กซ 2

1โอว ซี แตห เบ นับ แคะ แฮะ โฆยวฆยา โอว ดี โบง ฆาน อาดา เบ, บอ อาดา เฆ บีนอง อี กอย แคง มืง ลอดีกี, บอ อาดา เฆ บีนอง อี หณัม ดึอม ยึร โอว คอ อู เฌณ. 2โอว โฆยวฆยา ปาย ตี, แตห เฆ มึห น็อห โปลม, แตห เฆ ลาย โพรม รึม, แบน อู น็อห โกบ ลาย ร็อก เฆ. เฆ ดี บอ ปึอน อางยาน อี บอด, อี เฌะฌูง, แตห เฆ บอ นับ ปี ตู ดึอม กาลาง เฌาพรา ดี อี. ปี ตู ดึอม กาลาง เฌาพรา ตี, มูห ลอง เฌา เยซู. 3อึณ มูห เฌา เยซู ตี, อี แฮะ นับ โตต ดอน โมยว ลอง อางยาน เฌาพรา บอ ลอง ปี ปาย แบน โมยว แบน โมยว. 4โอว กาลาง แตห เบ นับ ลอง อัน ตี. แกวะ แตห อึณ มึห อาเซ ปึอน ดี เกา, ปึอน ดี กาโลว เบ. 5โอว ปี บอ แฮะ กอย โต็ง เบ มืร, น็อห พึอม โอว ยี กอย รึม โดบ เบ. โอว แฮะ โคย กาเซา โกบ แฮะ ยึร โอว ลอง แฮะ นับ เบ ดี โบง โตต ดอน โมยว แตห อึณ หมึอม, แตห อึณ ซีคยา. โอว มืร แฮะ ดาคึย โกบ ยึร โอว ลอง น็อห หณึม เบ ดี เฌา เยซู, อึณ แฮะ มัน ซีคยา.

6โคว อัน ตี แตห เบ บอ โบง ฮาว ปาย ตี. เบ มืร แฮะ ฮอต บาง เฌา เยซู อึบ น็อห เบ. ปาย ตี, เบ บอ โลว โบง โดบ ปี ต็อห อัน เซเซ. 7แตห เบ หณึม ซีคยา เฌา เยซู, แตห อึณ ปี เรียห เฮ อี กอย แคง กาดาย, อี แตห เฮ แกร ดี ตาง. แตห น็อห หณึม เบ มัน ซีคยา, แตห อึณ โดบ ปี มาโนว เย ดี เบ. แตห เบ บอ อืบ บอ ดาง ฆูง เฆฌู ดี เฌาพรา เซเซ.

8แตห เบ ซาดีก, แกวะ แตห อึณ มึห อาเซ อี แป ดี กาลาง แตห ปี มาโนว ดูอี วี อึบ เบ. ปี มาโนว ฌึร ตี, อึณ ตู มูห ปี มาโนว เฌา เยซู. อึณ ตู หมาน. อึณ มืร ตู มึห ดีโคว. อึณ โดบ ฮีด เฆ ดูอี บอ ปี มาโนว กานัม อี อึบ กาดาย นี.

9โคว, แคะ บอ มึห อี กอย ดี เฌาพรา ดอน โมยว, อึณ แฮะ กอย โตต โดบ เฌา เยซู ดอ กอย อัน แดง กาดาย นี. 10บอ เบ แฮะ ปึอน โตต ฌึร ตี ดอน โมยว ดอ กอย รึม เบ โดบ เฌา เยซู. อัน แฮะ อึบ โตต ดอน โมยว แคะ กอย อาโมยว อี มึห ปวน อี ปึอน ดี อึบ ดูอี. 11โกบ หณึม เบ ดี เฌา เยซู ตี, เบ อาว ฮู โลว แตห ดูอี ซัวะ แวน ฮูน ลัะคานา เบ. เบ แฮะ ฮอต แวน โดว บรีม เบ, โดบ เฌา เยซู. อึณ ปี เฌา เยซู แฮะ ซัวะ แวน น็อห บรีม อี นับ ดี โบง หมาบ เซเซ.

