อาเอเซเคน 35
35
ลอง เฌาพรา ดัม หมาบ ดี ดูอี แคง มืง เอโดม
1เฌาพรา ปี วี กาลาง โฆรห ดี โอว ต็อห, 2“อึย ฆอน ดูอี, แตห แม กาลาง โฆรห เฌาพรา อี ดัม หมาบ ดี เฆ ดูอี มืง เอโดม. 3แตห แม กาลาง ดี เฆ ต็อห, ‘โอว เฌาพรา อี อึบ โตต ดอน โมยว แฮะ กาลาง ปาย นี. อึย เบ อี กอย ดี นอน เซอี, โอว แฮะ แบน รันซู เบ. โอว ดี โบง แตห โดง กอย เบ เยน, แตห อึณ ราม ลึร โตต. 4โอว ดี โบง แตห โดง กอย เบ ดอน มืง กาปยาต ลึร โตต. มืง เบ ดี บอ แบน โดง เยน โดง ง็อง ดูอี. เซ ฮี ปาย ตี เบ ดี บอ นับ, โอว มูห เฌาพรา.
5โคว, เบ แฮะ ดึอม แบน รันซู ดูอี อาโมยว อีซาเรลัะ. เบ แฮะ โบง แตห ดูอี เฆ ยัม ดี มาปัวะ ลาง ดอ แฮะ คัม เฆ ดูก ตาง บอ ดอ แฮะ คัม เฆ อี ดูก อี หณาบ หลึอม คา อาต. 6โกบ แฮะ โบง เบ ปาย ตี โอว อี มูห เฌาพรา อี อึบ โตต ดอน โมยว, โอว ดี แตห เบ ยัม อาคัร หมาน. โกบ แฮะ ง็อห ยัม เบ อาซาก อี เฮา บอ เบ โลว คัม อี เฮา วี ง็อห ยัม เบ. อึณ ปี ปี โลว คัม เบ โกบ หมาบ ง็อห ยัม เบ อาซาก อี เฮา ตี, อึณ ดี วี คูงครัห โดบ ดี ปัน เบ. 7โอว ดี โบง นอน เซอี แตห อึณ แบน โดง ลึร โดง ราม, แตห ดูอี กอ เยน กอ ง็อง. โอว ตู แตห ดูอี กาโลห วีว กาโลห เวณ โดง ตี. 8โอว ดี แตห โดว ยัม ดูอี เฆ ตี กอ กาลัต แดง นอน ตี บอ แตห เฆ กอย กาลัต โดบ ดีลัยะ นอน เฆ ตี. 9โอว ดี โบง แตห มืง เบ แบน โดง เยน โดง ง็อง ดูอี, แกวะ แตห อึณ ซี มึห ดูอี คอ อู วี แคง มืง เบ ตี. ปาย ตี เบ ดี บอ นับ, โอว มูห เฌาพรา.’
10เบ มืร แฮะ ต็อห, ‘ดูอี อีซาเรลัะ บอ ดูอี อายูดา อา โมยว ตี ดี แบน มืง ปี อึบ เอ. เฌาพรา ปี บอ แฮะ มูห เฌาพรา ปี กรึบ เฆ มืร, เอ ปึอน ดี ดึห โตต.’” 11ปาย ตี เฌาพรา อี อึบ โตต ดอน โมยว ปี วี ต็อห, “โอว ต็อห อาคัร ดี เบ, โอว ดี วี โบง เวียะ ดี เบ โดบ ปี ปาย เบ ดี รู ดี จาว บอ ปี ปาย เบ ดี ฌ็อง เฆ ดูอี ปี อึบ โอว. อึณ แตห เฆ กอ วี นับ, โอว มูห อี ดัม หมาบ ดี เบ โกบ ปี โบง เบ ดี เฆ ดูอี ปี อึบ โอว. 12ปัน ตี เบ ดี บอ นับ, โอว มูห เฌาพรา อี แฮะ โทม โฆรห ปี กาลาง เบ ดอน โมยว.” เบ มืร แฮะ แนนัะ ต็อห, “นอน อีซารลัะ ดี บอ ราม แบน โดง เยน โดง ง็อง ดูอี. โคว, เฌาพรา แฮะ แตห เย ปึอน ดี โบง ปาย ตี.” 13โอว มืร แฮะ ยึร โฆรห อี ตู หมึอม ปี กาลาง เบ บอ โฆรห ปี วี อืบ เบ โดว บรีม เบ. เบ มืร แฮะ กาลาง โฆรห อี ลาย กาบัห ดี โอว. 14เฌาพรา อี อึบ โตต ดอน โมยว แฮะ ต็อห, “โอว ดี โบง แตห มืง เบ วี เยน วี ง็อง กาเซา. แตห ดูอี แดง กาดาย นี โคย โกบ แฮะ ลึร ชึม เบ. 15โกบ แฮะ โคย เบ ดอ แฮะ ลึร ชึม ดูอี อีซาเรลัะ กาดาย อี มูห คาฆูน เฆ, โอว ดี โบง ปาย ตี ดี เบ. อึย เบ อี กอย ดี นอน เซอี บอ เบ อี กอย แคง มืง เอโดม บอ มืง, โดง กอย เบ ดี กาปยาต ลึร โตต. ปาย ตี เบ ดี บอ นับ, โอว มูห เฌาพรา.”
Currently Selected:
อาเอเซเคน 35: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
