โฮว ดารา 7
7
ลอง อางยาน บอด
1เซ ดูอี มึห ซาเร, อึณ บอ หมึอม หลึอม นามัน อูห หงูน. ซีแง ยัม ดูอี, อึณ บอ หมึอม หลึอม ซีแง ฆึอด อัน.
2เซ ฮาว ดี กาง ดูอี ยัม, อึณ บอ หมึอม หลึอม ฮาว ดี กาง อี โบง บลอย. โคว, ดูอี อี ซี อีม อี ซี มึห อาซาก, เฆ แฮะ กาอาบ กาดัวะ กาพา ลอง โลว ยัม.
3น็อห กลึร น็อห เหงา, อึณ บอ หมึอม หลึอม อี เอว กาณัห. โคว, อี แตห นา ตู ดาคึย ตู ซาบลาง นับ ดี แตห น็อห กรึอม น็อห ดาคึย.
4น็อห เฆ อี มึห อางยาน อึณ บอ กอย แคง กาง โดบ เฆ อี มึห ดูก มึห กลึร. น็อห เฆ ดูอี รึร นับ ดี กอย แคง กาง โดบ เฆ อี โบยว อี เกยา.
5เซ อี โทม โฆรห ปี มาโนว เฆ ดูอี อี มึห อางยาน, อึณ บอ หมึอม หลึอม โทม โหมว เฆ อี ตู มึห อางยาน.
6ปี กาณัห เฆ ดูอี รึร, อึณ บอ ปี ฮัม เงา อี กาซึม เฮ มาอาต ครึม กาโละ. ลอง อัน ตี มืร อึณ บอ มูห อี ดีโลย ดีลาย.
7เซ ดูอี คาหนาบ อี เฮา, อัน ปี บอ มึห อางยาน, อัน วี แบน ดูอี รึร. ดูอี อี ดึห คอซอง ปี ปรา ดัว อี เฮา มืร อาฆยาง อัน ดี ลึร.
8ดี กาแดะ บาง ดี ฮอต โมยว เหมา อาว ต็อห, อึณ บอ หมึอม หลึอม ดอ กาจูห ดี โบง ดี รัณ. น็อห อี คัม ดี ยืน เหลณ, อึณ บอ หมึอม หลึอม น็อห ปีคึก.
9แกวะ แตห แม หงึย รู. โคว, น็อห รู มูห อาฆยาง ดูอี รึร.
10แกวะ ดีหมอด ต็อห, “โกบ มาเซ อาคราว ดอ มึอน แฮะ หมึอม หลึอม อาคราว ดอ ตี นี?” โฆรห ปี ดีหมอด ฌึร ตี, อาว มูห โฆรห อี โดบ อางยาน.
11ดูอี ดอน อี โลว มึห อางยาน. เซ ดูอี แฮะ มึห อางยาน, อึณ บอ หมึอม ปี ดูอี อี มึห คาฆูน. อึณ บอ แบน อาฆยึร ดี เฆ อี ซี อีม.
12อางยาน บอ นับ ดี ฆ็อง แร ดูอี ปี รึอน ครีว นับ ดี ฆ็อง ดี แร ดูอี. ดูอี อี นับ แบน โมยว แบน โมยว อี กาหลูห ดี น็อห, อึณ บอ แตห อัน นับ อางยาน, นับ ดี บัร อาซาก ดูอี. อาตี มูห อาฆยึร อางยาน.
13แตห แม กาดัวะ กาพา ลอง แปะ แฮะ โบง เฌาพรา. เซ แปะ แฮะ โบง อัน เฌา แตห อึณ โฆะ, อาว มึห อาเซ ดี วี ปึอน โบง แตห อึณ ซืร.
14เซ อาคราว หมึอม, แตห แม โคย ดาคึย. เซ ฮี ฌัม ซีแง อี ดูก อี หณาบ, แตห แม วี โหลห เฌาพรา แฮะ แตห อึณ แบน บอ อา โมยว. โคว, อาว มึห อาเซ อี นับ, อึณ ดี ปาย เหมา นา อาต ฮาว.
