ดารา 11
11
ลอง โลว ร็อก เฌาพรา
1อาโมวแซ วี ต็อห, “แตห เบ ร็อก เฌาพรา ปี กรึบ เบ บอ โบง โดบ เซเซ ดารา อัน ดอน ณ็อง แคะ ปี ดัม อัน ดี เบ, แคะ ปี กาลาง อูน อัน บอ ปี จัร อัน เบ โบง. 2อาตึร นี, แตห เบ โหลห ลอง แปะ แฮะ มาโนว เฌาพรา ปี กรึบ เบ ดี เบ. อึณ มูห เบ อี แฮะ ยึร อี แฮะ คัม ลอง อัน ตี. อาว มูห หลูกหลาน เบ. เบ แฮะ ยึร แคะ แฮณ ปี โบง อัน, แคะ ตาง ปวน อัน บอ อาพูง ดังโคว อัน. 3เบ มืร แฮะ ยึร อี หมึอม อาม กาเซา แปะ แฮะ โบง อัน แคง มืง แอฆึบ. เบ แฮะ ยึร บอ แปะ แฮะ โบง อัน เฌา ดี คูนดีคัม แคง มืง แอฆึบ บอ ดี มืง ปี อึบ อัน. 4เบ มืร แฮะ ยึร แคะ ปี โบง อัน ดี ดา ซึก เฆ ดูอี แอฆึบ ดอ คูงครัห เฆ โดบ ดี ปัน เบ. อัน เฌา แฮะ แตห อึม ดี โหนง เรณ วี อึณปูน เฆ บอ ลักเลา บอ มังปร็อง เฆ, แตห เฆ ลึร ชึม โตต. 5เบ มืร แฮะ ฮอต ยึร โตต แปะ แฮะ โบง เฌาพรา ดี เบ, แตห อึณ กอ วี ฌัม ดอ ตัห กอย เบ ดี นี. 6แตห เบ โหลห บอ แปะ แฮะ โบง อัน เฌา ดี อาดาทาน บอ ดี อาพีรัม อี มูห ฆอน อาเอลีอาบ แคง ครึร อารูเบน. เบ ดอน อี แฮะ ยึร กาดาย แฮะ มาอัะ หณอด เฆ ดี อาต เบ. แฮะ หณอด บอ ดูอี แคง อึณโฮม เฆ, บอ ทึบ บีก เฆ, บอ หมาย บอ โดว ซัดดาวา บอ โกรวกราม เฆ บอกาเฆลียด. 7แฮะ มูห เบ นี อี แฮะ ยึร อี หมึอม อาม กาเซา แปะ แฮะ โบง เฌาพรา ฌึร ตี ดอน โมยว.
ลอง อี หมึอม แคง มืง กานัณ
8โคว, แตห เบ โบง โดบ ดารา เฌาพรา ปี กาลาง โอว ดี เบ อาตึร นี ดอน โมยว. เซ เบ โบง ปาย ตี เบ ดี มึห โปลม มึห แฮณ, แตห เบ ปึอน ดี ฮาว กาโลห อึม แบลง ยอดาน, ดึห มืง โดง ดี ลึบ ฮาว เบ ตี. 9แตห อาซาก เบ โต็ง ดอ กอย เบ แคง มืง บอด มืง หมึอม, มืง แปะ แฮะ ดืง แฮะ กาแซณ เฌาพรา ดี ดัว ดี ฆูณ ดัง เบ บอ ดี หลูกหลาน เฆ. 10มืง ปี ดี ฮาว ดึห เบ ตี, อึณ ตู ปี มืง แอฆึบ, โดง แฮะ ดึอม กอย เบ. แคง มืง แอฆึบ ตี, เบ แฮะ ดึอม ซัม โหงว เบ บอ รึก อึม ดี โดง นา เบ, แตห อึณ ปี ปี โบง เบ แคง กาปึม ปี ซัม เบ เดา. 11อี มูห มืง โดง ดี ฮาว กอย เบ ตี, อึณ บอ มึห ดีลัยะ มึห นอน. อึณ บอ มูห กาดาย อี โด็ง ซีคยา อึม ฆลาย. 12เฌาพรา อี มูห เฌาพรา ปี กรึบ เบ, อัน ดี ยอด ลึมลา กาดาย ตี. อัน ดี ยอด แมน กาดาย ตี ซีณ ฆีณ ซีนัม, แตห อึณ กอ ฌัม ปัน ดี โตต ซีนัม.
13ปาย ตี แตห เบ โทม ซีคยา ดารา ปี กาลาง โอว ดี เบ อาตึร นี, แตห เบ แตห บอ น็อห บอ พึอม เบ บอ โตต ร็อก เฌาพรา ปี กรึบ เบ บอ โบง โดบ ปี กาลาง อัน ดี เบ. 14เซ เบ โบง ปาย ตี เฌาพรา มืร ดี แตห ฆลาย โจห ดอ มูห อาคราว อัน. บอ ฆลาย อาคราว ดียาง บอ ฆลาย อาคราว ดีเรา, แตห เบ บอ ปึอน ดี แฆบ อูน โหงว เบ, บอ เบล มางูน บอ เบล นามัน เบ. 15อัน เฌา ดี แตห บอ เปต ลัต แคง ฆลัง, แตห อึณ แบน ปี ดี โฮม โดว ซัดดาวา เบ. อัน ดี แตห บอ เบ ปึอน ดี โฮม แพ.
