ปร 21

ลอง อาปอลู ฮาว มืง เยรูซาแลม

1เย แฮะ ฮอต ลาย กาย็อห ดี เฆ ดา ตาง ตึอน, เย วี ป็อะ รึร ซังโพว ฮาว ซืร ฌัม มืง โควซัะ. ปา แคหณา เย วี ฮาว ฌัม มืง โรวดู, แฮะ ฮอต, เย วี ฮาว ฌัม บอ มืง พาทารา. 2แคง มืง พาทารา ตี, เย ยึร รึร ซังโพว อู หลาง, อี ฮาว ซืร ฌัม มืง พีนีก. เย วี ลึบ ป็อะ รึร ซังโพว ตี. 3ปัน ตี รึร ซังโพว วี กาโลห ฮาว ฆูน อึม อี จืร คูโพรว อี กอย บลาก อาฆัะ เย. แฮะ ฮอต, เย วี ฌัม มืง ทูโรว, อี กอย แคง กาดาย มืง ซูรี. ดี มืง ทูโรว ตี, เฆ คยัะ บอ ดึห เลห โกรวกราม ปี ดาง รึร ซังโพว. 4วาย อัน ตี เย วี ฮาว โดง กอย เฆ ดีแบ เฌา เยซู แคง มืง ตี. เย บอ กอย แคง มืง ตี อาดา บู ซีแง. เฆ ดูอี อี หณึม เฌา เยซู แคง มืง ตี, เฆ วี กาลาง ดี อาปอลู แคะ ปี บยัะ น็อห พึอม เฌาพรา ดี เฆ. เฆ ต็อห, “แกวะ ฮาว ลึบ มืง เยรูซาแลม.” 5วาย แฮะ โนะ บู ซีแง, เย วี เลห แคง มืง ทูโรว. ดอ เลห ฮาว เย แคง มืง ตี, เฆ ดีแบ เฌา เยซู บอกาเฆลียด, บอ เฆ อีบึณ บอ ฆอน, เฆ วี ฮาว รึม โดบ เย, ตึย อึณเตณ เย. เย แฮะ ฮอต ตัห ฌัม โคบ อึม, เย บอกาเฆลียด วี ครึบเครา, ซาคึร เฌาพรา. 6แฮะ ฮอต, เย บอ วี ควาง เฆ เวณ. อี มูห เย, เย บอ วี ฮาว ลึบ แคง รึร ซังโพว.

7เย แฮะ ฮอต เลห แคง มืง ทูโรว, วี ตัห ฌัม มืง พาโทวแลม. แคง มืง พาโทวแลม ตี มืร, เย วี ฮาว วีน ดี เฆ บีนอง, วี กอย รึม โดบ เฆ อาดา อู ซีแง. 8ปา แคหณา เย วี เลห, วี ฮาว ฌัม มืง เกซาเร. เย วี ฮาว กอย แคง กาง ดูอี อู วี อี จืร อาพีลีบ. อัน มูห ดูอี อี โฮว ดารา ลอง เฌาพรา คยอด ดูอี. แคง ดูอี บู วี ปี ดึอม ร็อห เฆ แคง มืง เยรูซาแลม, อึณ บาะ บอ อัน. 9อาพีลีบ ตี, อัน มึห ฆอน อีบึณ พวน วี. เฆ มูห ดีบยา บอ นับ ดี บยาน โฆรห เฌาพรา.

10ดอ กอย เย แคง กาง อาพีลีบ, วาย พวน พัน ซีแง, อึณ วี มึห ดูอี อู วี อี บยาน โฆรห เฌาพรา. อัน จืร อาฆาบู. อัน แฮะ ตัห อืง ยูดา ฮาว ฌัม โดง กอย เย ตี. 11อัน แฮะ ฮอต ตัห ฌัม, อัน วี ดึห แซะ อาปอลู, วี ปัก แด เฆ เปลา อัน. แฮะ ฮอต อัน ต็อห, “อึณ มูห น็อห พึอม เฌาพรา อี ต็อห, ‘ดูอี อี มูห ดา กาณา แซะ นี, อัน ดี คัม เฆ ดูอี อายูดา เหมต ปัก อัน ปาย นี ดอ ฌัม อัน แคง มืง เยรูซาแลม. เฆ ดี บอ อาบ อัน ดี ดูอี อี ตู นับ เฌาพรา.’”