15โจว อาซาก โอว อี ตู มึห ดีโคว นี, โอว แฮะ ยึร อา โมยว. อาดา อู โมยว อึณ บอ มูห ดูอี น็อห ซืร น็อห หมาน, อัน บอ นับ ดี ลึร ชึม โกบ นา ซืร นา หมาน ปี โบง อัน ตี. ปอ อู โมยว บอ มูห ดูอี ฮาย ดูอี ตู หมึอม อี มึห อาซาก โต็ง โกบ นา ฮาย นา ตู หมึอม ปี โบง อัน ตี.
16เซ อึณ ปาย ตี แกวะ น็อห ตาง โกบ น็อห ซืร น็อห หมาน แม. แกวะ ณึงราง ดี มึห อางยาน. อึณ บอ นับ ดี แตห แม ลึร ชึม.
17ปาย ตี แกวะ แตห แม ฮาย กาเซา. แกวะ แตห แม บอ รึร กาเซา. อึณ บอ นับ ดี แตห แม ยัม อาต ดี ฌัม อาคราว ดี โลว ยัม แม.
18แตห แม โนว ลอง ปี มาโนว อา โมยว ตี. โคว, เซ แม โรวเซ เฌาพรา, แม ดี บอ ออง โตต ดอน โมยว.
19ดูอี อี มึห อางยาน, ปวน อัน แฮะ ตาง หลึอม ดา กาณา ฆึร วี อี อึบ มืง.
20แดง กาดาย นี อึณ มืร ตู มึห คอ อู วี อี มึห น็อห ซืร น็อห หมาน เซเซ, อี ตู ดึอม โบง อี ตู บอด อี ตู หมึอม.
21แกวะ แตห แม โทม โตต โฆรห ปี กาลาง อี เฮา. แม บอ นับ ดี วี ยึร บอ โฆรห หมาย แม อี แค จาว แม บอ เอห แม.
22แม มืร แฮะ วี นับ แคง น็อห แม, แม แฮะ ดึอม แค จาว อี เฮา บอ เอห อี เฮา แบน เฌณ แบน เฌณ.
23โอว แฮะ ตา อางยาน โอว, แฌด ดี ยอด โมยว ตี ดอน โมยว. โอว มืร แฮะ คัด น็อห ดี โดบ อางยาน บอด. โอว ยี ตู แป ดี โดบ.
24ลอง อางยาน บอด ตี ซีเพา อัน แฮะ ลึก กาเซา. อาว มึห คอ อู วี อี ปึอน แตห อึณ กาหลูห โตต ดี น็อห อัน.
25ปาย ตี โอว วี คัด น็อห ดี เฮน, แตห โอว นับ อางยาน ตี กอย ดี เหมา. แตห โอว นับ บอ ลอง นา ฮาย นา มืก แฮะ รึร แคะ เหมา.
26โอว วี ยึร น็อห ร็อก อีบึณ อี ปี ยอต อี บัร ดี ครอด แม. แด อัน บอ ปี วัน ฮีน อี บัร ดี ปัก แม. ลอง อัน ตี อึณ บอ ซ็อง กาเซา ดี น็อห หลึอม ยัม. อาเซ โรวเซ เฌาพรา, อัน ดี บอ ปึอน ดี ลอด ดี อีบึณ ตี. อาเซ ออน ดี โบง หมาบ, อัน ดี กาดูห ดี คัม แตห อีบึณ ตี ปัก อัน.
27โอว ดา ซารา อี โฮว ดารา วี ต็อห, ดอ เหรต โอว ลอง ปี ปาย โตต ดอน โมยว, โอว แฮะ กาดูห อู โมยว ตี.
28ดอ แฮะ แกร โอว ดี นับ กืน, โอว ยี หณัม นับ โตต. โอว วี ยึร กาแต เฆ อีมาย อู แหรณ วี, อึณ มึห มี อู วี อี มึห น็อห ซืร น็อห หมาน. กาแต เฆ อีบึณ, โอว ยี ตู ยึร คอ อู วี.
29ปี วี ยึร โอว ปอ อู โมยว อึณ แฮะ หมาน. เฌาพรา แฮะ แตห ดูอี มึห น็อห ซืร น็อห หมาน. ดูอี ยี วี กาพา กืน, แตห อึณ วี กาฟัร กาเฟียน แคง น็อห เฆ.
© 2021, Wycliffe Bible Translator, Inc. All rights reserved.