อพ 6

1เบ ฆอน, โกบ หณึม เบ อัน เฌา, เบ โลว โทม โดบ โฆรห ปี กาลาง ฆูณ มา เบ. โคว, แฮะ กาอาบ เบ โบง ปาย ตี. 2เฌาพรา แฮะ ต็อห, “แตห เบ โรวเซ ฆูณ มา เบ.” ดอ ดัว เฌาพรา ดารา แบน ณ็อง แบน ณ็อง, อึณ มูห ณ็อง ตี ปี ดัว โดบ อัน กาดีก ซัดฌา. 3กาดีก ซัดฌา ตี ต็อห, “แตห เบ ปึอน ดี กอย ซีคยา บอ กอย เหลณ แคง มืง ปี ดัว เฌาพรา ดี เบ.”

4อี มูห เบ ฆูณ, แกวะ โบง แตห อึณ แบน น็อห ลึร ดี ฆอน เบ. แตห เบ ยี ลึมลา ยอด ฆอน เบ, แตห เบ บอ มาโนว บอ กาซูห เฆ โบง นา บอด, แตห อึณ ปี ปี อึง อัน เฌา.

5อาเซ แฮะ แบน หมาย อี, อัน โลว โทม โฆรห ดา กาณา อัน. เบ โลว มึห น็อห ซืร บอ โรวเซ ดา กาณา เบ, แตห อึณ ปี เบ โทม โฆรห เฌา เยซู. 6แกวะ แตห เบ ณึงราง ดี โบง นา หมึอม ดอ ยึร ดา กาณา ปี โบง เบ. แตห น็อห เบ ซืร ดี โบง ปี อึง เฌาพรา. แตห อึณ ปี เบ มูห หมาย เฌา เยซู. 7แตห เบ ฌอนโฌม ดี โบง ฆาน เบ. แกวะ มาด อึณ มูห ฆาน ดูอี, แตห เบ มาด อึณ มูห ฆาน เฌาพรา. 8ปาย ตี เบ บอ โลว โหลห เซเซ, แคะ ปี โบง เบ นา หมึอม, อัน เฌา ดี วี ดัว ดี เบ นา หมึอม แคะ ตี. บอ ดูอี อี แบน หมาย อี, บอ ดูอี อี กอย ทังฮาง, เฆ ดอน อี ดี ปึอน แคะ ตี.

9เบ อี มูห ดา กาณา อี, เบ บอ โลว โบง นา หมึอม ดี เฆ ดูอี ปี อึบ เบ, แกวะ แตห เบ คาหนาบ เฆ. เบ โลว โหลห, ดา กาณา เบ บอ ดา กาณา เฆ มูห อู กาดัง อี กอย แคง ฆางหราว. เซ อัน ดี ดัม หมาบ ดี อี, อัน ตู ต็อห ดูอี อู วี แฮะ บอด หลึอม ดูอี ปอ อู วี.

