ดารา 19
19
ลอง มืง อี ปึอน ฮาว เครียง
1อาโมวแซ แฮะ วี ต็อห, “เอา เหลณ เฌาพรา ดี ปยาต แวน เฆ ดูอี อี กอย แคง มืง ปี ดี อาบ อัน ดี เบ, แตห เบ ฮาว กอย. เบ มืร ปึอน ดี กอย ดาคึย, กอย ซีคยา แคง มืง แคง กาง ตี. 2ดอ อัน ตี เบ โลว ร็อห โอย มืง. มืง ตี เบ โลว แตห อึณ กอย ดี กาแต กาดาย มืง ปี ดี อาบ ดัว เฌาพรา ดี เบ. 3เบ โลว กาย็อห กาดาย มืง ตาง ปี ดี อาบ เฌาพรา ดี เบ ตี, แตห อึณ แบน โอย โปละ. เบ บอ โลว อึณปราย อึณเตณ, แตห อึณ ปึอน ดี ฮาว ซีคยา, แตห เฆ ดูอี อี แฮะ กาลูต ดี ง็อห ยัม อี เฮา ปึอน ดี เตา, ฮาว กอย, ฮาว เครียง แคง มืง ตี อี กอย กาตัด ดี เฆ.
4ปาย ตี แฮะ มูห ดารา ลอง ดูอี อู วี อี แฮะ กาลูต ดี ง็อห ยัม อี เฮา. เซ อัน ตู ดึอม อูน น็อห ดี ง็อห อี, อัน มืร ตู ดึอม มึห ดี กาเอห กาแทณ ดี ดูอี วี ตี, อัน แฮะ ปึอน เตา ฮาว กอย แคง มืง โอย มืง ตึอน ดอน มืง แปะ แฮะ ร็อห เฌาพรา, แกวะ แตห อี เฮา ง็อห อัน. 5อูพามา อัน, เซ อึณ มึห ดูอี อู วี บอ ฆึก อัน ฮาว แคง แปร, ต็อห ดี ฮาว เกด เฮ. เซ อู วี แฮะ ฆัร เฮ ตา มึย อัน, มึย อัน ตี บอ เลห ฮาว ดึร ฆึก อัน, แตห อัน กอ ยัม. เซ อึณ มูห ดูอี ฌึร ตี, แฮะ ปึอน เตา, ฮาว กอย, ฮาว เครียง แคง มืง อู มืง, แตห อัน ลอด ยัม. 6เซ อึณ มึห มี อู มืง, เซ คราว อึณเตณ โต็ง กาเซา, โยว เฆ อี ซี โบง เวียะ ดี อัน ตึอน, เฆ วี คูงครัห ครับ อัน, วี ง็อห ยัม ดูอี อี ตู กาอาบ ยัม, ยู ฮู มูห อัน อูน น็อห ดี โบง. 7โกบ อึณ ปาย ตี โอว ต็อห ดี เบ, แตห เบ ร็อห มืง อาดา โอย มืง.
8เซ เฌาพรา ปี กรึบ เบ แฮะ ปีว็อห ปีเลห มืง เบ, แตห อึณ โดบ ปี ดึอม กาแซณ อัน ดี เฆ ฆูณ ดัง เบ, เซ อัน แฮะ ดัว มืง แปะ แฮะ กาแซณ อัน ดี ดัว, 9โกบ โบง โดบ เบ ดารา ปี กาลาง โอว ดี เบ อาตึร นี, บอ โกบ ร็อก เบ เฌาพรา ปี กรึบ เบ บอ โทม โดบ ปี มาโนว อัน ดี เบ, แตห เบ ร็อห มืง ปอ อึณ ปัว อาดา ปอ โอย มืง. 10เบ โลว โบง ปาย ตี แกวะ แตห เฆ ดูอี อี ตู กาอาบ ยัม โลว ยัม แคง มืง แปะ แฮะ อาบ เฌาพรา ปี กรึบ เบ ดี เบ, แกวะ แตห อึณ แบน หมาบ ดี เบ โกบ ง็อห ยัม ดูอี.
