ฆท 5

1เฌา เยซู แฮะ แตห เอ ลอด, แตห เอ กอย ทังฮาง. อาว โลว วี แบน หมาย ปอ อู เฌณ. แตห เบ หณึม ซีคยา, แกวะ แตห เบ วี คัม ดูก ปี ปี โลว คัม หมาย.

2แตห เบ โทม โฆรห ปี กาลาง โอว อาปอลู นี. เซ เบ คัม ดี ซัวะ แวน ฮูน ลัะคานา อีมาย, อึณ ปี เฌา เยซู อาว มึห อาฆยึร มาเซ ดี เบ. 3โอว กาลาง ปอ อู เฌณ ดี เฆ ดูอี อี คัม ดี ซัวะ แวน ฮูน ลัะคานา ตี ดอน อี, เฆ ดี โลว โบง โดบ ดารา ดอน ณ็อง. 4เบ ดอน อี อี โบง โดบ ดารา, แตห เบ ปึอน น็อห ซืร น็อห หมาน ปี ดัว เฌาพรา ดี เบ, เบ แฮะ ลาย กาฆ็อห ดี เฌา เยซู. เบ แฮะ แวน ปี เฆฌู เฌาพรา ดี เบ. 5อี มูห เย, น็อห พึอม เฌาพรา แฮะ แตห เย นับ ซีคยา, เย ดี ปึอน น็อห ซืร น็อห หมาน โกบ หณึม บึง เย เฌา เยซู. 6เซ เอ หณึม บึง เฌา เยซู, ปี บอ คัม ดี ซัวะ แวน ฮูน ลัะคานา, ปี ซัะ คัม มืร, อึณ ตู มึห ดีโคว มาเซ. เอ โลว หณึม บึง เฌา เยซู บอ ร็อก อี เฮา. อาตี แฮะ อาเร ตาง.

7อาต นี เบ แฮะ หณึม ซีคยา. อึณ ปี เบ แฮะ ลาย กาแคณ กาแบลบ ซีคยา ซีคยา. อาเซ แฮะ ตัห แคร เบ, แตห เบ จู, แกวะ ฮู แตห เบ โดบ นา มูห นา หมาน. 8อึณ ตู มูห อัน เฌา อี แฮะ แดะ เบ โดบ อัน ตึอน, อี แฮะ กาซูห น็อห เบ ปาย ตี. 9ซีนัม บรัห คามูน อี แจก, อึณ แป ปีบรัห คามูน บอ ดีกลวน. ปาย ตี, ปี มาโนว กาลึบ อี แจก, อึณ บอ นับ ดี แตห เบ บอ พึง กาลึบ. 10ปี บอ ต็อห ปาย ตี มืร, โอว ยี หณึม, อัน เฌา ตู แตห เบ หณึม กาลึบ. ดูอี อี ซี วัร น็อห เบ ตี, อัน บอ มูห อาเซ, อัน ยี โลว คัม หมาบ อัน. 11อึย เบ บีนอง, เซ อึณ ยี มูห โอว อี ต็อห, แตห เบ ซัวะ แวน ฮูน ลัะคานา อีมาย, ดูก แปะ แฮะ คัม โอว ดี ดูอี อายูดา อาว มึห ดีโคว. เซ โอว กาลาง ลอง โลว โดบ ดารา, บอ ปี ปีรู เฆ ดูอี อายูดา ดี เฌา เยซู อี แฮะ คัม ดี ยัม แดง ร็อง กาแวะ, อึณ ตู มึห ดีโคว. 12อี มูห เฆ ดูอี อี มาโนว กาลึบ ดี เบ, โอว ซี แตห เฆ โบง โตต ปี มาโนว เฆ, แตห เฆ วี ซัห โดว บรีม เฆ.

13เบ บีนอง, เฌาพรา แฮะ ซี แตห เบ กอย ทังฮาง. โกบ แฮะ กอย ทังฮาง เบ ปาย ตี, เบ แกวะ แตห เบ วี โบง แคะ ปี อึง โดว บรีม เบ. แตห เบ ยี ลาย จอย, ลาย ร็อก กาเว. 14โคว, แคะ มึห ดารา ดอน ณ็อง, ซีเพา อัน แฮะ ปึอน ฮับ แคง ดารา อู ณ็อง อี ต็อห, “แตห แม ร็อก อี เฮา, แตห อึณ ปี แม ร็อก โดว แม.” 15แตห เบ ซาดีก, เซ เบ โบง ปี โดว ซัด อี ลาย กาก็อะ ลาย กากาบ, เบ ดี บอ ลึร ชึม โตต ดอน อี.

