อาโมวซา 6
6
ลอง มืง อีซาเรลัะ ดี ลึร ชึม
1เบ ดูอี อี แฮะ กอย ดาคึย ดาคึย, เบ อี ตู มึห ปี ดี โลว มาเซ, อี กอย แคง มืง เยรูซาแลม บอ แคง มืง ซามารี, เบ อี มูห ดูอี บอด กาแต เฆ ดูอี กืน บอ เบ ดูอี ปี บึง ฮาว เฆ ดูอี อีซาเรลัะ, เบ ดี ฌัม ดูก ตาง.
2แตห เบ ฮาว ยอด มืง กาเลน, ปี วี ฮาว ดี มืง ฮามาด อี ตาง, แตห เบ วี โลง ดี มืง อาฆัะทัะ อี มูห โดง กอย เฆ ดูอี พีลีที. เบ ดูอี อายูดา บอ ดูอี อีซาเรลัะ ตู หมึอม หลึอม อี เฮา. เฆ ดูอี แคง มืง เฆ ตี แฮะ ฌัม ดูก ตาง.
3เบ ตู ซี เฌณฌา ลอง ซีแง อี ตู หมึอม ตี. เบ ยี โบง แตห ดูก ตาง ตี เจว ตัห.
4เบ อี อีด กาณาด แดง กาโช็ง อีด อี แฮะ โบง ตา แปละ มาซาง, แตห อึณ ชีด กาเซา บอ เบ อี โฮม ฆอน มาบู บอ ฆอน มามัก อี แฮะ ซีแงห กาเซา, เบ บอกาเฆลียด ดี ฌัม ดูก ตาง.
5เบ อี ต็อห โหมว บอ บัห ดีง, เบ ทาง เบ แฮะ แหลว ปี คูนดีคัม อาดาวีด ตึอน. ปี ต็อห เบ โหมว ยี ตู มึห ดีโคว.
6เบ อึง ดี ดึห ซีลัยะ เฆ ก็อก, เดียง อึม มางูน กืน กาเซา. เบ ดึห นามัน อูห หงูน, วี พ็อห ดี โดว เบ. เบ ยี ตู เฌณฌา ดูอี อาโมยว เบ อี แฮะ ฌัม ดูก ตาง.
7โกบ อึณ ปาย ตี เบ โลว คัม อี เหมต ฮาว เบ ดี อาต. โฆรห ดูอี บอ ฮัม ปี โบง เบ บลอย อี ซีนัน ซีนืง, อึณ ดี หราย อู เฌณ.
8เฌาพรา อี อึบ โตต ดอน โมยว แฮะ ฆาว ปวน อัน บอ ดืง ต็อห, “โอว กาอีห กาเซา น็อห ปีคึก เฆ ดูอี อีซาเรลัะ. โอว บอ ฌ็อง ปี ณึงราง เฆ อี มึห อาพูง ดังโคว. โอว บอ ฌ็อง กาง เฆ อี ชีด กาเซา. โอว ดี ดึห มืง เฆ ตี บอ อี กอย แคง มืง เฆ ตี บอกาเฆลียด, วี อาบ ดี รันซู เฆ.”
9เซ ดูอี ฆึร วี ปี บอ แฮะ กอย กาฌูะ แคง กาง อู กาง, เฆ ดี ยัม โตต. 10เซ อึณ มึห บีนอง วอแว อี ดี ดีบ โดว ยัม เฆ ตี, เซ อัน ลึบ แคง กาง, ต็อห ดี ดึห แวน โดว ยัม เฆ ตี, อัน วี ดีหมอด ต็อห, “อึณ ซี มึห อี ซี กอย ซี ฆีด โดง กอย นี?” แฮะ ฮอต ดีหมอด ปาย ตี ปอ อู วี ดี เวียะ โฆรห ตี ต็อห, “อาว ฮู มึห คอ อู วี.” แฮะ ฮอต ดูอี ตึอน ปี วี ต็อห, “แกวะ ต็อห มาเซ ลอง เฌาพรา. โฆรห แม ดี บอ ลึห ดี อัน เฌา.”
11บัร เบ ยอด, เซ เฌาพรา ดัว อามีง, กาง อี ตาง ดี กาปยาต ลึร โตต. กาง อี ดีแตด มืร, อัน เฌา ดี บอ แตห อึณ ลึร โตต.
12มังปร็อง ตู ปึอน กาแบลบ ฮาว แดง ดาอาง มาว. ดูอี มืร ตู ปึอน ดึห มามัก, แท ดาอาง มาว. ปาย ตี อึณ ตู มึห ดีโคว เซ เบ ซูงพยาด อามู อี ตู โดบ นา มูห นา หมาน, แตห อึณ ปี เบ บยอง อี หมึอม, วี โบง แตห อึณ ซ็อง.
13เบ แฮะ ปีคึก น็อห เบ ต็อห, เบ แฮะ ออง มืง ลอเดบา. เบ มืร แฮะ น็อห ตาง ต็อห, อึณ มูห ปวน เบ เฆ แฮณ เบ อี แฮะ แป มืง คาเนอีม.
14เฌาพรา ปี วี ต็อห, “อาว เหลณ โอว ดี แตห รันซู เบ ตัห กาโฆห ดี เบ. เฆ ดี คาหนาบ กาเซา เบ แคง มืง บอ มืง. จูห ดี มืง เลโบวฮามาด อี กอย นา กัว, แตห อึณ กอ ฌัม ดี ดีลัยะ อาราพัะ อี กอย นา เตต.”
Currently Selected:
อาโมวซา 6: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