11มาแล, เซ อึณ ยี มึห ดูอี อี แฮะ อูน น็อห ดี ง็อห ยัม ดูอี อู วี, เซ อัน แฮะ ฮอต โบง ปาย ตี อัน บอ วี กาแบลบ เตา ฮาว เครียง แคง มืง เฆ ตี, 12ดา ตาง อี กอย แคง มืง บรีม อัน โลว จัร อี ฮาว เหมต ตัห อัน, วี อาบ อัน ดี ดูอี อี แฮะ กาอาบ วี โบง เวียะ ดี อัน. ดูอี วี ตี ดืน ดี โลว ยัม. 13เบ มืร ตู ปึอน กาเว อัน. เบ โลว ดึห แวน ดูอี อี แฮะ กาอาบ ยัม โกบ หมาบ แปะ แฮะ โบง อัน ดอ ง็อห ยัม อัน อาซาก อี กาแต เบ ดูอี อาโมยว อีซาเรลัะ. ปาย ตี แตห เบ วี ปึอน ดี กอย ซีคยา.
14เบ แกวะ กาโทะ หล็อก กาอูน แวง กาง ดี เฆ อี กอย โคบ เบ. เฆ ดูอี ดอ มึอน แฮะ ซัม อูน หล็อก ตี ซีณ อาต นี, แตห อึณ บยัะ กาอูน กาดาย แปะ แฮะ อาบ เฌาพรา ปี กรึบ เบ ดี เบ, แตห อึณ แบน คาฆูน เบ.
15เซ อึณ มึห มี ดูอี อู วี อี แบน ซักเซ ลอง อามู อี, แกวะ แตห เบ ซูงพยาด อามู ตี. อึณ โลว มึห ดูอี อา วี, โอย วี, อี แบน ซักเซ, แตห เบ ปึอน ดี ซูงพยาด อามู อี เฮา.
16เซ อึณ มึห ดูอี อี กาลาง โฆรห ตู หมาน บอ กาลาง นา ตู หมึอม ลอง อี เฮา, 17ดูอี ฆาย ตี บอ อา วี โลว ตัห กอย ดี อาต เฌาพรา. เฆ ดา อี หลู ดี เฌาพรา บอ เฆ ดา ตาง อี ซูงพยาด ดารา อี โลว โบง ฆาน ดอ อัน ตี, เฆ โลว ซูงพยาด อามู ฆาย ตี. 18เฆ ดา ตาง อี ซูงพยาด ดารา ตี, เฆ โลว แฌด ดี ยอด, แตห อึณ กอ เฌะ โตต ดอน โมยว. เซ ดูอี แบน ซักเซ กาลาง โฆรห ตู หมาน, กาลาง นา ตู หมึอม ลอง บีนอง อัน อี มูห ดูอี อีซาเรลัะ นังฆัน, 19ดูอี วี ตี โลว วี คัม แคะ ปี ซี โบง อัน ดี อี เฮา. เบ โลว โบง ปาย ตี แตห เบ ดึห แวน โมยว อี ฮาย อี กอย กาแต เบ. 20ปาย ตี เซ ดอน อี วี ยึร ลอง อัน ตี, เฆ ดี บอ วี โยว, แกวะ แตห อึณ มึห อี ดี วี ยัะ โบง อี ตู หมึอม. 21เซ อึณ มูห อามู ฌึร ตี, แกวะ แตห เบ มึห น็อห กาเว. เซ ดูอี โบง แตห อาซาก อี ชึม, บอ อาซาก อัน โลว วี ชึม. เซ อัน โบง แตห งาย อี อับ, บอ งาย อัน โลว วี อับ. เซ อัน โบง แตห หราง อี กาบัก, บอ หราง อัน วี โลว กาบัก. เซ อัน โบง แตห แด อี เซา, บอ แด อัน โลว วี เซา. บอ, เซ อัน แตห เปลา อี กาบัก, บอ เปลา อัน โลว วี กาบัก.”
Currently Selected:
ดารา 19: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
