ดารา 17

1อาโมวแซ แฮะ วี ต็อห, “เบ ตู ปึอน ดึห มาบู เฆ มัก อาโล็ง อี ตู ซีคยา, อี มึห โดง เช, หลู ดี เฌาพรา ปี กรึบ เบ. โคว, เฌาพรา บอ กาอีห กาเซา อาโมยว ตี.

2แคง มืง ปี ดี อาบ เฌาพรา ดี เบ, เซ เบ ยึร ดูอี บอ มูห อีบึณ บอ มูห อีมาย, อี โบง ปี ตู อึง เฌาพรา, เซ อัน ตู โรวเซ ปี กาแซณ เบ ดี เฌาพรา, 3เซ อัน แวน ดารา เฌาพรา บอ วี ฮาว กรึบ เฌา ปี กรึบ ดูอี อาโมยว เฮา บอ วี กรึบ มาเฆียน เฆ ซีแง บอ ซีมัณ อี กอย แคง เบลณ, 4เซ อี เฮา มืร กาลาง ดี เบ ลอง อัน ตี, เบ โลว ดีหมอด แตห เบ นับ ซีคยา. เซ เบ ยึร แฮะ มูห แฮะ หมาน แคะ ปี ต็อห อี, เบ มืร นับ ซีคยา อี ฮาย กาเซา ปาย ตี แฮะ โบว แบน กาแต เบ ดูอี อีซาเรลัะ, 5เบ โลว ดึห เลห ดูอี วี ตี นา เรต มืง, วี ดึห มาว, วึณ แตห อัน กอ ยัม. บอ มูห อีบึณ อีมาย อาเซ อาว ต็อห, เบ โลว โบง ปาย ตี ดี ดอน อี. 6ปี บอ แฮะ ต็อห ปาย ตี มืร, อึณ ยี โลว มึห ซักเซ อา โอย วี, เบ กอ ปึอน ง็อห ยัม อัน. เซ อึณ ยี มึห มี ซักเซ อู วี, อาว ปึอน ง็อห ยัม. 7เฆ อี แฮะ แบน ซักเซ ตี, เฆ โลว ดึห มาว, วึณ ดูอี วี ตี ดี อาต อี เฮา. แฮะ ฮอต, เฆ ดูอี กืน บอ โลว วี วึณ. ปาย ตี เบ โลว ดึห เลห อี ตู หมึอม กาแต เบ.

ลอง อามู แบน โมยว แบน โมยว

8มัง เฌณ เซ อึณ บอ มึห อามู อี หณาบ ดี ซูงพยาด, เซ อึณ บอ มูห อามู ลอง ง็อห ยัม อี บอ อามู กาพาด คาฆูน, อามู อี ลาย กามัห, เซ อึณ มึห อามู ปาย ตี ปี ตู แป เบ ดี ซูงพยาด, แตห เบ ฮาว โดง ดี ร็อห อูน เฌาพรา. 9แตห เบ ดาง อามู ตี ดี เฆ ดา อี หลู ดี เฌาพรา อี มูห ดูอี อาเลวี บอ ดี เฆ อี โบง ฆาน ดี โดง บอด ดอ อัน ตี. แตห เบ ดีหมอด เฆ, แตห เฆ ซูงพยาด อามู ตี. 10เบ มืร โลว โดบ ปี ซูงพยาด เฆ ตี ดี โดง บอด ปี ดี ร็อห เฌาพรา. 11เบ โลว โบง โดบ แคะ ปี มาโนว เฆ ดี เบ ลอง ปี ซูงพยาด เฆ ตี, แกวะ แตห เบ วัห นา ฆัะ นา อัห. 12อาเซ วี แทณ โฆรห เฆ ดา อี หลู ดี เฌาพรา บอ โฆรห เฆ ดา ตาง อี ซูงพยาด ดารา ตี, อี มูห ดูอี อี โบง ฆาน เฌาพรา, ดูอี วี ตี โลว คัม ดี ยัม. ปาย ตี เบ โลว ดึห แวน อี ตู หมึอม กาแต เบ ดูอี อีซาเรลัะ. 13เซ ดูอี กืน ยึร ลอง อัน ตี, เฆ ดี บอ โยว. วาย อัน ตี เฆ มืร อาว ฮู ยัะ วี กาบัห ดี ดา ตาง.

ลอง ร็อห คูนดีคัม

14วาย แฮะ ฮอต ฮาว กอย เบ แคง มืง ปี ดี อาบ เฌาพรา ดี เบ, เบ มืร ปึอน ดี กอย ซีคยา. ดอ อัน ตี เบ ดี บอ ต็อห, ‘เย ซี ปึอน คูนดีคัม ปี เฆ ดูอี อาโมยว เฮา อี กอย โคบ เย แฮะ มึห คูนดีคัม.’

15แตห เบ ซาดีก, แตห เบ ร็อห วี แปะ แฮะ ร็อห อูน เฌาพรา ดี เบ. วี ตี โลว มูห ดูอี อาโมยว อีซาเรลัะ ปี เบ. เบ แกวะ ดึห ดูอี อาโมยว เฮา อี ตู มูห อาโมยว อีซาเรลัะ แบน คูนดีคัม เบ. 16แดง ตี, คูนดีคัม ตี ตู ปึอน มึห กืน กาเซา มังปร็อง อาดา ดา ซึก อัน. อัน ตู ปึอน จัร อี เฮา ฮาว จึห ตัห มังปร็อง แคง มืง แอฆึบ ตึอน. โคว, เฌาพรา แฮะ ดัม อูน ดี เบ ต็อห, ‘เบ ตู ปึอน วี เวณ แคง มืง แอฆึบ ดอ เหมา.’ 17คูนดีคัม ตี มืร ตู ปึอน ดึห อีบึณ กืน. โยว อึณ แตห อัน วี กาลึบ. บอ รึอน เฆ ครีว มืร ปาย ตี. อาว ปึอน โหรม อูน กืน กาเซา.

18เซ อัน แฮะ ฮอต อึบ แคง โฮว อัน, อัน โลว ทูด เลห ดารา นี ดี บับ เฆ ดา อี หลู ดี เฌาพรา อี มูห ดูอี อาเลวี ตึอน, แตห อัน แดม ฮับ แคง บับ อัน. 19บับ ดารา ตี, อึณ โลว กอย โคบ อัน เซเซ. อัน มืร โลว ตีห บอ โจว อัน. เซ อัน โบง ปาย ตี อัน ดี บอ นับ ดี โรวเซ เฌาพรา. อัน มืร ดี บอ นับ ดี โบง โดบ ดารา บอ ปี จัร เฌาพรา ดอน โมยว. 20ดารา ตี ดี บอ มาโนว อัน, แกวะ แตห อัน มึห น็อห ปีคึก แดง เฆ บีนอง อัน. อึณ มืร ตู แตห อัน วัห นา ฆัะ นา อัห. ปาย ตี บอ อัน บอ หลูกหลาน อัน ดี ปึอน ดี กอย เหลณ แคง มืง ปี อึบ อัน.”

Currently Selected:

ดารา 17: pce

Highlight

Copy

Compare