาพรา แฮะ แตห เฌา เยซู วี ยีต วี อีม วาย แฮะ ฮอต ยัม อัน, แตห อึณ โดบ ปี กาแซณ เฌาพรา. ปี กาแซณ อัน ตี ยี แฮะ หมาน เซเซ. ปาย ตี, เฌา เยซู แฮะ แบน ปี ดา อี เฮียง มาบู อี ตาง อี บอด. เย บอ หมาณ, แตห เฌาพรา โบง แคะ ปี อึง อัน แคง น็อห เอ, แตห อึณ ล็อะ น็อห อัน. แตห อัน เฌา โบง ฌึร ตี, โกบ หณึม บึง เอ เฌา เยซู. อึณ แฮะ กาอาบ เอ อืบ อาพูง ดังโคว เฌา เยซู เซเซ ดอน โจว ดอน บาน. ซาตู.

22อึย เบ บีนอง, แปะ ปี แดม ตึย โอว ดี เบ นี, อึณ ตู โต็ง แคะ เหมา. โคว, โอว หมาณ, แตห เบ บอ โทม ซีคยา โฆรห ปี มาโนว โอว ดี เบ นี. 23โอว ซี แตห เบ นับ บอ ลอง อาทีโมวเท อี แฮะ ปี วา เอ. อัน แฮะ ฮอต เลห แคง กาปึม. เซ อัน บอ เจว ตัห, โอว ดี ฮาว รึม โดบ อัน, แตห ยาย ฌัม โดง กอย เบ.

24แตห เบ กาลาง ปี นัมโหลห เย ดี เบ, แตห บอ ดา ตาง อี แยต เบ, บอ เฆ อี แฮะ หณึม เฌา เยซู ดอน อี ปึอน ดี โทม. เฆ บีนอง อี กอย แคง มืง อีตาลี มืร, แฮะ นัมโหลห เบ.

25แตห เฌาพรา เฆฌู เบ ดอน อี. ซาตู.

Currently Selected:

ฮบ 13: pce

Highlight

Copy

Compare