อาเอเซเคน 14
14
ลอง เฌาพรา ดัม หมาบ ดี ดูอี อี กรึบ อารึบ ราง
1เฆ ดา ตาง อี อึบ อี แยต ดูอี อีซาเรลัะ เฆ บอ ตัห กอย นา อาต โอว กามวน ดี โอว. 2ดอ อัน ตี เฌาพรา วี กาลาง โฆรห ดี โอว ต็อห, 3“อึย ฆอน ดูอี, ดูอี เฆ ตี เฆ แฮะ ฮอต แตห อารึบ ราง อึบ น็อห พึอม เฆ. อารึบ ราง ตี แฮะ ฮอต กาซูห น็อห เฆ, แตห เฆ โบง อี ตู หมึอม. อาว กาอาบ โอว เวียะ โฆรห ปี ดีหมอด เฆ ดี โอว. 4โกบ อึณ ปาย ตี แตห แม กาลาง ดี เฆ ต็อห, ‘เฌาพรา อี อึบ โตต ดอน โมยว แฮะ กาลาง ปาย นี. เฆ ดูอี อีซาเรลัะ ดอน อี อี แฮะ แตห อารึบ ราง อึบ น็อห พึอม เฆ, อี แฮะ แตห อารึบ เฆ ตี กาซูห แตห เฆ โบง นา ตู หมึอม, เซ เฆ ดี วี ตัห ดีหมอด ดา อี บยาน โฆรห เฌาพรา, โอว เฌาพรา ดี วี เวียะ ดี เฆ, แตห อึณ กาดาน โดบ อารึบ ราง เฆ ตี. 5โคว, อารึบ ราง ตี แฮะ แยต ดูอี อีซาเรลัะ, แตห เฆ ลาย กาฆ็อห กายาน โต็ง ดี โอว. มาแล, โอว ยี วี แตห โฆรห ปี ดี เวียะ โอว ตี วี แป ดี อึบ น็อห เฆ.’
6โกบ อึณ ปาย ตี แตห แม กาลาง ดี ดูอี อีซาเรลัะ ต็อห, ‘เฌาพรา อี อึบ โตต ดอน โมยว แฮะ ต็อห, ดอ ตี นี แตห เบ โหลห หมาบ เบ. แตห เบ แวน อารึบ ราง อี หมึอม กาอีห กาเซา, แวน บอ อี ตู หมึอม ดอน โมยว.
7บอ มูห ดูอี อีซาเรลัะ, บอ มูห ดูอี อาโมยว เฮา อาว ต็อห, อี กอย แคง มืง อีซาเรลัะ, เฆ อี แฮะ วัห โอว, วี ฮาว กรึบ อารึบ ราง, ปี วี ตัห ดีหมอด ดี ดา อี บยาน โฆรห เฌาพรา, โอว เฌาพรา ดี กาลาง ดี ดูอี วี ตี. 8โอว ดี โบง กาบัห ดี อัน, แตห อัน แบน ปี แนนัะ อี เฮา. แฮะ ฮอต, โอว ดี ดึห แวน อัน กาแต เฆ ดูอี ปี อึบ โอว. ปัน อัน ตี เบ ดี บอ นับ, โอว มูห เฌาพรา.
9เซ ดา อี บยาน โฆรห เฌาพรา โดบ ปี กาโลว อี บอ บยาน กาลึบ บอ บยาน อี ตู มูห โฆรห เฌาพรา, โอว เฌาพรา แฮะ แตห ดา อี บยาน โฆรห เฌาพรา กาลาง อี ตู หมาน ฌึร ตี. ปาย ตี โอว ดี แตห อัน ชึม, ตู แตห อัน กอย กาแต เฆ ดูอี ปี อึบ โอว. 10บอ เฆ ดา อี บยาน โฆรห เฌาพรา บอ เฆ อี ตัห ดีหมอด เฆ, เฆ ดี โลว คัม หมาบ เฆ. 11วาย นี เฆ ดูอี อีซาเรลัะ อาว ฮู วัห ฮู แวน โอว, ตู แตห หมาบ ปี กาลึบ เฆ ตี วี โบง แตห เฆ กาดาต. เฆ ดี วี แบน ดูอี ปี อึบ โอว. โอว ดี บอ แบน เฌาพรา ปี กรึบ เฆ. เฌาพรา อี อึบ โตต ดอน โมยว แฮะ กาลาง อูน ปาย ตี.’”
