เลห 18
18
ลอง อาเยทาโรว ฮาว ฌัม โดง กอย อาโมวแซ
1อึณ ยี มึห อาเยทาโรว ตึอน, อัน มูห บึร อาโมวแซ. อัน บอ มูห ดูอี หลู ดี เฌาพรา แคง มืง มีดีอาน. อัน แฮะ โทม ลอง แบน โมยว แบน โมยว ปี โบง เฌาพรา ดี อาโมวแซ บอ ดี เฆ ดูอี อีซาเรลัะ. อัน มืร แฮะ ยึร ซาดาง ลอง เฌาพรา แตห เฆ ดูอี อีซาเรลัะ เลห แคง มืง แอฆึบ.
2คา อาต อาโมวแซ แฮะ ดึอม ตึย นาง ซีโปวรา อี มูห อีบึณ อัน บอ ฆอน อัน อา วี, แตห เฆ วี เวณ โดง กอย บรีม อีบึณ ตึอน. บึร อาโมวแซ วี แตห ฆอน อีบึณ อัน วี กอย แคง กาง อัน. 3ลอง ฆอน ฆีณ อัน อาโมวแซ แฮะ ดึอม ต็อห, “โอว แฮะ แบน แคต แคง มืง ดูอี อาโมยว เฮา.” โคว อัน ตี, อัน แฮะ ดึอม แตห ฆอน ตี จืร อาเฆโซม.#18:3 ‘แคต แคง มืง ดูอี อาโมยว เฮา’ แคง โฆรห แฮแบร วี เลห ‘เฆโซม’ 4วาย อัน ตี อัน วี มึห ฆอน ปอ อู วี. อัน ต็อห, “เฌาพรา ปี กรึบ ฆูณ โอว, อัน แฮะ จอย โอว, แกวะ แตห โอว ยัม ดี มาปัวะ ลาง คูนดีคัม พาโรว.” โคว, อัน แตห ฆอน ตี จืร อาเอลีเอฌา.#18:4 ‘เฌาพรา จอย โอว’ แคง โฆรห แฮแบร, อึณ เลห ‘อาเอลีเอฌา’
5วาย อัน ตี อาโมวแซ แฮะ ฮอต ตึย เฆ ดูอี อีซาเรลัะ เลห แคง มืง แอฆึบ, อาเยทาโรว วี ตัห ฌัม โดง กอย อัน. บอ อีบึณ อาโมวแซ บอ ฆอน อัน อา วี ตึอน แฮะ ฮาว โดบ อาเยทาโรว. เฆ กาตูณ อาโมวแซ ดอ คยัะ เฆ ดูอี อีซาเรลัะ แคง โดง กาฮ็อห อี กอย กาตัด นอน เฌาพรา ตึอน. 6อาเยทาโรว วี ตึย ดูอี อู วี, แตห อัน ฮาว กาลาง ดี อาโมวแซ ต็อห, “อาเยทาโรว อี มูห บึร แม ตึอน, อัน แฮะ ตัห ตึย อีบึณ แม บอ ฆอน แม, แตห เฆ ตัห ฌัม โดง กอย แม.”
7ปัน ตี อาโมวแซ เลห ฮาว รวห บึร อัน, โฆม ดี อาต อัน บอ อูห อัน. แฮะ ฮอต รวห, เฆ วี ลึบ แคง ทึบ บีก อาโมวแซ. 8อาโมวแซ กาลาง ดี บึร อัน ลอง ปี โบง เฌาพรา ดี คูนดีคัม พาโรว บอ ดี เฆ ดูอี แอฆึบ. อัน วี แค ลอง ปี ปาย เฌาพรา ดี จอย เฆ ดูอี อีซาเรลัะ. อัน บอ กาลาง ลอง ดูก แบน โมยว แบน โมยว ปี กาดูห เฆ ดอ ฮาว เฆ โดบ อึณเตณ. อัน มืร แค ลอง ปี จอย เฌาพรา ดอน โมยว.
9อาเยทาโรว วี โทม ดอน โมยว ฌึร ตี, อึณ วี แบน น็อห ดาคึย ดี อัน. 10อัน วี ต็อห, “โอว อืบ เฌาพรา. อัน แฮะ จอย บอ แม บอ เฆ ดูอี แม, แกวะ ฮู แตห คูนดีคัม พาโรว บอ เฆ ดูอี แอฆึบ ปึอน ดี วี อึบ เบ. 11โอว มืร แฮะ นับ ดอ ตี นี, เฌาพรา แฮะ ตาง หลึอม เฆ เฌา ปี กรึบ ดูอี เฮา. เฆ ดูอี อี ดึอม ปีคึก น็อห เฆ, โบง นา ตู หมึอม ดี ดูอี อีซาเรลัะ, เฆ แฮะ กาดูห เฌาพรา ดัม หมาบ ดี เฆ ดอน อี.” 12วาย อัน ตี อาเยทาโรว หลู โดว ซัดดาวา ดี เฌาพรา. บอ ปี ดี หลู อี โดะ ดี เงา บอ ปี ดี หลู แบน โมยว แบน โมยว, อัน วี หลู ดี เฌาพรา. บอ อาโรน บอ เฆ ดา ตาง แคง มืง อีซาเรลัะ, เฆ บอกาเฆลียด ตัห โฮม รึม โดบ บึร อาโมวแซ ตึอน, แตห อึณ แบน บลอย บอด, บลอย ปี โฮม เฆ ดี อาต เฌาพรา.
