อพ 3

1โคว อัน ตี โอว อาปอลู กอย แคง กาปึม. โอว กอย แคง กาปึม ตี โกบ กาลาง โอว ลอง เฌา เยซู ดี เบ ดูอี อี ตู มูห อาโมยว ยูดา.

2โอว ทาง, เบ แฮะ ดึอม ยึร ลอง เฌาพรา แฮะ ดัว โอว โบง ฆาน อัน, แตห เบ นับ ลอง ปี เฆฌู เฌาพรา. 3เฌาพรา แฮะ บยัะ ดี โอว ปี ตู ดึอม บยัะ อัน ดี อี เฮา, แตห โอว นับ ซีคยา ลอง อัน ตี. โอว มืร แฮะ ดึอม แดม อี แจก ลอง อัน ตี. 4เซ เบ วี ตีห ปี แดม โอว ตี, เบ ดี บอ นับ, อึณ มูห โอว, อี แฮะ นับ ปี ตู ดึอม นับ อี ลอง อัน เฌา อี คยอด เอ. 5ดอ มูห โจว อาต นี, เฌาพรา ตู ดึอม แตห ดูอี นับ ลอง อัน ตี. ดอ ตี นี, น็อห พึอม เฌาพรา แยะ แฮะ บยัะ ดี เฆ ดูอี อี บยาน โฆรห เฌาพรา บอ ดี เฆ ดูอี ปี ร็อห ปี ตึย เฌา เยซู, แตห เฆ ดูอี บอด ตี นับ ลอง อัน ตี. 6ปี บยัะ เฌาพรา ดี เฆ ดูอี ตี, อึณ มูห ลอง เฆ ดูอี อี ตู มูห อาโมยว ยูดา. บอ เฆ ดูอี อาโมยว เฮา, บอ เฆ ดูอี อาโมยว ยูดา ดี ปึอน โตต ดอน โมยว ปี ดัว เฌาพรา ดี อี. เฆ ดี กอย รึม แคง พึง อู พึง. โกบ หณึม เฆ เฌา เยซู, เฆ ดี บอ ปึอน โตต ปี ดึอม ต็อห เฌาพรา ดี ดัว. เฌาพรา ดี ดัว โตต ดอน โมยว ดี เฆ ดูอี ฌึร ตี, เซ เฆ หณึม โฆรห เฌาพรา อี แตห ดูอี แบน น็อห ดาคึย. 7เฌาพรา แฮะ วี เฆฌู โอว, แตห โอว แบน แดเจณ อัน, กาลาง โฆรห เฌาพรา อี แตห น็อห ดูอี ดาคึย. อึณ ปี เฌาพรา แฮะ ดัว ลักซอง ดี โอว, แตห ปวน อัน กอย แคง น็อห โอว ดอ โบง โอว ฆาน อัน. 8เฌาพรา แฮะ เฆฌู โอว แตห โอว ปึอน ดี กาลาง ดี เฆ ดูอี อี ตู มูห อาโมยว ยูดา, แตห เฆ นับ โฆรห เฌาพรา อี แตห น็อห ดูอี ดาคึย. อึณ มูห โฆรห ลอง เฌา เยซู อี นับ ดี ม็องการา ดัว แบน โมยว แบน โมยว. อาว ปึอน กาลาง แคะ กืน ปี ดี ม็องการา ดัว อัน. อึณ ยี มูห โอว, โอว แฮะ แบน ดูอี อี เตียม หลึอม ดอน อี, อี หณึม เฌา เยซู. เฌาพรา แฮะ แตห โอว กาลาง ลอง อัน ตี. 9เฌาพรา อี แฮะ พาน เบลห โตต ดอน โมยว, อัน แตห โอว กาลาง ดี อี ดอน อี ลอง ปี คราม อัน เฌา ดี โบง. อู ซีณ ดอ มึอน, เฌาพรา แฮะ เครียง อูน ลอง อัน ตี แคง น็อห อัน, ตู ดึอม แตห ดูอี นับ. 10เฌาพรา ยี คราม ดี แตห อี นับ ลอง อัน ตี ดอ ตี นี. อัน วี แตห ดอน อี ยอด พึง เฌา เยซู, แตห เฆ กอ นับ ลอง อางยาน อัน อี นับ โตต ดอน โมยว. บอ เฆ อี มึห ปวน แคง เบลณ โลว ยอด พึง เฌา เยซู, แตห บอ เฆ นับ แคะ กืน แคะ บอด อางยาน เฌาพรา. 11ปาย ตี เฌาพรา ดี โบง ปี ดึอม คราม อัน ดี โบง ซีณ ดอ โฆว อัน. อัน แตห เฌา เยซู อี มูห ดา กาณา เอ โบง ฌึร ตี ดอน โมยว. 12โกบ หณึม บึง เอ เฌา เยซู, เอ ปึอน ดี ซาคึร ดี เฌาพรา, ปึอน ดี หณึม บึง บอ อัน, อาว ฮู โลว โยว อัน. 13โคว อัน ตี โอว บอ จัร เบ, แกวะ แตห เบ มึห น็อห ดีแตด. เซ เบ ยึร ลอง ดูก ปี กาดูห โอว, โกบ กาลาง โอว ดี เบ ลอง เฌา เยซู, แกวะ แตห อึณ แบน น็อห ลึร ดี เบ. ปี คัม โอว ตี, อึณ วี แบน อาพูง ดังโคว บอ ดี เบ.