16แตห เบ ซาดีก, แกวะ แตห อี เฮา กาซูห เบ ฮาว มูด กรึบ เฌา ปอ กาดัง. 17เซ เบ โบง ปาย ตี เฌาพรา ดี รู กาเซา ดี เบ. อัน เฌา มืร ตู แตห ฆลาย โจห, แตห กาดาย โดง รัณ เบ กาฮ็อห ต็อง, อาว ปึอน ซัม ดี โฮม มาเซ. เบ มืร ดี เจว ลึร, เจว ชึม แคง มืง บอด มืง หมึอม ปี ดัว เฌาพรา ดี เบ ตี. 18เบ โลว ดึห โฆรห ปี กาลาง โอว นี, แตห อึณ ลึบ แคง น็อห แคง พึอม เบ. เบ บอ โลว ดึห ดารา ตี, ปัก ดี แด เบ บอ ดี กาต็อห เบ, แตห อึณ แบน อี ดัว ซาดีก ดี เบ. 19แตห เบ วี มาโนว ดารา ตี บอ ดี หลูกหลาน เบ. เบ บอ กอย แคง กาง, เบ บอ ฮาว โดบ อึณเตณ, เบ บอ ดีเหลา บอ ยีต, แตห เบ ลาย กามวน ลาย แค ลอง ดารา ตี. 20แตห เบ แดม ดารา ตี, ดึก ดี ร็อง มาโลห กาง เบ บอ ดี ร็อง บาง มาโลห แวง เบ. 21เซ เบ โบง ปาย ตี บอ โจว เบ บอ โจว ฆอน โจว หลาน เบ, เบ ดี บอ มึห อาซาก โต็ง บอ ปึอน กอย แคง มืง ปี กาแซณ เฌาพรา ดี ดัว ดี ฆูณ ดัง เบ. อึณ ดี บอ เหลณ แคะ กอย เบลณ อี ปลึก กาดาย.
22แตห เบ ซาดีก ดี โบง โดบ ดารา ปี ดัว อัน เฌา ดี เบ ตี. แตห เบ ร็อก เฌาพรา ปี กรึบ เบ บอ โบง โดบ ดารา อัน ดอน โมยว บอ กอย กาดึก กาด็อะ ดี อัน เฌา. 23เซ เบ โบง ปาย ตี เฌาพรา ดี โฮว แวน อาโมยว ดูอี เฆ ตี ปัน ดี ลึบ เบ แคง มืง เฆ ดูอี อี กืน หลึอม เบ บอ มึห โปลม เฆ แฮณ อี กืน หลึอม เบ. 24กาดาย โดง แณต ฮาว เบ ตี ดี บอ แบน กาดาย เบ. มาน มืง เบ ตี, อึณ ดี บอ ปีว็อห ปีเลห, จูห ดี แปร กาฮ็อห อี กอย บลาก นา เตต, กอ วี โฮะ ฌัม ดี นอน เลบานูน อี กอย บลาก นา กัว. นา เลห ซีแง มืร, อึณ บอ จูห ดี แบลง อึม อูพาราด กอ วี ฌัม ดี อึม นัมมูกซารา อี กอย บลาก นา เฆต ซีแง. 25แคง มืง โดง ดี ฮาว กอย เบ ตี, เบ บอ ฮาว ฌัม ดี เหมา มืร, เฌาพรา ดี โบง แตห อี เฮา โยว เบ, แกวะ แตห อึณ มึห อาเซ อี ยัะ แคร ยัะ แร เบ. อึณ ดี บอ โดบ แคะ ปี ดึอม ดัว อัน เฌา กาดีก ซัดฌา.
26อาตึร นี โอว แฮะ กาลาง บอ ลอง ปี ม็องการา บอ ลอง ปี ดี ดืง เฌาพรา ดี เบ. 27เซ เบ บอ โบง โดบ ดารา เฌาพรา อี มูห เฌาพรา ปี กรึบ เบ, โบง แคะ ปี ดัม อูน โอว ดี เบ อาตึร นี, เบ ดี ปึอน ม็องการา ปี กาแซณ เฌาพรา ดี ดัว. 28เซ เบ ยี ตู โทม ดารา อัน, วี วัห อึณเตณ อัน, วี ฮาว กรึบ เฌา ปอ กาดัง ปี ตู ดึอม กรึบ เบ, เบ ยี โลว คัม กาซัม ดืง. 29ดอ แฮะ ฮอต เฌาพรา แยต ฮาว เบ แคง มืง ตี, เบ โลว ดึห โฆรห ม็องการา ตี, วี ฮาว กาลาง แดง นอน ฆีราเจม. อี มูห โฆรห กาซัม ดืง ตึอน, เบ โลว วี ฮาว กาลาง แดง นอน เอบาน. 30นอน อา โบ็ง ตี กอย นา เฆต ซีแง วาย แฮะ กาโลห อึม แบลง ยอดาน. อึณ บอ มูห แคง มืง เฆ ดูอี กานัณ อี กอย แคง ฆลัง อี จืร อาราพัะ โคบ เฮ ตาง ปี กรึบ เฆ. อึณ บอ กอย กาตัด มืง ฆีลัะฆา. 31อี มูห เบ, อาว เหลณ เบ ดี กาโลห อึม แบลง ยอดาน, ฮาว ดึห มืง ปี ดี ดัว เฌาพรา ดี เบ. เซ เบ แฮะ ฮอต ปึอน ดี อึบ มืง ตี, 32เบ โลว ซาดีก, แตห เบ โบง โดบ ดารา บอ ปี ดัม เฌาพรา ดอน โมยว ปี กาลาง โอว ดี เบ อาตึร นี.”
Currently Selected:
ดารา 11: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
