ปร 20

ลอง อาปอลู วี ฮาว ฌัม แคง อืง มาเคโดน บอ แคง กาดาย มืง ฆรีก

1วาย แฮะ วี เยน ปี ซีนัน ซีนืง เฆ ตึอน, อาปอลู วี แดะ เฆ ดีแบ อี หณึม เฌา เยซู. อัน หมาณ, แตห เฆ ควาง อัน วีว. แฮะ ฮอต, อัน เลห โดง กอย เฆ, วี ฮาว ฌัม แคง อืง มาเคโดน. 2ดอ ฮาว อาปอลู แคง อืง มาเคโดน ตี, อัน แฮะ มาโนว กืน เฆ ดูอี. แฮะ ฮอต, อัน วี ฮาว ฌัม แคง กาดาย มืง ฆรีก. 3อาดา โอย มาเฆียน อาปอลู กอย แคง กาดาย มืง ฆรีก. วาย อัน ตี อัน ต็อห ดี วี ป็อะ รึร ซังโพว, แตห อัน ฮาว ฌัม กาดาย มืง ซูรี. ดอ อัน ตี อัน วี ยึร โฆรห ลอง เฆ ดูอี อายูดา แฮะ กาฌูะ, ต็อห ดี ง็อห ยัม อัน ดอ ป็อะ อัน รึร ซังโพว ตี. โคว, อัน มืร วี วีว อืง มาเคโดน. 4อึณ ยี มึห ดูอี บู วี อี ฮาว รึม โดบ อาปอลู, ตึย อัน ฌัม อืง อาซียา. ดูอี เฆ ตี บอ จืร อาโซพาทา, อี มูห ฆอน อาพูรู. อัน ตัห แคง มืง เบเร. อึณ มูห บอ อารีทาคู ฆาย อาเซคูนดู, อี ตัห มืง เทซาโลน, บอ อาฆายู อี ตัห มืง เดเบ, บอ อาทีโมวเท, อาทูคีด บอ อาโทพีมู, อี กอย แคง อืง อาซียา. 5ดูอี เฆ ตี แฮะ ป็อะ รึร ซังโพว แยต ดี อาต เย, วี หน็อะ เย แคง มืง ทาโรว. 6เย ยี ฮาว กอย แคง มืง พีลีพี ดอ โบง เฆ บลอย โฮม คามูน อี ตู ฮับ ซีนัม บรัห. วาย อัน ตี พัน ซีแง, เย วี ป็อะ รึร ซังโพว, ฌัม มืง ทาโรว, วี กาตูณ เฆ อี แฮะ แยต ดี อาต ตึอน. เย วี กอย มืง ทาโรว อาดา บู ซีแง.

ลอง ดูอี ยัม วี อีม

7อึณ บอ ฌัม ซีแง ดอ โฆว แคง อู คานา ตึง, เฆ ดีแบ เฌา เยซู เฆ ตัห กาฌูะ โฮม คามูน ปี จัร เฌา เยซู เฆ โฮม. ดอ อัน ตี อาปอลู วี จูห ดี กาลาง โฆรห ดี ดีแบ เฌา เยซู. โกบ คราม อัน ดี เลห โดง กอย เฆ ปา แคหณา, อัน กาลาง โฆรห กืน, แตห กอ ฌัม กาแต ซึอม. 8เฆ แฮะ ปีด็อะ เงา ออม โนะ แคง โฮง กอย กาฌูะ เฆ. โฮง ตี, อึณ กอย คร็อง นา แดง แคง กาง ตาง. 9อึณ ยี มึห กาโณม อู วี, อัน จืร อาอูทูคู. อัน ตูต บาง มาโลห. อัน แบน ซี อีด กาเซา. อาปอลู วี กาลาง ฮาว โฆรห, แตห กาโณม ตึอน กอ ปึอน ดี อีด ลึก, วี เกห บยัว เลห นา เรต มาโลห, โจห ฌัม อี ครึม. อัน แฮะ โจห นา จา โอย คร็อง. เฆ บอ โลง ปา อัน, อัน แฮะ ฮอต ยัม. 10อาปอลู วี ยีต โลง นา ครึม, อัน วี มูด ยอด โฆรบ กาโณม ตี, เงียม ซีคยา อัน. อัน วี ต็อห ดี เฆ, “เบ แกวะ โยว, อัน ซี มึห พึอม.” 11วาย อัน ตี อาปอลู วี โฮะ นา แดง, วี กาบัก คามูน, แตห เฆ โฮม โดบ ปี จัร เฌา เยซู ดี เฆ. เฆ วี โทม โฆรห อาปอลู กอ เหลณ, แตห กอ ฌัม บาง ดี วัห แปร. ดอ อัน ตี อัน บอ เลห ฮาว. 12กาโณม ตึอน มืร วี เวณ รึม โดบ เฆ ดูอี เฮา. อัน แฮะ วี อีม, แฮะ คัะ. อึณ บอ วี เหลา น็อห เฆ ดอน อี, วี แตห น็อห เฆ ดาคึย.

