ดารา 20
20
ลอง โลว กาโฆห
1อาโมวแซ แฮะ วี ต็อห, “ปัน ดี กาโฆห เบ ดี รันซู เบ, เซ เบ บอ ยึร มังปร็อง เฆ ลักเลา บอ ดา ซึก อี แฮะ กืน หลึอม เบ, แกวะ แตห เบ โยว. โคว, เฌาพรา อี มูห เฌาพรา ปี กรึบ เบ อี แฮะ แยต เลห เบ แคง มืง แอฆึบ ตึอน, อัน ดี กอย รึม โดบ เบ. 2อาต กาโฆห เบ ตี, ดา อี หลู ดี เฌาพรา โลว ฮาว กอย ดี อาต เบ กาลาง ดี เฆ ดา ซึก ต็อห, 3‘อึย เบ ดูอี อีซาเรลัะ, อาตึร นี แตห เบ โทม. แกวะ แตห เบ โยว รันซู เบ. อาว โลว แตห เบ มึห น็อห ลึร น็อห เตียะ. อาว โลว ปีดืน ปีกาจัว เบ โกบ เฆ. 4โคว, เฌาพรา อี มูห เฌาพรา ปี กรึบ เบ, อัน ดี กอย รึม โดบ เบ. อัน ดี แตห เบ ออง, แตห เบ แป เฆ.’
5แฮะ ฮอต, เฆ อี มูห ดา ตาง อี แยต อี อึบ ตึอน, เฆ ดี วี ดีหมอด เฆ ดา ซึก ต็อห, ‘เบ อี กอย ดี นี, อึณ มึห อี โบง กาง กามาย ยี หณัม ปึอน ดี โฮะ กาง กามาย ตี? เซ อึณ มึห, แตห อัน วี เวณ ดี กาง อัน. โยว อัน ยัม ดอ กาโฆห เอ นี. โยว อี เฮา วี ตัห โฮะ กาง กามาย อัน ตี.’ 6อึณ มืร มึห อี ซัม มาน มางูน อี หณัม ปึอน ดี โฮม เบล อัน? เซ อึณ มึห, แตห อัน วี เวณ ดี กาง อัน, โยว อัน ยัม ดอ กาโฆห เอ นี. โยว อี เฮา วี ตัห โฮม เบล มางูน อัน. 7อึณ มืร มึห อี แฮะ มึห ปาว ยี หณัม โบง คัด? เซ อึณ มึห, แตห อัน วี เวณ ดี กาง อัน. โยว อัน ยัม ดอ กาโฆห เอ นี. โยว อี เฮา วี คัด ดึห ปาว อัน ตี.’ 8ดา ตาง เฆ ตี ปี วี โลว กาลาง ดี เฆ ดา ซึก บอกาเฆลียด ต็อห, ‘อึณ มึห อี มึห น็อห โยว น็อห เตียะ? อาเซ มึห น็อห ฌึร ตี, แตห อัน เวณ. โยว บอ อี เฮา ดี วี มึห น็อห โยว น็อห ลึร ปี อัน.’ 9เซ เฆ ดา ตาง แฮะ ฮอต กาลาง ดี เฆ ดา ซึก บอกาเฆลียด, เฆ โลว วี ดาง แตห อึณ มึห เฆ ฆีณ ซึก อี แยต เฆ.
10เซ เบ แฮะ ตัห เครียะ มืง โดง ดี กาโฆห เบ, แตห เบ กาลาง ดี ดูอี แคง มืง ตี, แตห เฆ โฆม, แกวะ แตห เฆ โลว กาโฆห.” 11เซ เฆ คัม ดี ชึม บอ วึห มาโลห มืง, แตห เบ ลึบ. ดูอี แคง มืง ตี บอกาเฆลียด โลว คัม ดี โบง ฆาน ปี จัร เบ เฆ โบง. 12เซ ดูอี แคง มืง ตี ยี ตู โฆม เบ, ซี กาโฆห ดี เบ, แตห เบ แวง โรบ มืง เฆ ตี. 13เซ เฌาพรา ปี กรึบ เบ แฮะ อาบ ดูอี เฆ ตี ดี เบ, เบ โลว ง็อห ยัม โตต เฆ อีมาย แคง มืง ตี. 14อี มูห อีบึณ เฆ ฆอน บอ โกรวกราม อี กอย แคง มืง ตี, แตห เบ ดึห, แบน โกรว เบ. โกรวกราม รันซู เบ ตี แปะ แฮะ ดัว เฌาพรา ดี เบ, เบ แฮะ ปึอน จัร, ปึอน ตา โตต ดอน โมยว. 15มืง อี กอย กาโต็ง ดี มืง โดง ดี ฮาว กอย เบ ตี ดอน มืง, เบ โลว โบง ปาย ตี. เฆ มูห อาโมยว ดูอี อี ตู ปี เฆ อาโมยว ดูอี อี กอย โคบ เบ.
16มาแล, ดอ กาโฆห เบ ดี มืง แปะ แฮะ อาบ เฌาพรา ดี เบ, แตห อึณ แบน คาฆูน เบ, เบ โลว ง็อห ยัม โตต ดอน โมยว, บอ ดูอี บอ โดว ซัดดาวา. เบ แกวะ อูน โมยว อี มึห พึอม คอ อู โมยว. 17เบ โลว ง็อห ดูอี อาโมยว เฮทีด, ดูอี อาโมวรีด, ดูอี กานัณ, ดูอี เพเรซีด, ดูอี ฮีวีด บอ ดูอี เยบูซีด. ดูอี ฌึร ตี ดอน โมยว เบ โลว ง็อห แวน โตต บอกาเฆลียด, แตห อึณ บอ โดบ แคะ ปี กาลาง อูน เฌาพรา ดี เบ. 18เซ เบ ตู ง็อห ยัม โตต เฆ, โยว เฆ มาโนว เบ โบง ปี กาอีห เฌาพรา, โบง อี กาบัห ดี เฌาพรา บอ วี กรึบ เฌา ปี กรึบ เฆ.
19ดอ แฮะ แวง โรบ เบ มืง มัง มืง, เบ มืร แฮะ กอย เหลณ, บัร ดี กาโฆห แตห เบ ออง มืง ตี, เบ แกวะ ฆัร แวน เฮ. โคว, เบ แฮะ ปึอน โฮม เบล อัน. อาว ปึอน ฆัร แตห อึณ เกห. อาว มูห เฮ อี มูห รันซู เบ ปี โลว ง็อห เบ. 20เซ เบ แฮะ นับ, อึณ บอ มูห เฮ อี ตู มึห เบล อี ปึอน โฮม, เบ แฮะ ปึอน ฆัร เกห, วี โบง แตห อึณ จอย เบ กาโฆห, แตห อึณ กอ ฌัม ปัน ดี ปึอน เบ ดี ลึบ แคง มืง ตี.”
Currently Selected:
ดารา 20: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