12ดอ จึบ เบ แคง อึม, อึณ ปี เบ แฮะ คัม ดี ยัม โดบ เฌา เยซู. ดอ อัน ตี อึณ บอ ปี เบ แฮะ วี ยีต วี อีม โดบ เฌา เยซู. โกบ หณึม เบ อาพูง ดังโคว เฌาพรา อี แฮะ แตห เฌา เยซู วี ยีต วี อีม, บอ เบ แฮะ ปึอน อาซาก กามาย. 13อาต นี เบ แฮะ ปี ดูอี ยัม โกบ หมาบ แปะ แฮะ โบง เบ. เบ มืร หณัม แวน โดว บรีม เบ. โคว, อึณ ปี เบ ตู คัม ดี ซัวะ แวน ฮูน ลัะคานา เบ. ดอ ตี นี เฌาพรา ยี แฮะ ฮอต วี ดัว อาซาก กามาย ดี เบ, แตห เบ กอย รึม โดบ เฌา เยซู. อัน แฮะ ฆ็อห แวน หมาบ เอ บอกาเฆลียด. 14อัน แฮะ ฮอต บยัด แวน ฌาราง หมาบ เอ, อี แดม แคะ ตู โดบ เอ ดารา. อึณ ปี อัน แฮะ วี ดึห ฌาราง ตี, วี ดอก ดี ร็อง กาแวะ. 15ดอ คัม อัน ดี ยัม แดง ร็อง กาแวะ ตี, เฌา เยซู แฮะ ออง โตต กานัม อี มึห ปวน, อี ปึอน ดี อึบ ดูอี. อัน แฮะ ปัก เฆ, วี บยัะ แตห ดอน อี ปึอน ดี ยึร ลอง เฌา เยซู แฮะ แป เฆ.

16โกบ อึณ ปาย ตี, แกวะ แตห เบ หณึม อาเซ อี ต็อห เบ มึห หมาบ โกบ ปี ดี โฮม เบ. แกวะ แตห อาเซ จัร เบ กัม ซีแง แกม ซีณ, ซีแง ซาดาง, ซีแง ลืนลับ, ลืนโมน. 17ลอง ฌึร ตี, อึณ แบน มี อูพามา อี ดี แบน นา อาต นี ฮาว. อี แฌด, อี หมาน อาคาคัร ยี กอย ดี เฌา เยซู. 18แกวะ แตห อึณ มึห คอ อู วี อี แป ดี พาด ดึห อาฆยึร ปี ดี ปึอน เบ. ดูอี ฌึร ตี, อัน นับ ดี ณึงราง มึห น็อห โฆม บอ อึง ดี กรึบ อามู อามาด เฌาพรา. อัน บอ นับ ดี แค แบน โมยว แบน โมยว ลอง ลักซานา อี บอด แปะ แฮะ ยึร อัน. อัน บอ ปีคึก น็อห อัน, ยี ตู นับ มาเซ ลอง น็อห พึอม เฌาพรา. อัน บอ โดบ ปี กาพา ดูอี, อี ตู มึห ดีโคว. 19ดูอี ตี, อัน อาว ฮู บึง เฌา เยซู อี ปี ฆีณ เอ. ฆีณ ตี บอ แตห โดว โบ็ง บอ โดว เหรห ตาง. โกบ มึห โดง กาดูต กาซ็อง กาอาง ดอน โปละ, โกบ มึห ซีนัะ อี แตห อึณ ลาย กาดึก, โดว ตี มึห โปลม. เฌาพรา บอ โบง แตห โดว ตี แกร ดี เหรห, แกร ดี ตาง.

20อึณ ปี เบ แฮะ ฮอต ยัม โดบ เฌา เยซู. โคว, กานัม อี อึบ กาดาย มืร ฮู ปึอน ดี อึบ เบ. เซ อึณ ปาย ตี, เหมา อึณ ปาย ปี วี โบง เบ แคะ ปี ดึอม โบง เบ อาต นี? เหมา อึณ ปาย ปี วี โทม เบ ดารา อี ต็อห, 21“แกวะ ปา, แกวะ โฮม, แกวะ ดึร, แกวะ ปรัร.” 22โกรว ฌึร ตี, อึณ บอ มูห โกรว อี นับ ดี ลึร, นับ ดี กาปยาต ดอ แฮะ ตา เอ. โคว, ดารา ฌึร ตี, อึณ บอ มูห ปี โบง ดูอี.

23เซ เอ ยึร ดารา ฌึร ตี, เอ บอ ทาง อึณ มูห อางยาน บอด. โคว, โลว กรึบ อามู อามาด เฌาพรา เฆ กานัม. อึณ บอ แตห อี ปีเตียม น็อห, บอ คาหนาบ โดว บรีม เฆ. เฆ ยี ตู แป ดี อึบ ปี อึง โดว บรีม เฆ. โคว, อึณ ตู มึห ดีโคว มาเซ.

Currently Selected:

กซ 2: pce

Highlight

Copy

Compare