ดารา 23

ลอง ดูอี อี ตู ปึอน ลึบ แคง พึง อี กรึบ เฌาพรา

1อาโมวแซ วี ต็อห, “เซ อึณ มึห ดูอี เฆา กาลาต บอ ดูอี อี แดบ แวน ลัะคานา อัน, อัน ตู ปึอน ลึบ แคง พึง ดูอี อี กรึบ เฌาพรา.

2ดอน อี อี มูห ฆอน กาปูห บอ ฆอน กาแต ฆลัะ บอ หลูกหลาน เฆ ตี อาว ปึอน ลึบ แคง พึง ดูอี อี กรึบ เฌาพรา. บอ โจว หลูก โจว หลาน อัน, กอ โนะ ฆึร โจว, เบ โลว โดบ ดารา ตี.

3ดูอี อัมโมน บอ ดูอี โมวอาบ อาว ปึอน ลึบ แคง พึง ดูอี อี กรึบ เฌาพรา, แตห อึณ กอ ฌัม บอ โจว หลูก โจว หลาน เฆ ฆึร โจว. 4โคว, ดอ เลห เบ แคง มืง แอฆึบ ตึอน, เฆ ตู ดึห อึม เฆ คามูน, ฮาว บัร ดี รวห เบ โดบ อึณเตณ. เฆ แฮะ วี ฌาง อาบาลาอัม, แตห อัน ดืง เบ. อาบาลาอัม ตี, อัน บอ มูห ฆอน อาปอซอ อี กอย แคง มืง เบซอ แคง กาดาย มืง อารามนาราฮัม. 5มาแล, เฌาพรา ปี กรึบ เบ ยี ตู โทม โฆรห อาบาลาอัม ตี. อัน เฌา แฮะ ดึห โฆรห ปี ดืง อัน ตี, วี กาเบลียะ แตห อึณ วี แบน โฆรห ม็องการา ดัว ดี เบ โกบ ร็อก อัน เฌา ดี เบ. 6บอ โจว อาซาก เบ, แกวะ แตห เบ กาฆึก ดี เฆ, แกวะ แตห เบ กาแซณ ดี เฆ คอ อู โมยว.

7ยี มูห ดูอี อาโมยว เอโดม, เบ ตู ปึอน ฌ็อง เฆ. เฆ มูห บีนอง เบ. ดูอี อาโมยว แอฆึบ มืร, เบ ตู ปึอน ฌ็อง. เบ แฮะ ดึอม กอย แบน แคต แคง มืง เฆ. 8หลูกหลาน เฆ อี แฮะ กาดูด ตัห ฌัม โจว ฮาโอย, เฆ แฮะ ปึอน ลึบ พึง ดูอี อี กรึบ เฌาพรา.

ลอง อี โบง แตห ดับ ดา ซึก กาดาต

9ดอ กอย เบ แคง ดับ ดา ซึก, อาต กาโฆห เบ ดี รันซู เบ, แตห เบ วัห อี ตู หมึอม ดอน โมยว. 10เซ อึณ มึห อีมาย อู วี, เซ อึม โกรว อัน แฮะ เลห แคง หมึร, แตห อัน เลห ฮาว กอย นา เรต ดับ ดา ซึก. 11อาต เฆต ซีแง, อัน โลว วี ตา อึม. เซ ซีแง ฮี ฮอต เฆต, อัน โลว วี ตัห ลึบ แคง โดง คยัะ เฆ.

12เบ โลว แรน อูน อาดา อู โปละ นา เรต ดับ เบ, แตห อึณ แบน โดง ดี ชี, โดง ดี วีน เบ แปร. 13เบ โลว โฆ็ง ครึง ตา อี แบน มัง ฆึห กาดาย. เซ เบ แฮะ ฮอต วีน แปร, แตห เบ วี ปูน. 14โคว, เฌาพรา ปี กรึบ เบ บอ กอย รึม โดบ เบ บอ วีน ดีแล แคง ดับ เบ. อัน บอ บัร ดี จอย เบ, แตห เบ ออง รันซู เบ. เบ ยี โลว โบง แตห อึณ ซีงา ดอน โปละ, แกวะ แตห อัน เฌา ยึร อี ตู ซีงา คอ อู โมยว กาแต เบ. แกวะ แตห อัน โลว เตา เบ.

