ดารา 13
13
ลอง ดูอี กาโลว ดี บยาน โฆรห เฌาพรา
1อาโมวแซ แฮะ วี ต็อห, “เซ อึณ มึห ดูอี มัง อี โดง กอย เบ บอ มูห ดูอี อี ต็อห ดี บยาน โฆรห เฌาพรา บอ มูห ดูอี อี นับ ดี กาตาม อึณบาว บอ ต็อห, เฆ นับ ดี โบง อี หมึอม อาม มัง โมยว, เซ เฆ บอ กาลาง ดี เบ ต็อห, 2‘แตห เอ วี กรึบ เฌาพรา ปอ อู กาดัง,’ เฆ บอ โบง แตห เบ โดบ เฌาพรา ปี ตู นับ เบ. อี หมึอม อาม ปี บยัะ เฆ ปี บอ แฮะ หมาน มืร, 3อาว โลว โทม โฆรห ปี กาลาง ดูอี เฆ ตี. เฌาพรา อี มูห เฌาพรา ปี กรึบ เบ, อัน เทว ดี ยอด น็อห เบ, แตห อัน นับ โยว เบ แฮะ ร็อก เฌาพรา ปี กรึบ เบ, โยว อึณ บา บอ น็อห บอ พึอม เบ. 4เบ โลว โดบ เฌาพรา บอ โยว มี อัน. แตห เบ โทม โฆรห อัน บอ โบง โดบ ปี อึง อัน, แตห เบ บอ กอย กาดึก กาด็อะ ดี อัน เฌา. 5ยี มูห ดูอี อี บยาน โฆรห เฌาพรา ตึอน บอ ดูอี อี นับ ดี กาตาม อึณบาว ตี, เบ โลว ง็อห แวน เฆ. โคว, เฆ แฮะ กาซูห เบ, แตห เบ วี กาบัห ดี เฌาพรา อี แฮะ คยอด เลห เบ แคง มืง แอฆึบ อี มูห โดง แปะ แฮะ ดึอม กอย เบ บอ แบน หมาย อี เฮา. ดูอี ฌึร ตี แฮะ ฮาย กาเซา. เฆ แฮะ เทว ดี โบง แตห เบ แวน ดารา ปี โลว โดบ เบ, ปี กาลาง อูน เฌาพรา ดี เบ. โคว, เฆ โลว ยัม. เบ บอ โลว ดึห แวน อี ตู หมึอม กาแต เบ.
6เซ อึณ บอ มูห อีกัด เบ, วา เบ, ฆอน อีบึณ เฆ ฆอน อีมาย เบ บอ อีบึณ ปี ร็อก เบ, ฆึก อี กาล็อะ ดี เบ, เซ เฆ วี เทว ดี กาซูห เบ ต็อห, ‘แตห เอ วี กรึบ เฌาพรา ปอ อู กาดัง,’ อี มูห เฌาพรา ปี ตู นับ เบ บอ ปี ตู ดึอม นับ ฆูณ ดัง เบ, แกวะ โทม โฆรห เฆ ตี. 7บอ มูห เฌา ปี กรึบ อี เฮา อี แฮะ กอย โรบ เบ ดอน บลาก, อึณ บอ มูห เฌา อี กอย โดง กาตัด บอ โดง กาโต็ง, 8เบ แกวะ แตห อี ปึอน ดี เกา เบ. แกวะ แตห เบ โทม โฆรห ตี. เบ มืร อาว โลว กาเว เฆ, อาว โลว หลัยะ เฆ. เบ โลว แวน เฆ อี กาซูห เบ ปาย ตี. 9เบ โลว ง็อห ยัม ดูอี ฌึร ตี อาคาคัร. วี อี แฮะ โทม โฆรห ปี กาซูห เฆ ตึอน, อัน โลว ดึห มาว, วึณ ดี อาต อี เฮา ดอน อี. แฮะ ฮอต, บอ เฆ ดูอี กืน โลว วึณ. 10แตห เบ วึณ, แตห ดูอี ตี กอ ยัม. โคว, อัน แฮะ กาซูห เบ, แตห เบ วัห เฌาพรา อี มูห เฌาพรา อี แฮะ คยอด เลห เบ แคง มืง แอฆึบ อี มูห โดง แปะ แฮะ ดึอม แบน เบ หมาย อี เฮา. 11เซ เบ โบง ปาย ตี เฆ ดูอี อีซาเรลัะ ฮี ยึร ลอง อัน ตี, เฆ บอกาเฆลียด ดี บอ โยว กาเซา. อาว ฮู มึห อาเซ อี ยัะ วี โบง ฮาย โบง มืก ฌึร ตี ปอ อู เฌณ.
12-14วาย เฌาพรา แฮะ ฮอต แตห เบ กอย แคง มืง แบน มืง, เซ อึณ มึห ดูอี มัง อี กาแต เบ แคง มืง อู มืง อี แฮะ ฮาย กาเซา, เฆ ดี แยต ดูอี แคง มืง เฆ กาลึบ. เซ เฆ ดี ต็อห, ‘แตห เอ ฮาว กรึบ เฌา ปี กรึบ อี เฮา,’ อี มูห เฌา ปี ตู ดึอม นับ เบ. เซ เบ ยึร ลอง อัน ตี, เบ โลว ดีหมอด ซีคยา โยว แฮะ หมาน ตู หมาน. เซ เบ บอ นับ ซีคยา, ลอง อี หมึอม กาอีห ฌึร ตี แฮะ หมาน, 15เบ โลว ง็อห ยัม โตต ดูอี แคง มืง ตี บอ โดว ซัดดาวา เฆ. เบ โลว ปยาต แวน มืง ตี บอ มืง. 16เบ โลว ดึห แคะ กอย โกรวกราม เฆ บอกาเฆลียด, ตัห กาฌูะ อูน ดีฆลัะ กาแต มืง. เบ โลว ดึห บอ เงา, โดะ มืง ตี บอ โกรวกราม เฆ, แตห อึณ แบน ปี หลู ดี เฌาพรา อี โดะ ดี เงา. เบ โลว เบลห มืง ตี แตห อึณ ราม เซเซ. อาว ปึอน วี แด วี อึณปราย ดอ เหมา. 17โกรวกราม แปะ แฮะ ดืง แฮะ เอห โอว แตห อึณ ลึร ชึม, เบ ตู ปึอน ดึห อูน ดี เบ คอ อู โมยว. เซ เบ โบง โดบ ปาย ตี เฌาพรา ดี บอ ปีหราย น็อห รู อัน. อัน เฌา ดี บอ วี กาเว เบ, วี แตห เบ แบร กืน, แตห อึณ โดบ ปี ดึอม กาแซณ อัน ดี เฆ ฆูณ ดัง เบ. 18โกบ โทม เบ โฆรห เฌาพรา ปี กาลาง โอว ดี เบ อาตึร นี บอ โกบ โบง โดบ เบ ดารา อัน ดอน โมยว, อัน เฌา ดี บอ โบง ปาย ตี.”
Currently Selected:
ดารา 13: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