12วาย แฮะ ยึร เย โฆรห ตี, เย บอกาเฆลียด, บอ เย อี ฮาว รึม โดบ อาปอลู, บอ เฆ ดูอี อี กอย มืง เกซาเร ตี, เย วี กาซูห อาปอลู, แกวะ แตห อัน โฮะ ฌัม มืง เยรูซาแลม. 13อาปอลู ยี ต็อห, “เหมา อึณ ปาย ปี ยาม เบ? เบ โบง แตห น็อห โอว กลึร กาเซา. โอว แฮะ ฮอต อูน น็อห ดี โฮะ มืง เยรูซาแลม. แดง ตี, เซ โอว บอ โลว ยัม แคง มืง เยรูซาแลม โกบ หณึม โอว เฌา เยซู, โอว ตู โยว.” 14อึณ ยี แฮะ ลึห ซีคยา, อาปอลู ตู โทม โฆรห เย. โคว, เย มืร ฮู ต็อห มาเซ. เย วี ต็อห, “แตห อึณ แบน ปี โลว เฌาพรา.”

15วาย อัน ตี เย วี แรน โตต ดอน โมยว, แตห เย ฮาว โดบ อึณเตณ ฌัม มืง เยรูซาแลม. 16เฆ ดีแบ เฌา เยซู อี กอย แคง มืง เกซาเร มัง อี, บอ เฆ ฮาว รึม โดบ เย. เฆ ตึย เย ฮาว ฌัม กาง ดา อู วี อี จืร อามาโซน. อามาโซน มูห ดูอี อี ตัห แคง ฆูน อึม อี จืร คูโพรว. อัน บอ มูห ดูอี อี หณึม เฌา เยซู อู ซีณ ดอ โฆว อัน. เฆ วี บาง เย ตัม แคง กาง อัน ตี.

ลอง อาปอลู แฮะ ฌัม มืง เยรูซาแลม

17วาย อัน ตี เย วี ฌัม มืง เยรูซาแลม. เฆ บีนอง แฮะ รวห เย, แตห น็อห เย ดาคึย. 18ปา แคหณา, บอ อาปอลู บอ เย อี โดบ อัน ดอน อี, เย วี ฮาว โดง กอย อายาโกบ ตึอน. บอ อัน บอ เฆ ดา ตาง แคง พึง เฌา เยซู, เฆ ดอน อี แฮะ กอย แคง กาง อัน. 19อาปอลู แฮะ ฮอต ฌัม โดง กอย เฆ ตี, อัน วี ดีหมอด เฆ ต็อห, “เบ แฮะ คัะ ฆยามซา ดอน อี?” แฮะ ฮอต, อัน วี จูห ดี กาลาง โตต ดอน โมยว ลอง แปะ แฮะ โบง เฌาพรา ดี เฆ ดูอี อี ตู มูห อาโมยว ยูดา. ลอง แปะ แฮะ โบง เฌาพรา ตี, อึณ มูห ดอ กอย รึม อาปอลู โดบ เฆ, โบง ฆาน เฌาพรา.