ลอง ดารา แบน โมยว แบน โมยว

15เซ เบ ยึร หมาย อี เฮา แฮะ เตา เลห ดี ดา กาณา อัน, ตัห หมาณ ดี เครียง โดง กอย เบ, เบ แกวะ วี ฮาว ตึย วีว อัน ดี ดา กาณา อัน. 16แตห อัน ร็อห มืง โดง ซี กอย อัน. แฮะ ปึอน ดึห น็อห อัน. เบ ตู ปึอน คาหนาบ อัน.

17กาแต ดูอี อาโมยว อีซาเรลัะ, อีบึณ ตู ปึอน แบน ยา มาลัม แคง โฮว ปี กรึบ เฆ เฌา แบน โมยว แบน โมยว. บอ อีมาย มืร ปาย ตี อาว ปึอน โบง. 18รึอน ปี ปึอน ยา มาลัม บอ อีมาย อี โบง ปาย ตี เบ ตู ปึอน ดึห ตัห แคง โฮว เฌาพรา ปี กรึบ เบ, แตห อึณ แบน รูห แปะ แฮะ กาแซณ เบ. เฌาพรา ปี กรึบ เบ บอ กาอีห กาเซา โมยว ตี.

19เซ เบ บอ ดัว บีนอง เบ การ็อห กาวาย ดี เบ, บอ มูห รึอน, บอ มูห ปี ดี โฮม, บอ มูห ครึง ตา โมยว เหมา อาว ต็อห, เบ ตู ปึอน ดึห เอียง อัน ดอ เหมา. 20เซ อึณ มูห ดูอี อาโมยว เฮา, เบ แฮะ ปึอน ดึห เอียง อัน แคะ ปี ดัว เบ แตห เฆ การ็อห. มาแล, โกบ ตู ดึห เบ เอียง อัน ดี เฆ ดูอี อีซาเรลัะ อี มูห บีนอง เบ, เฌาพรา ดี ม็องการา ดัว ฆาน ปี โบง เบ ดอน โมยว แคง มืง โดง ดี ฮาว กอย เบ ตึอน.

21เซ เบ แฮะ กาแซณ, แฮะ ดัว กาดีก ซัดฌา ดี เฌาพรา ปี กรึบ เบ, เบ แกวะ แกร ดี โบง โดบ. โคว, เซ เบ ตู โบง โดบ แปะ แฮะ กาแซณ เบ ตี, เฌาพรา ดี วี หมาณ ดี เบ. อึณ มืร ดี แบน หมาบ ดี เบ. 22เซ เบ ยี ตู กาแซณ ดี เฌาพรา, อาว แบน หมาบ ดี เบ. 23มาแล, เซ เบ แฮะ กาลาง เลห แคง โมต เบ, เบ โลว โบง โดบ อาคาคัร. โคว, เบ แฮะ ดืง แฮะ กาแซณ ดี เฌาพรา ราง เบ.

24ดอ ฮาว เบ แคง มาน มางูน อี เฮา, เบ แฮะ ปึอน โฮม เบล อัน แตห เบ กอ แพ. มาแล, เบ แกวะ เบต ฮับ แคง ซีโบลห บอ แคง กรึก, วี ดึห ฮาว โดบ เบ. 25ดอ กาโลห ฮาว เบ กาแต โดง นา อี เฮา, เบ แฮะ ปึอน ซีกัด โฮม กาโย็ง โหงว เฆ. มาแล, เบ ตู ปึอน วี โซะ ตา อึณวาต.”

Currently Selected:

ดารา 23: pce

Highlight

Copy

Compare