โฮว ดารา 5
5
ลอง แกวะ กาเตา ดี ดัว กาดีก ซัดฌา
1แตห แม ซาดีก ดอ ตัห ลึบ แม แคง โฮว เฌาพรา. แตห แม มึห น็อห ซี โทม บอ โบง โดบ ปี อึง อัน เฌา. อึณ บอ หมึอม หลึอม ปี หลู เฆ ดูอี ฮาย ดูอี มืก อี ตู วี นับ ลอง ปี โบง เฆ อาว ล็อะ น็อห เฌาพรา.
2อาต กาลาง แม โฆรห, แตห แม กาดัวะ กาพา ซีคยา. แม แกวะ แตห น็อห แม กาเตา ดี ดัว กาดีก ซัดฌา ดี เฌาพรา. อัน เฌา กอย แคง ฆางหราว, แม ยี ซี กอย แดง กาดาย. โคว อัน ตี แตห แม ซาดีก, แกวะ แตห แม กาลาง โฆรห กืน.
3อี ดูก อี หณาบ ดี น็อห แม อึณ บอ นับ ดี แตห แม อึณบาว อี ตู หมึอม. ปาย ตี บอ เฆ ดูอี ฮาย ดูอี มืก บอ นับ ดี กาลาง โฆรห กืน อี ตู มึห ดีโคว.
4เซ แม แฮะ กาแซณ, แฮะ ดัว กาดีก ซัดฌา ดี เฌาพรา, แตห แม วี โบง โดบ แฮ แฮ ครัน ครัน. เฌาพรา ตู อึง ดูอี ฮาย ดูอี มืก. โคว, แตห แม โบง โดบ ปี กาแซณ แม ตี. 5เซ แม ตู ดัว กาดีก ซัดฌา, อึณ บอ หมึอม หลึอม แม ปีครัน ดี ดัว กาดีก ซัดฌา, ยี ตู วี โบง โดบ. 6แกวะ แตห โมต แม โบง หมาบ, แกวะ แตห แม โลว วี กาลาง ดี ดูอี ปี ตึย เฌาพรา ต็อห, “โอว แฮะ ฮอต กาลึบ ดี ดัว กาดีก ซัดฌา.” แกวะ แตห เฌาพรา รู จาว โกบ โฆรห แม ตี. แกวะ แตห อัน เฌา กาดูห ดี ดัม หมาบ ดี แม. 7ปี อึณบาว กืน บอ อี กาลาง โฆรห กืน อึณ บอ นับ ดี แบน อี ตู มึห ดีโคว อี ดีโลย ดีลาย. โกบ ปาย ตี แตห แม โรวเซ เฌาพรา.
ลอง ครัม อาว มึห ดีโคว
8เซ แม ยึร ดา กาณา อี อึบ มืง อี คาหนาบ ดูอี ฆีน ดูอี พลาน บอ ซูงพยาด อี ตู โดบ ดารา บอ วัห นา ซืร นา หมาน, อาว โลว อาม. ดา ตาง อี โบง ฆาน ฌึร ตี, อัน โลว คัม วี อี ตาง หลึอม อัน ดี บอ บัร ดี ยอด อัน. แดง ตี, ปี ซี มึห อี ตาง หลึอม ตี ดี บอ บัร ดี ยอด ฆาย. 9ดูอี บอกาเฆลียด กอ นับ ดี มึห, นับ ดี ซาแกน โกบ ปี เฆฌู แปร กาดาย. บอ คูนดีคัม บอ ปึอน ปี เฆฌู มาน เฆ โดง นา.
10ดูอี อี มึห น็อห ซี ปึอน รึอน, น็อห อัน ตู นับ ดี จู ดอ เหมา. ดูอี อี มึห น็อห ซี ครัม กาเซา, โกรวกราม อัน ปี บอ แฮะ กืน แคะ เหมา, อึณ ตู เบระ ดี น็อห อัน ดอ เหมา. ฌึร ตี มืร, อึณ บอ มูห อี ดีโลย ดีลาย.