ลอง อาปอลู วี กาตูณ เฆ ดา ตาง แคง พึง เฌา เยซู

13เย อี มูห พึง อี ฮาว รึม โดบ อาปอลู, เย วี ป็อะ รึร ซังโพว ฮาว แยต ดี อาต, ฌัม มืง อาโซว. อาปอลู แฮะ จัร เย ฮาว ปาย ตี, อัน ยี วี ฮาว ดี เปลา โดบ อึณเตณ อี ฌัม มืง อาโซว. อัน แฮะ ฮอต ฌัม มืง อาโซว, อัน ต็อห ดี วี ป็อะ รึร ซังโพว รึม โดบ เย. 14ปัน ตี อัน แฮะ ฮอต ฌัม มืง อาโซว ตึอน, อัน บอ ลึบ แคง รึร ซังโพว เย, แตห เย บอกาเฆลียด วี ป็อะ ฌัม มืง มีทูเลน. 15แฮะ ฮอต ฌัม มืง มีทูเลน, ปา แคหณา เย วี ป็อะ ฮาว, แตห อึณ กอ ฌัม กาตัด มืง คีโอว. วาย อัน ตี ปอ อู ซีแง, เย วี ป็อะ ฌัม มืง ซาโมว. ซีแง ฮาโอย, เย แฮะ วี ฌัม มืง มีเลด. 16อาปอลู แฮะ ดึอม ต็อห, อัน ซี ครับ บลอย เพนเทโคด แคง มืง เยรูซาแลม. โคว, อัน ซี ฮาว แฮ แฮ, แตห อัน ฌัม. อัน ตู ซี ฆืด แคง อืง อาซียา, ตู ซี แตห อึณ เหลณ. โคว อัน ตี อัน ต็อห ดี กาโลห มืง แอแพ ตึอน.

17ดอ วี ฌัม อัน แคง มืง มีเลด ตึอน, อัน วี จัร ดูอี มัง อี, แตห เฆ ฮาว แดะ เฆ ดา ตาง แคง พึง เฌา เยซู แคง มืง แอแพ, วี ตัห โดง กอย อัน. 18เฆ แฮะ ฮอต ตัห ฌัม, อัน วี กาลาง โฆรห ดี เฆ. อัน ต็อห, “เบ ดอน อี แฮะ นับ ลอง โอว อู ซีณ ดอ ตัห ฌัม โอว แคง มืง เบ. 19โอว แฮะ โบง ฆาน เฌาพรา, กอย กาแต เบ, ตู ปีจา น็อห โอว แดง เบ ดอน อี. โอว แฮะ ดึอม ยาม โกบ หณาบ ฆาน โอว. โอว มืร แฮะ คัม ดูก ดี ดูอี อายูดา ดอ คราม เฆ ดี ง็อห แวน โอว. ลอง อัน ตี, เบ นับ โตต ดอน อี. 20เบ มืร แฮะ นับ, อี บอด อี หมึอม อี จอย เบ, โอว แฮะ ฮอต มาโนว โตต เบ ดอน โมยว. อาว ฮู มึห มาเซ ปี ดี โลว มาโนว โอว ดี เบ. บอ มูห ดูอี กืน, บอ มูห ดูอี เปรต อี โทม, เซเซ โอว แฮะ มาโนว ซีคยา เบ แคง กาง ดอน กาง. 21โอว แฮะ กาลาง, บอ ดี เฆ ดูอี อายูดา, บอ ดี เฆ ดูอี ฆรีก, แตห เฆ แวน หมาบ เฆ, วี โดบ อึณเตณ เฌาพรา, แตห บอ เฆ วี หณึม เฌา เยซู อี มูห อัน เฌา อี อึบ เอ.

22ดอ ตี นี, น็อห พึอม เฌาพรา แฮะ จัร โอว ฮาว มืง เยรูซาแลม. โยว โอว ดี กาดูห ดูก มาเซ, โอว ตู นับ. 23โอว ยี นับ อู โมยว. โอว บอ ฮาว มืง เหมา, แคง มืง ดอน มืง น็อห พึอม เฌาพรา แฮะ บยัะ ดี โอว ลอง ดี กาดูห โอว ดูก, บอ ลอง ดี คร็อง อี ดี โอว แคง กาปึม ปัน ดี ฌัม โอว แคง มืง เยรูซาแลม. 24โอว ยี ตู กาเว อาซาก โอว. เซ โอว แป ดี โบง ฮอต โตต ฆาน โอว, ฆาน ปี ดัว เฌา เยซู โอว โบง, โอว แฮะ ดาคึย. ฆาน ตี, อึณ มูห ฆาน ดี โลว ฮาว กาลาง ดี อี ลอง เฌาพรา กาเว เฆ.