ลอง เฆ ดา ตาง อี ซูงพยาด อามู อี
13ปา แคหณา, อาโมวแซ ตูต โดง กอย อัน, ซูงพยาด อามู เฆ ดูอี อีซาเรลัะ. อู ซีณ ซีณวัห เจว กอ ฌัม แคง หมึร, เฆ ดูอี กืน แฮะ ตัห กาลาง ดี อัน ลอง ปี ลาย กาย็อง เฆ, แตห อัน ซูงพยาด อามู เฆ. 14บึร อาโมวแซ ยี ยึร ปี โบง อัน ดอน โมยว, อัน วี กาลาง ดี อาโมวแซ, “มาเซ ปี โบง แม ดี ดูอี เฆ นี? เหมา อึณปาย ปี กอย แม อู วี, ซูงพยาด อามู เฆ ดอ กอย กืน เฆ นี? เฆ บอ หน็อะ โดง วัน กอ ฌัม แคง หมึร. เหมา อึณ ปาย ปี โบง แม อู วี ฆาน ฌึร ตี?”
15อาโมวแซ วี ต็อห, “เฆ ดูอี นี, เฆ ตัห ฌัม โดง กอย โอว โคว, เฆ ซี แตห โอว กาลาง ดี เฆ มาเซ ปี ดัม เฌาพรา เฆ โบง. 16เซ เฆ ตู ลาย โพรม, เฆ วี ตัห กาลาง ลอง อัน ตี, แตห โอว โทม. โอว วี ซูงพยาด อามู เฆ. โอว วี กาลาง ดี เฆ, มาเซ ปี เบลห อูน ดารา เฌาพรา ลอง อัน ตี. โอว มืร กาลาง มาเซ ปี ดัม เฌาพรา เฆ โบง.”
17บึร อาโมวแซ วี ต็อห, “ปี โบง แม นี, อึณ ตู หมึอม, ตู กยัะ. 18เซ แม โบง ฮาว ปาย ตี บอ แม บอ เฆ ดูอี กืน, เบ ตู คัม. เบ ดี แกร ดี นูน กาเซา. ฆาน ปี โบง แม, แม อู วี ตู แป ดี โบง. 19แตห แม โทม โฆรห โอว ดอ ตี นี. โอว ดี กาลาง ดี แม, เหมา แม ดี ปาย ดี โบง แตห แม ออง. แตห บอ เฌาพรา จอย แม. แม โลว แบน ดูอี อี กาลาง อามู ดูอี ดี เฌาพรา. 20แม บอ โลว มาโนว ดูอี ลอง ปี กาลาง เฌาพรา ดี เฆ, ปี ดัม ดารา เฌาพรา เฆ โบง. แม บอ โลว แตห เฆ ดูอี นับ ปี โลว เฆ โบง แตห อึณ ล็อะ น็อห เฌาพรา. 21แม ยี โลว ร็อห ดูอี อี ปึอน โบง ฆาน แม. ดูอี ปี ดี ร็อห แม ตี, เฆ โลว นับ ดี ซูงพยาด ปี โบง ดูอี อี ตู หมาน ดอน โมยว. แม โลว ร็อห ดูอี อี โดบ ซีคยา เฌาพรา, ดูอี อี มึห น็อห ซืร, ตู หมาณ รึอน ดี อี เฮา. ดูอี ฌึร ตี, แม โลว จัร เฆ แบน ดา กาณา อี อึบ ดูอี แบน พึง แบน พึง. มัง อี โลว อึบ ดูอี อู แหรณ, มัง อี โลว อึบ ดูอี อู มาย็อห, พัน ฆึร, บอ ฆึร วี. 22แตห แม แตห เฆ แบน ดา ตาง อี ซูงพยาด อามู เฆ ดูอี ปี อึบ เฆ เซเซ. เซ อึณ ยี มึห อามู อี หณาบ หลึอม ปี แป เฆ, แตห เฆ วี กาลาง ลอง อัน ตี ดี แม. อามู ดอน โมยว, อี ตู หณาบ ดี ซูงพยาด, แตห เฆ ดา ตาง ซูงพยาด ราง เฆ. ปาย ตี เฆ ดูอี เฮา ปึอน ดี จอย แม, แกวะ แตห ฆาน แม กืน กาเซา. 23เซ ปี ต็อห โอว นี บอ ล็อะ น็อห เฌาพรา, เซ แม บอ โบง ปาย ตี แม บอ ดี แป ดี โบง โตต ปี โลว แม โบง. บอ เฆ ดูอี อี ตัห ดี แม, เฆ ดี บอ มึห น็อห ดาคึย, วี เวณ โดง กอย เฆ.”
24อัน แฮะ ฮอต กาลาง ฌึร ตี ดอน โมยว, อาโมวแซ วี โทม โดบ โฆรห บึร อัน ตี. อัน วี โบง โตต ดอน โมยว ปี มาโนว บึร อัน. 25อัน วี ยอด เฆ ดูอี อีซาเรลัะ บอกาเฆลียด, วี ร็อห ดูอี อี ปึอน ซูงพยาด อามู อี, แตห เฆ แบน ดา ตาง, แตห เฆ แบน ดา กาณา อี อึบ ดูอี แบน พึง แบน พึง. มัง อี อึบ อู แหรณ, อู มาย็อห, พัน ฆึร บอ ฆึร วี. 26เซเซ เฆ วี ซูงพยาด อามู ดอน โมยว ดี เฆ ดูอี ปี อึบ เฆ. เซ อึณ วี มึห อามู อี หณาบ, เฆ วี ฮาว กาลาง ดี อาโมวแซ ลอง อัน ตี. อามู อี ตู หณาบ, เฆ ยี ซูงพยาด ราง เฆ.
27วาย อัน ตี อาโมวแซ วี ควาง บึร อัน ฮาว, แตห อัน วี วีว โดง กอย บรีม อัน. บึร อัน มืร วี วีว มืง บรีม อัน.
Currently Selected:
เลห 18: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