10แฮะ ฮอต ปัน ตี แตห น็อห เบ มึห โปลม เซเซ โกบ หณึม เบ เฌาพรา. เฌาพรา ดี ดัว ปวน อัน ดี เบ, แตห อึณ แบน โปลม ดี น็อห เบ. 11เฌาพรา แฮะ ดัว ดี เบ แบน โมยว แบน โมยว อี ปี ครึง ตา ดา ซึก. ครึง ตี เบ โลว ชึบ, แตห อึณ เฌะฌูง, แกวะ แตห อึณ ฌูด มาเซ. ปาย ตี, เบ ปึอน ดี แร นา ตู หมึอม ปี ซี โบง โบว กานัม ดี เบ. 12โคว, อาว มูห เอ โลว กาโฆห ดี ดูอี, เอ โลว กาโฆห ดี โบว กานัม บอ กานัม อี อึบ กาดาย อี ฮาย กาเซา, อี กอย แคง อับ ว็อง แคง เบลณ. 13โคว อัน ตี เบ โลว ดึห โตต ดอน โมยว ปี ดัว เฌาพรา ดี เอ, อี ปี ครึง ตา ดา ซึก. เซ เบ ดึห ตา โตต ฌึร ตี, เบ ดี บอ แป โตต ดอน โมยว. เซ ฮี ฌัม ซีแง ตู หมึอม, เบ ดี บอ ปึอน ดี แร รันซู เบ. เบ ดี บอ แป อัน, แกวะ แตห อัน แป เบ. 14โคว อัน ตี เบ โลว โหลห เซเซ นา หมาน ลอง เฌาพรา, แตห อึณ ปี ดา ซึก ชึบ แซะ ดี ณอย อัน. แคะ ปี โบง เบ โลว เลห น็อห ซืร, แตห อึณ ฆ็อง บาง น็อห เบ ปี ซีโตว ฮีน ปี ชึบ ดา ซึก แป ดี ฆ็อง โดว อัน. 15เบ บอ โลว อึณปราย อูน น็อห เบ, แตห เบ โพรม เซเซ, แตห เบ ปึอน ดี กาลาง ลอง โฆรห เฌาพรา อี แตห น็อห ดูอี ดาคึย, อาว ฮู แบน รันซู เฌาพรา. เซ เบ โบง ปาย ตี, อึณ ปี ดา ซึก แฮะ ชึบ คูดีณ อัน. 16เบ บอ โลว หณึม ซีคยา เฌาพรา, แตห อึณ ปี ดา ซึก โฆ็ง มัง ฆ็อง. เซ รันซู บัณ บลา อี มึห เงา, มัง ฆ็อง ตี นับ ดี บยัด นับ ดี แร บลา เงา ตี. 17เบ บอ โลว นับ ซีคยา ลอง เฌาพรา แฮะ คยอด เบ. อึณ ปี ดา ซึก แฮะ ชึบ มาฆีณ ฮีน อัน. เบ บอ โลว นับ ซีคยา โฆรห เฌาพรา อี ปี มาปัวะ ลาง ปี ตา ดา ซึก. อึณ ยี มูห น็อห พึอม เฌาพรา อี แตห เบ นับ ซีคยา โฆรห เฌาพรา. 18ดอน เฌณ เซ เบ ซาคึร ดี เฌาพรา บอ หมาณ มาเซ ดี อัน, เบ โลว ตา โตต ฌึร ตี ดอน โมยว. อึณ มูห น็อห พึอม เฌาพรา อี แตห เบ ซาคึร ปาย ตี. เบ บอ โลว ซาดีก, บัร เซเซ, ซาคึร ดาง ดอน อี, อี หณึม เฌา เยซู.

19แตห เบ ซาคึร บอ ดาง โอว. ซาคึร, แตห โอว ปึอน ดี กาลาง ซืร โฆรห เฌาพรา ดี อี, แกวะ แตห โอว โยว, แตห โอว ปึอน ดี กาลาง ดี ดูอี ปี หณัม นับ เฆ ลอง โฆรห เฌาพรา อี แตห ดูอี แบน น็อห ดาคึย. 20โกบ กาลาง โอว โฆรห เฌาพรา, โอว กอย แคง กาปึม. แตห เบ ซาคึร ดาง โอว, แตห โอว ยัะ ดี กาลาง ดี อี ปี กาอาบ โอว กาลาง.

21อึณ ยี มูห อาทูคีด, อัน มูห วา ปี ร็อก โอว โกบ หณึม อัน เฌา เยซู. อัน บอ จอย โอว เซเซ. อัน ดี วี กาลาง โตต ดอน โมยว ดี เบ ลอง โอว. อัน ดี แตห เบ นับ ปี ปาย โอว ดี กอย ดอ ตี นี. 22โอว แฮะ ตึย อัน, แตห อัน ฮาว ฌัม โดง กอย เบ, แตห อัน แค ดี เบ ลอง โอว, แตห เบ นับ โตต ดอน โมยว, แตห อึณ แบน น็อห โปลม ดี เบ.

23แตห เฌาพรา ดัว น็อห ฆัด เฆียด ดี เบ อี มูห บีนอง เย. แตห เบ บอ ลาย ร็อก โกบ หณึม เบ เฌาพรา อี มูห ฆูณ เอ. แตห เบ ลาย ร็อก โกบ หณึม เบ บอ เฌา เยซู อี มูห ดา กาณา เอ. 24แตห เฌาพรา เฆฌู เบ ดอน อี, อี ร็อก เฌา เยซู, อี มึห น็อห ซืร, น็อห หมาน. ซาตู.

แคะ ตี โอว อาปอลู แฮะ แดม ดี เบ.

Currently Selected:

อพ 6: pce

Highlight

Copy

Compare