20เฆ แฮะ ฮอต โทม โฆรห ปี กาลาง อาปอลู ตี, เฆ วี จูห ดี อืบ เฌาพรา. วาย อัน ตี เฆ จูห ดี กาลาง โฆรห ดี อาปอลู. เฆ ต็อห, “แม อีกัด เย, แม แฮะ นับ ลอง เฆ ดูอี อายูดา อี หณึม ลึบ เฌา เยซู. เฆ แฮะ กืน แบน แหรณ แบน แหรณ. เฆ ดอน อี ยี ออน ดี โดบ ดารา ยูดา. 21ดูอี เฆ ตี, เฆ แฮะ กาลาง ลอง แม ต็อห, แม แฮะ มาโนว บอ ดูอี อายูดา อี กอย กาแต เฆ ดูอี อาโมยว เฮา, แกวะ แตห เฆ โดบ ดารา อาโมวแซ ตึอน. เฆ มืร ต็อห, แม มาโนว เฆ, แกวะ แตห เฆ ซัวะ แวน ฮูน ลัะคานา ฆอน อีมาย, แกวะ แตห เฆ โดบ ฮีด เอ. 22ดอ ตี นี, เย ตู นับ ปี ดี ปาย เย ดี โบง. เฆ ดืน ดี นับ ซีคยา ลอง แฮะ ตัห ฌัม แม แคง มืง เยรูซาแลม. 23โคว, เย ต็อห ดี แม, แตห แม โทม โดบ ปี กาลาง เย ดี แม. อึณ มึห ดูอี พวน วี, อี แฮะ ดัว กาดีก ซัดฌา ดี เฌาพรา. 24แตห แม แดะ ดูอี เฆ ตี, แตห แม ฮาว รึม โดบ เฆ, แตห เบ โบง แคะ ปี โลว โบง อี ดี แตห เบ ซีงา บอด, แตห อึณ ปี ปี ดัม อูน ดารา ยูดา. แฮะ ฮอต, แตห แม บอ ดัว รึอน ปี โลว เฆ, แตห เฆ กับ ฆีณ เฆ. เซ แม โบง ปาย ตี แตห ดอน อี ยึร, เฆ ดี บอ นับ, โฆรห ปี กาลาง อี เฮา ลอง แม อาว หมาน, อาว มูห. ปัน ตี เฆ ดี บอ นับ, บอ แม มูห ดูอี อี โดบ ดารา ยูดา. 25อึณ ยี มูห ดูอี อาโมยว เฮา, อี หณึม เฌา เยซู, เย แฮะ ฮอต แดม แปะ ดี เฆ ลอง ปี ซูงพยาด เย. แกวะ แตห เฆ โฮม ปี ดึอม หลู อี เฮา ดี อารึบ ราง. แกวะ แตห เฆ โฮม หนาม เฆ ยัง โดว ซัดดาวา อี ตู เลห ซีคยา หนาม อัน. แกวะ แตห เฆ ลาย อีบึณ อี เฮา.”

26วาย อัน ตี ปา แคหณา, อาปอลู วี แดะ เฆ ดูอี พวน วี, แตห เฆ วี ลึบ แคง โฮว เฌาพรา, วี โบง ปี ดัม ดารา ยูดา. เฆ มืร ฮาว กาลาง ดี ดูอี อี หลู ดี เฌาพรา ลอง ซีแง อัน, หนาง ซีแง ซี กอย, อึณ กอ ดี ฌัม ซีแง ดี โลว หลู โดว ซัดดาวา ดี เฌาพรา อาดา พวน วี ตี.

ลอง เฆ เหมต อาปอลู

27ปี คัม เฆ กาดีก ซัดฌา อาดา บู ซีแง, แฮะ รีน ดี โตต. ดอ อัน ตี อึณ มึห ดูอี อายูดา มัง อี. เฆ ตัห อืง อาซียา. เฆ วี ยึร อาปอลู แคง โฮว เฌาพรา, เฆ วี กาซูห ดูอี กืน, แตห เฆ เหมต อัน. 28เฆ วี ซีนัน ซีนืง, ดัด ตาง ต็อห, “อึย เบ ดูอี อีซาเรลัะ, แตห เบ จอย เย. ดูอี นี มูห ดูอี อี มาโนว ดอน นา ดอน โปละ, แกวะ แตห ดูอี โรวเซ ดารา เอ บอ โดง บอด, โดง กอย เอ นี. แดง ตี, อัน แฮะ แดะ บอ ดูอี ฆรีก โดบ อัน, ลึบ แคง โดง บอด นี. อัน แฮะ โบง แตห โฮว นี กาดาต.” 29(ดูอี เฆ ตี, เฆ แฮะ ดึอม ยึร อาปอลู แคง มืง, ดอ กอย รึม ดูอี ฆรีก อู วี โดบ อัน. ดูอี วี ตี จืร อาโทพีมู. อัน ตัห มืง แอแพ. ดอ ตี นี, เฆ ทาง, อาโทพีมู แฮะ วี โดบ อาปอลู ดอ ฮาว ลึบ อัน แคง โฮว เฌาพรา. โคว, เฆ ดัด ซีนัน ซีนืง ปาย ตี.)