11เซ เอ แฮะ แกร ดี ครัม, แกร ดี มึห กืน, ดูอี โฮม มืร แกร ดี มึห กืน โดบ. ดูอี อี น็อห ตาง ดี โกรวกราม อัน ตี, อึณ ตู มึห อาฆยึร มาเซ. งาย อัน ปึอน มี แคะ ยอด ปีเยณ.
12เฆ ดูอี อี รัณ มาน รัณ ฆาน, อึณ ดี ฆลึม โฮม ตู ฆลึม โฮม อาว ต็อห, อัน ปึอน ดี อีด ดาคึย อีด ซีคยา. เฆ ดูอี ครัม บอ นับ ดี แบน น็อห แหม น็อห กาฮัวะ โกบ โกรวกราม เฆ, แตห อึณ ปยาต ซี อีด เฆ.
13โอว วี ยึร ปอ อู โมยว อี ตู หมึอม อี จีจีว กาเซา อี กอย แดง กาดาย ครึม เบลณ นี. ดูอี บอ นับ ดี แฆบ กาฌูะ อูน โกรวกราม เฆ, แตห อึณ กอ วี แบน อาเพ อาเร ดี โดว บรีม เฆ.
14โกบ แฮะ กาดูห เฆ อาเพ อาเร อึณ บอ แตห โกรวกราม เฆ โบยห หราย โตต. อึณ บอ นับ ดี โตต, นับ ดี โยม กอ ฮู มึห มาเซ ปี ดี โลว วี ดัว เฆ ดี หลูกหลาน เฆ.
15ดอ ฆึอด ตัห ดูอี, อัน ตู มึห ดี ดึห ตัห มาเซ. อึณ บอ ปาย ตี ปัน ดี ยัม ฮาว อัน, อัน มืร ตู ปึอน ดึห ฮาว มาเซ. อัน ปี บอ แฮะ โฆยวฆยา ดี โบง แคะ มึห อัน โปลม เฆ แฮณ บอ คัม ดูก หณาบ แคะ เหมา, อัน ยี ตู ปึอน ดึห ฮาว คอ อู โมยว.
16บอ อาตี บอ มูห อี ตู หมึอม อี จีจีว กาเซา แปะ แฮะ ยึร โอว. ดูอี ดี วี ฮาว ปี ดอ ตัห อัน. อัน แฮะ รัณ ดูก รัณ หณาบ บอ โฆยวฆยา ดี โบง แคะ มึห อัน โปลม เฆ แฮณ, อึณ ยี แฮะ ดีโลย ดีลาย ปี อัน ซี ปา คูน.
17โจว มึห อัน อาซาก ตี, อัน ดี ปึอน มี กอย แคง อับ ว็อง บอ กลึร เหงา. อัน บอ มึห ดูก หณาบ ดี น็อห, มึห บอ กาโอะ เซาพึร บอ น็อห รู น็อห จาว.
18วาย อัน ตี โอว บอ วี นับ ปี กาอาบ เอ ดูอี โบง อี หมึอม หลึอม โมยว เฮา, อึณ บอ มูห ลอง ปี ดี โฮม ปี ดี เดียง, ลอง อี โบยว ดาคึย โกบ ฆาน ปี โบง ปี เหรต ตัห เอ โจว มึห เอ อาซาก อี ตู โต็ง ปี ดัว เฌาพรา ดี เอ. ลอง อัน ตี แฮะ แบน อาฆยึร ดี เอ. 19เซ เฆ แฮะ ปึอน ดึห โฮม ปี ดัว เฌาพรา ดี เฆ ดอน อี บอ โบยว ดาคึย โกบ โกรวกราม ปี เหรต ตัห เฆ ตา โปลม เฆ แฮณ เฆ, อาตี อึณ บอ มูห รูห ปี ดัว ปี เฆฌู อัน เฌา ดี เฆ. 20เฆ มืร ตู ดัน เฌณฌา กืน ลอง อาซาก เฆ. โคว, เฌาพรา แฮะ แตห เฆ มึห น็อห อี โบยว ดาคึย.
© 2021, Wycliffe Bible Translator, Inc. All rights reserved.