16โคว, โอว ต็อห ดี เบ, แตห เบ โบง โดบ ปี บยัะ น็อห พึอม เฌาพรา ดี เบ. เซ เบ โบง ปาย ตี, เบ ตู โบง โดบ ปี อึง น็อห บรีม เบ อี ออน ดี โบง หมาบ เซเซ. 17โคว, ปี อึง น็อห บรีม เอ ตี, อึณ ลาย กาบัห ดี ปี อึง น็อห พึอม เฌาพรา. บอ ปี อึง น็อห พึอม เฌาพรา, อึณ บอ ลาย กาบัห ดี ปี อึง น็อห บรีม เอ ตี. น็อห อา โมยว ตี, บอ ลาย กาโฆห แคง น็อห เบ, แกวะ แตห เบ โบง ปี ซี โบง เบ. 18เซ เบ ยี โบง โดบ น็อห พึอม เฌาพรา, ดารา อาว ฮู ปึอน อึบ เบ.

19ปี อึง น็อห บรีม เอ ดูอี, อึณ แฮะ ลึห ซีคยา. อึณ บอ มูห น็อห ซี ลาย ลูต ลาย ลาย, บอ น็อห กาวาต, น็อห ซี โบง อี หมึอม กาอีห หมึอม กาดาต. 20บอ น็อห ซี กรึบ อารึบ ราง, ฆาว ปวน กานัม, บอ น็อห อี ฌ็อง อี เฮา, ตู ลาย ซีเพา ดี อี, บอ หลัยะ อี เฮา, บอ น็อห รู จาว ดี อี, ลาย กาแคต ลาย กาแคณ, ลาย กาฆ็อห ลาย กายาน, บอ น็อห ลาย กาย็อห กาเรห. 21อึณ บอ มูห น็อห ซี ลาย ซีแฆะ, บอ เดียง ป็อห แตห กอ ยึต, บอ ลึบ บลอย โบง ซีนัน ซีนืง. ลอง ฌึร ตี, ดอน โมยว โอว แฮะ ฮอต ดึอม ดัม ซาดีก ดี เบ. ดอ ตี นี, โอว ปี วี กาลาง ดี เบ ปอ อู เฌณ ต็อห, ดูอี อี โบง ปาย ตี, เฆ ตู ปึอน ดี ลึบ แคง มืง ปี อึบ เฌาพรา.

22อี มูห อาฆยึร ปี ดัว น็อห พึอม เฌาพรา ดี เอ, อึณ บอ แตห เอ นับ ดี ลาย ร็อก, แตห เอ มึห น็อห ดาคึย, น็อห เยน, น็อห คัม ดี ยืน, น็อห ซี เฆฌู อี, โบง นา หมึอม ดี อี, โบง นา หมาน เซเซ, 23บอ น็อห อึณจูะ อึณจัม, น็อห อี แป ดี อึบ โดว บรีม เอ. เซ เอ มึห น็อห ฌึร ตี ดอน โมยว, อึณ ตู กาบัห ดี ดารา เฌาพรา คอ อู ณ็อง. 24ดูอี อี แฮะ แตห เฌา เยซู แบน ดา กาณา อี อึบ เฆ, เฆ แฮะ แตห น็อห บรีม เฆ ยัม แดง ร็อง กาแวะ. บอ น็อห กาวาต เฆ บอ ปี อึง น็อห บรีม ตี ดอน โมยว แฮะ ฮอต ยัม โดบ เฌา เยซู. 25โกบ แฮะ ดัว น็อห พึอม เฌาพรา อาซาก กามาย ดี เอ, แตห เอ โบง โดบ ปี อึง น็อห พึอม เฌาพรา. 26แตห เอ แวน น็อห ปีคึก ปีจา, น็อห อี ลาย ปยาต แตห อึณ แบน ดอซัะ, บอ น็อห ลาย ซีแฆะ ลาย หลัยะ.

Currently Selected:

ฆท 5: pce

Highlight

Copy

Compare