30ปัน ตี เฆ ดูอี แคง มืง บอ มืง, เฆ วี ซีนัน ซีนืง. เฆ กาแบลบ ตัห ดอน นา ดอน บลาก, ตัห กาฌูะ อู โปละ. เฆ แฮะ ฮอต เหมต อาปอลู, เฆ วี ดืด อัน เลห แคง โฮว เฌาพรา. แฮะ ฮอต, เฆ วี กาบีด มาโลห แคง โฮว เฌาพรา อู เฌณ. 31เฆ ต็อห ดี ง็อห ยัม อัน. ดอ อัน ตี โบว ตาง โรวมา อี อึบ ดา ซึก อู แหรณ, อัน บอ นับ ลอง มืง เยรูซาแลม บอ มืง แฮะ ซีนัน ซีนืง. 32อัน วี แดะ ดา โบว อี อึบ ดา ซึก อู มาย็อห บอ ดา ซึก มัง อี, แตห เฆ ฮาว โดง กอย เฆ ดูอี กืน อู เฌณ. เฆ ดูอี กืน บอ ยึร ดา โบว โรวมา แฮะ ตัห, เฆ บอ จู มัห อาปอลู.

33ดอ ตัห ฌัม โบว ตาง ตี, อัน ฮาว ซืร โดง กอย อาปอลู. อัน วี จัร อี เฮา ปัก อาปอลู ตา วัน ฮีน อา ณ็อง. แฮะ ฮอต, อัน วี ดีหมอด, อาเซ อัน มูห, มาเซ ปี โบง อัน. 34เฆ ดูอี กืน, เฆ วี ดัด ซีนัน ซีนืง อู วี อู โมยว. โคว, โบว ตาง ตู วี นับ อี มูห อี หมาน. แฮะ ฮอต, อัน วี จัร เฆ ดา ซึก วี ดึห ฮาว อาปอลู โดง กอย เฆ. 35เฆ แฮะ ฮาว ฌัม ดี อึณแตง, ต็อห ดี โฮะ ลึบ แคง โฮว โดง กอย โบว ตาง, เฆ ดูอี กืน วี ซีนัน ซีนืง หลึอม คา อาต. โคว, เฆ ดา ซึก กอ กาดูห ดี โจะ โฮะ อาปอลู. 36เฆ ดูอี กืน ยี ฮาว โดบ เฆ ดา ซึก. เฆ วี ดัด เซเซ ต็อห, “ง็อห แวน อัน.”

37ดอ ตัห ตึย เฆ ดา ซึก ดี อาปอลู, แตห อัน ลึบ โดง กอย เฆ ตี, อาปอลู วี ต็อห ดี ดา โบว ตึอน, “โอว หมาณ ดี กาลาง โฆรห ดี แม.”

โบว ตาง ตี วี ดีหมอด ต็อห, “แม นับ ดี กาลาง โฆรห ฆรีก? 38เซ อึณ ปาย ตี, แม ตู มูห ดูอี อาโมยว แอฆึบ อี แฮะ ดึอม โบง ซีนัน ซีนืง, บอ แยต ดูอี พวน มาย็อห วี, แตห เฆ โดบ อัน ฮาว แคง แปร กาฮ็อห?”

39อาปอลู วี ต็อห, “โอว มูห ดูอี อายูดา อู วี. โอว ตัห มืง ทาซู แคง อืง คีลีคี. มืง บรีม โอว ตี, อาว มูห มืง ดีแตด. โอว มืร หมาณ, แตห แม ควาง โอว กาลาง โฆรห ดี ดูอี กืน เฆ นี.”

40โบว ตาง บอ ควาง อัน กาลาง โฆรห. ปัน ตี อาปอลู กอย นา แดง อึณแตง ตึอน. อัน วี โจะ แด อัน, แตห เฆ ดูอี กืน โทม. เฆ บอ เยน ซีต็อง ดี โทม อู เฌณ. อาปอลู วี จูห ดี กาลาง โฆรห แฮแบร ดี เฆ.

Currently Selected:

ปร 21: pce

Highlight

Compare

Copy