ดารา 14
14
ลอง ปี ดี โฮม อี ซีงา โมยว อี โดบ ดารา
1อาโมวแซ แฮะ วี ต็อห, “เบ แฮะ มูห ดูอี ปี อึบ เฌาพรา ปี กรึบ เบ. โคว, ดอ ยาม ดอ กลึร เบ โกบ ดูอี ยัม, เบ แกวะ ซัวะ แกวะ กรีห ยัง เบ. เบ แกวะ ฆาะ ฮึก นา แดง กาต็อห เบ. 2โคว, เบ แฮะ แบน ดูอี อี ซีงา บอด บอ ดูอี ปี อึบ เฌาพรา ปี กรึบ เบ. เฌาพรา แฮะ ร็อห เลห เบ แคง ดูอี ดอน โมยว แดง กาดาย นี, แตห เบ วี แบน ปี โกรว อัน อี แฮะ บอด, แฮะ ง็อห ตาง.
3เบ แกวะ โฮม คอ อู โมยว ปี ต็อห เฌาพรา อาว ซีงา. 4-5โดว ซัดดาวา ปี ปึอน เบ โฮม, อึณ บอ มูห มามัก, มาบู, มาแป, มาฌัะ, มังเฆียห, มาบวห, มาแป แปร, มาแป ดี นอน, มาบวห อึณบาต บอ มาบู แปร. 6แคะ กอย โดว ซัดดาวา อี มึห ฆีบ รา, อี นับ ดี วี โซห ปี โฮม อัน, ฌึร ตี ดอน โมยว เบ แฮะ ปึอน โฮม. 7ปาย ตี โดว ซัดดาวา อี มึห ฆีบ อี ตู รา, อี ตู นับ ดี วี โซห ปี โฮม อัน, เบ ตู ปึอน โฮม ดอ เหมา. บอ มังปร็อง กาฮาต, มายูน เฆ มายูน แปร, เบ แกวะ โฮม. โดว ซัด ฌึร ตี, เฆ ปี บอ แฮะ นับ ดี วี โซห ปี โฮม เฆ มืร, ฆีบ เฆ ยี ตู รา. โคว, เบ โลว มาด โดว ซัด ฌึร ตี มูห อี ตู ซีงา. 8บอ มาเลต เบ แกวะ โฮม. ฆีบ เฆ ปี บอ แฮะ รา มืร, เฆ ยี ตู นับ ดี โซห ปี โฮม เฆ. โคว, เบ โลว มาด อึณ มูห โดว ซัด อี ตู ซีงา. ยัง โดว ซัด ฌึร ตี, เบ แกวะ โฮม. บอ โดว ยัม เฆ, เบ แกวะ ปา.
9อี มูห มาฆา, เซ แฮะ มึห กูก มึห แฆด, เบ แฮะ ปึอน โฮม ดอน โมยว. 10มาแล, โดว ซัด อี กอย แคง อึม, เซ อาว มึห กูก อาว มึห แฆด, เบ ตู ปึอน โฮม. เบ โลว มาด อึณ มูห โดว ซัด อี ตู ซีงา.
11บอ มาซีม อี ซีงา โดบ ปี ดัม ดารา เบ แฮะ ปึอน โฮม ดอน โมยว. 12-18มาซีม ปี ตู ปึอน โฮม เบ, อี หมึอม กาอีห หมึอม กาดาต ดี เบ, อึณ บอ มูห มาลังดา, มาฆลาง ตาง, มาตีตูด, มาฆลาง ดอน โมยว, มากาอัะ บอ ดอน โมยว, มาดีโบะ ดอน โมยว, มาซีม แกวัก, มาเบบ กากา, มาตีตูด บอ มาลังดา อี โฮม ยัง โดว อี แฮะ ฮอต ยัม, มาโนกกอน, มาโนกยาง, มาปราณ บอ มากาลัะ.
19-20บอ มาวัะ อี มึห เพียง อี นับ ดี บึณ แบน พึง แบน พึง อี ตู ซีงา โดบ ปี ดัม ดารา, เบ ตู ปึอน โฮม. เซ อึณ ยี มูห โมยว อี มึห เพียง อี แฮะ ซีงา โดบ ปี ดัม ดารา, เบ แฮะ ปึอน โฮม.