12เฌาพรา ปี วี กาลาง โฆรห ดี โอว ต็อห, 13“อึย ฆอน ดูอี, เซ ดูอี แคง มืง อู มืง โบง หมาบ บอ ตู โบง นา ซืร นา หมาน ดี โอว, โอว ดี บอ ปยาต แวน โหงว ดีฆาว ดี ดูอี แคง มืง ตี. โอว ดี โบง แตห อึณ มึห อาเพ อาเร อี ดี เอต ปี ดี โฮม, แตห บอ ดูอี บอ โดว ซัดดาวา ยัม. 14เซ อาโนว, อาดาเนลัะ บอ อาโยวบา กอย แคง มืง ตี, โกบ มึห เฆ น็อห ซืร น็อห หมาน, เฆ ดี บอ ลอด ยัม บอ ปึอน คยอด มี อาซาก โดว บรีม เฆ. เฆ ยี ตู ปึอน จอย อี เฮา. เฌาพรา อี อึบ โตต ดอน โมยว แฮะ กาลาง ปาย ตี.
15เซ อาว ปาย ตี มืร, เซ โอว ดี จัร มาโดว แปร ฮาย ตัห ก็อะ ยัม โตต ดูอี แตห มืง ตี กอ แบน มืง ราม, แบน โดง ง็อง โดง เยน ดูอี, 16โอว เฌาพรา อี อึบ โตต ดอน โมยว, โอว กาลาง โฆรห หมาน อาคาคัร, อึณ ดี แบน ปาย ตี. เซ เฆ ดูอี โอย วี ตี ปี บอ แฮะ กอย ดี ตี มืร, เฆ ยี ตู ปึอน คยอด อาซาก ฆอน อีบึณ บอ ฆอน อีมาย เฆ. เฆ ปึอน คยอด มี อาซาก โดว บรีม เฆ. มืง ตี, อึณ ยี แบน โดง เยน โดง ง็อง ดูอี อาคัร หมาน.
17เซ อาว ปาย ตี มืร, เซ โอว ดี จัร ดา ซึก ตัห แคง มืง ตี แตห เฆ จัร ครึง กาโฆห เฆ บอ ปยาต โตต ดูอี บอ โดว ซัดดาวา แคง มืง ตี, 18โอว เฌาพรา อี อึบ โตต ดอน โมยว, โอว ต็อห อาคาคัร. เซ ดูอี โอย วี ตึอน แฮะ กอย โดง ตี มืร, เฆ ยี ตู ปึอน คยอด อาซาก ฆอน อีบึณ บอ ฆอน อีมาย เฆ. เฆ ปึอน คยอด มี อาซาก โดว บรีม เฆ. 19เซ อาว ปาย ตี มืร, เซ โอว ดี จัร อาเพ อาเร อี แบน เซา รอฆา, แตห อึณ ตัห แคง มืง ตี, โอว มืร ดี ปีรู กาเซา โอว, แตห บอ ดูอี บอ โดว ซัดดาวา ยัม กืน กาเซา. 20เซ อาโนว บอ อาดาเนลัะ บอ อาโยวบา แฮะ กอย ดี มืง ตี, โอว อี มูห เฌาพรา อี อึบ โตต ดอน โมยว, โอว ต็อห อาคาคัร ดี เบ, เฆ ตู ปึอน คยอด อาซาก ฆอน อีบึณ บอ ฆอน อีมาย เฆ. เฆ ปึอน คยอด มี อาซาก โดว บรีม เฆ โกบ มึห เฆ น็อห ซืร น็อห หมาน.” เฌาพรา อี อึบ โตต ดอน โมยว แฮะ กาลาง ปาย ตี.
21ปาย ตี เฌาพรา อี อึบ โตต ดอน โมยว ปี วี ต็อห, “อึณ ดี แว ดูก กาเซา ปัน ดี จัร โอว อาเพ อาเร พวน โมยว ดี ตัห แคง มืง เยรูซาแลม. อึณ บอ มูห อาเพ อาเร ดี ดา ซึก, อาเพ อาเร เอต ปี ดี โฮม, อาเพ อาเร ดี มาโดว แปร ฮาย, อาเพ อาเร ดี เซา รอฆา, อาเพ อาเร ดี บอ ปยาต บอ ดูอี บอ โดว ซัดดาวา. 22อึณ ยี ดี มึห ดูอี มัง อี อี ลอด ยัม, เฆ มูห ฆอน อีบึณ เฆ ฆอน อีมาย อี ตัห กอย ดี เบ. เบ ดี บอ ยึร ปี โบง เฆ. เบ ดี บอ วี มึห น็อห ดาคึย, อาว ฮู กลึร โกบ แฮะ ยึร เบ โอว ดัม หมาบ ดี มืง เยรูซาแลม. ดูก ปี โลว คัม เฆ ดอน โมยว, อึณ มูห โอว อี แฮะ ดัว. 23ปาย ตี เบ ดี บอ นับ บอ ยึร บอ ลอง ปี ซูงพยาด โอว, อึณ แฮะ มูห แฮะ หมึอม โตต ดอน โมยว. อาว มึห มาเซ อี ตู มึห ดีโคว.” เฌาพรา อี อึบ โตต ดอน โมยว แฮะ กาลาง ปาย ตี.
Currently Selected:
อาเอเซเคน 14: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