25ดอ ตี นี, โอว แฮะ นับ ซีคยา. อึณ มูห เบ ดอน อี อี แฮะ โทม โฆรห ปี กาลาง โอว ลอง เฌาพรา ดี อึบ กาดาย, เบ อาว ฮู ปึอน ดี วี ยึร โอว ปอ อู เฌณ. 26โคว อัน ตี อาตึร โอว กาลาง ดี เบ. เซ อึณ มึห ดูอี อี โจห กาโละ งาราย, อาว มูห โกบ โอว. 27โอว ตู ดึอม กราน ดี กาลาง ดี เบ อี ดี แตห เบ นับ โตต ดอน โมยว ปี โลว เฌาพรา. 28ดอ ตี นี, เบ ดา ตาง แคง พึง เฌา เยซู, เบ โลว ซาดีก อาซาก เบ. เบ บอ โลว บัร เฆ ดูอี อี หณึม เฌา เยซู บอ พึง, แตห อึณ ปี ดูอี อี เฮียง มาบู อี บัร พึง มาบู อัน. น็อห พึอม เฌาพรา แฮะ แตห เบ โบง ฆาน ฌึร ตี. โคว, แตห เบ บัร พึง เฌา เยซู. เฌา เยซู แฮะ แตห เฆ แบน ดูอี อาโมยว อัน, โกบ ยัม อัน กาดาง เฆ. 29โอว แฮะ นับ, วาย เลห ฮาว โอว โดง กอย เบ, อึณ ดี มึห ดูอี อี ปี มาโซว แปร. เฆ ดี ตัห ลึบ แคง พึง เบ. เฆ ตู มึห น็อห กาเว เบ บอ พึง. 30บอ กาแต เบ อึณ ดี มึห ดูอี มัง อี, เฆ ดี วี กาลาง โฆรห ตู หมาน บอ กาซูห เฆ ดีแบ เฌา เยซู, แตห เฆ แวน เฌา เยซู, วี แบน ดีแบ เฆ. 31โคว อัน ตี แตห เบ ซาดีก, แตห เบ บัร ซีคยา. แตห เบ บอ โหลห โอว. อาดา โอย ซีนัม, ดอน หมึร ดอน หณา โอว แฮะ มาโนว เบ ดอน อี. โอว มืร ตู ดีเหลา. แตห เบ บอ โหลห แคะ ตาง ดูก แปะ แฮะ กาดูห โอว.

32ดอ ตี นี, โอว วี อาบ เบ ดี เฌาพรา, แตห อัน กาเว เบ, วี กาลาง โฆรห อัน ดี เบ, แตห น็อห เบ วี มึห โปลม, แตห บอ เบ ปึอน คาฆูน ปี ดัว เฌาพรา ดี เฆ ดูอี อี ซีงา บอด ดอน อี. 33โอว ตู ดึอม มึห น็อห ซี ปึอน ครีว เฆ รึอน เบ. โอว ตู หมาณ ปี ดี ตา ดี เบ. 34เบ แฮะ นับ, แด โอว นี แฮะ โบง ฆาน, แตห บอ โอว บอ เฆ ดูอี อี โดบ โอว มึห ดี โฮม ดี ตา. 35โอว แฮะ โบง ฌึร ตี ดอน โมยว, แตห เบ นับ บอ เบ โลว โบง นังฆัน ฆาน เบ, แตห เบ โบง ณึง โอว. แตห เบ บอ นับ, เอ โลว จอย เฆ ดูอี อี ตู โปลม คัะ. โอว ซี แตห เบ โหลห โฆรห เฌา เยซู. อัน แฮะ ดึอม ต็อห, ‘อาเซ ดัว ดี อี, อัน แฮะ ดาคึย หลึอม ดูอี อี ดึห.’” ปาย ตี อาปอลู กาลาง โฆรห ดี เฆ ดา ตาง แคง พึง เฌา เยซู อี ตัห มืง แอแพ.

36อาปอลู แฮะ ฮอต กาลาง โฆรห ตี, เฆ วี ครึบเครา ดอน อี. อาปอลู บอ ซาคึร ดาง เฆ. 37วาย อัน ตี เฆ ดอน อี จูห ดี ยาม ตาง, วี เงียม อาปอลู บอ อูห อัน. 38โกบ กาลาง อัน ดี เฆ, ลอง ฮู ปึอน เฆ ดี วี ยึร อัน, อึณ แตห น็อห เฆ กอ กลึร กาเซา. แฮะ ฮอต ปัน ตี เฆ วี ฮาว รึม โดบ อัน, ฮาว ตึย อัน ฌัม ดี รึร ซังโพว.

Currently Selected:

ปร 20: pce

Highlight

Compare

Copy