21แกวะ โฮม โดว ซัดดาวา อี ยัม ราง อัน. เบ แฮะ ปึอน ดัว ดี ดูอี อาโมยว เฮา อี กอย กาแต เบ, แตห เฆ โฮม. เซ อาว ปาย ตี เบ แฮะ ปึอน ย็อง ฮาว ดี ดูอี มืง เตต มืง ตัะ, แตห เฆ โฮม. เบ มูห ดูอี อี ซีงา บอด ดี อาต เฌาพรา ปี กรึบ เบ. เบ แกวะ ดึห ยัง ฆอน มามัก ฆอน มาบู, วี ดัง กาซู อึม ปู มา อัน.
ลอง ฆึร บูน อู บูน
22แคะ กอย โมยว อี แฮะ ลัต แฮะ แบร แคง มาน แคง โดง นา เบ, เบ โลว กาย็อห เลห ฆึร บูน อู บูน.
23แฮะ ฮอต ปาย ตี เบ โลว ฮาว โดง แฮะ ร็อห อูน เฌาพรา ดี กรึบ อัน. ดี ตี เบ แฮะ ปึอน โฮม รึม ดี อาต เฌาพรา. ปี หลู เบ ฆึร บูน อู บูน ตี, อึณ บอ มูห โหงว บอ อึม มางูน บอ นามัน, ฆอน มาบู บอ ฆอน มามัก อี มูห ฆอน ฆีณ โดว อาโล็ง. เบ โลว โบง ปาย ตี แตห อึณ มาโนว เบ ลอง เหมา ดี ปาย ดี โรวเซ เฌาพรา ปี กรึบ เบ. 24เซ โดง ปี ร็อห อูน เฌาพรา ตี แฮะ โต็ง กาเซา, เซ เฌาพรา แฮะ ม็องการา ดัว ดี เบ, เบ มืร ตู แป ดี ดึห ฮาว ฆึร บูน อู บูน ตี. 25แตห เบ ย็อง โตต, แตห อึณ แบน รึอน. แฮะ ฮอต, แตห เบ วี ดึห รึอน ตี, ฮาว โดง แฮะ ร็อห อูน เฌาพรา, แตห เบ กรึบ อัน ดี ตี. 26ปัน ตี เบ บอ วี ฮาว จึห ยัง ปี ซี โฮม เบ, จึห ยัง มัก, ยัง มาบู, อึม มางูน, อึม ป็อห ปอ โมยว, จึห ดอน โมยว แคะ ปี ซี โฮม เบ, แตห เบ โฮม ดี ตี. บอ เบ บอ ดูอี แคง อึณโฮม เบ, แตห เบ บอกาเฆลียด โฮม ดาคึย, โฮม โบยว โบยว ดี อาต เฌาพรา ปี กรึบ เบ. 27เบ แกวะ ปีว เฆ ดูอี อาเลวี อี กอย โดบ เบ แคง มืง เบ. เฆ ตู ปึอน คาฆูน ปี เบ.
28ดอน เฌณ วาย แฮะ ฮอต โอย ซีนัม, เบ โลว ดึห โตต ปี หลู เบ ฆึร บูน อู บูน, ตัห กาฌูะ แคง มืง โดง กอย เบ. 29ฌึร ตี อึณ ดี แบน ปี ดี โฮม เฆ ดูอี อาเลวี อี ตู ปึอน คาฆูน มาเซ บอ เฆ ดูอี อี มูห แคต แคง มืง เบ, บอ เฆ ฆอน ซีปรัห เฆ ยา ซีปรัห อี กอย แคง มืง เบ ตี. ปาย ตี เฆ ปึอน ดี โฮม แพ โฮม ดาคึย. เซ เบ โบง ปาย ตี เฌาพรา ปี กรึบ เบ ดี ม็องการา ดัว แคะ ปี โบง เบ ดอน โมยว.”
Currently Selected:
ดารา 14: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