14โคว อัน ตี โอว บอ ฆึบ ครึบเครา ดี อาต เฌาพรา อี มูห ฆูณ เอ. 15เฌาพรา ตี แฮะ ดัว จืร ดี ดอน ฌึร ดอน ครึร อี กอย แดง กาดาย บอ แคง ฆางหราว. 16โอว ซาคึร, แตห อัน เฌา ดัว ดี เบ แคะ กาดาน อาพูง ดังโคว ตาง อัน. แตห น็อห พึอม เฌาพรา แตห บอ เบ มึห ปวน บอ แตห น็อห เบ โปลม. 17โอว ซาคึร, แตห เฌา เยซู กอย แคง น็อห เบ โกบ หณึม เบ. โอว มืร ซาคึร, แตห เบ ร็อก ซีคยา บอ เฌาพรา บอ ดูอี, แตห อึณ ปี เรียห เฮ บอ เจณ ร็อง อี กอย มัน ซีคยา แคง กาดาย. 18แตห บอ เบ บอ เฆ ดูอี อี หณึม เฌา เยซู ดอน อี กอ นับ ซีคยา ลอง เฌาพรา ร็อก กาเซา เอ ดูอี. แตห เอ นับ, แคะ ร็อก เฌาพรา ดี เอ, อึณ แฮะ กาว็อห บอ โต็ง, แฮะ จา บอ ลึก. 19โอว ซาคึร แตห เบ นับ ลอง อัน ตี, แตห เบ นับ เฌา เยซู ร็อก กืน, อาว นับ ดี กาลาง. ปาย ตี โอว บอ ซาคึร, แตห บอ เฌาพรา บอ ปี ดี ดัว อัน ดอน โมยว กอย แคง น็อห เบ, แตห อึณ กอ โนะ แคง น็อห เบ. 20โคว อัน ตี แตห เอ บอ อืบ เฌาพรา. เฌาพรา นับ ดี โบง แตห อึณ แบน ปี ซาคึร เอ, แตห อึณ หลึอม ปี หมาณ เอ, แตห อึณ กืน หลึอม โตต ดอน โมยว อี เลห แคง อางยาน เอ. เฌาพรา ดี ดึห ปวน อัน โบง ฆาน อัน แคง น็อห เอ. 21โคว, อึณ กาอาบ เอ วี อืบ อัน เฌา. เอ ดูอี แคง พึง เฌา เยซู อี มูห ดูอี อี หณึม เฌา เยซู ดอน โจว ดอน บาน, แตห เอ บอกาเฆลียด อืบ เฌาพรา เซเซ. ซาตู.

Currently Selected:

อพ 3: pce

Highlight

Copy

Compare