2 คร 1
1
1โอว อาปอลู มูห ดูอี ปี ร็อห ปี ตึย เฌา เยซู. บอ เฌาพรา แฮะ อึง ดี ร็อห โอว. โอว แฮะ แดม แปะ นี, ตึย ดี เบ ดูอี แคง พึง เฌา เยซู อี มูห ดูอี ปี อึบ เฌาพรา อี กอย แคง มืง โควรีนทู. โอว แดม บอ ดี เฆ ดูอี อี ซีงา บอด, อี หณึม เฌา เยซู อี กอย แคง อืง อาคายา. บอ โอว บอ อาทีโมวเท อี มูห บีนอง เอ, 2ยาย ซี แตห เฌาพรา บอ เฌา เยซู เฆฌู เบ, ดัว บอ น็อห ฆัด เฆียด ดี เบ.
3เอ ดาง ฆูง เฆฌู ดี เฌาพรา อี มูห ฆูณ เฌา เยซู. อึณ มึห มี อัน เฌา อี นับ ดี กาเว, นับ ดี เหลา น็อห อี. 4เอ บอ กาดูห ดูก หณาบ โมยว เหมา, อัน เฌา ดี เหลา น็อห เอ, แตห อึณ วี ดาคึย. เฌาพรา เหลา น็อห เอ ปาย ตี, แตห เอ วี ดึห โฆรห ตี, วี กาลาง ดี อี เฮา, แตห อึณ เหลา บอ น็อห เฆ. 5โคว, เอ ดูอี อี โดบ เฌา เยซู, เอ บอ โลว คัม ดูก กืน แบน โมยว แบน โมยว ปี เฌา เยซู แฮะ คัม. ปาย ตี, อัน เฌา ปี ดี วี แตห ฆยามซา กืน, แตห เอ กอ ปึอน ดี วี ดัว บอ ดี อี เฮา. 6เย ดูอี อี โบง ฆาน เฌาพรา, เย กาดูห ดูก อี หณาบ กาเซา, แตห อึณ แตห เบ ฆยามซา, แตห อึณ คยอด เบ. เซ เฌาพรา แตห น็อห เย วี ดาคึย, อึณ แตห บอ น็อห เบ วี ดาคึย. ปาย ตี, เบ ดี บอ แป ดี โอด, แป ดี ยืน แบน โมยว แบน โมยว โกบ ดูก แปะ แฮะ กาดูห เย. บอ เบ ดี โลว คัม ปี เย.
7โคว, เย ตู มึห น็อห แหม โกบ เบ. เย แฮะ นับ, โกบ แฮะ คัม เบ ดูก กืน โดบ เย, เบ มืร ปี ดี วี ปึอน กืน ฆยามซา ปี ดัว เฌาพรา โดบ เย.
8อึย เบ บีนอง, เย ซี แตห เบ นับ, ดูก แปะ แฮะ คัม เย แคง อืง อาซียา, อึณ มูห ดูก ตาง กาเซา. เย กอ ฮู ปึอน คัม. เย บอ ทาง อาว ฮู ลอด ยัม. 9เย บอ ทาง เฌาพรา แฮะ ฮอต ซูงพยาด ดี แตห เย ยัม. ดูก ปี กาดูห เย ตี, อึณ บอ มาโนว แตห เย นับ, แกวะ แตห เย บึง โดว บรีม เย, แตห เย บึง มี เฌาพรา อี นับ ดี แตห ดูอี วี ยีต วี อีม. 10โคว, อัน เฌา แฮะ คยอด แตห เย ลอด ยัม. บอ นา อาต นี ฮาว, เย บอ หณึม, อัน เฌา ดี คยอด เย ปอ อึณปัว. 11ปาย ตี, แตห เบ ซาคึร ดาง เย. แฮะ ฮอต เฌาพรา ดี บอ เฆฌู เย บอ จอย เย, แตห อึณ วี มึห ดูอี กืน อี ดาง ฆูง เฆฌู ดี เฌาพรา โกบ แฮะ โทม อัน ปี ซาคึร เบ.
12บอ โอว บอ ฆึก โอว, เย ยี ปีพูง เย ปาย นี. เย ตู ต็อห, เย มึห หมาบ. ปี โบง เย ดี ดูอี แดง กาดาย นี บอ ปี โบง เย ดี เบ, อึณ โดบ โตต น็อห บอด บอ น็อห ซืร น็อห หมาน ปี ดัว เฌาพรา ดี เย. เย ตู บึง อางยาน ดูอี แดง กาดาย นี. เย ยี บึง ฆูง เฆฌู เฌาพรา. 13ปี แดม เย ดี เบ, เย แดม ซืร ซืร ปี แปะ แฮะ ตีห เบ นี, แตห อึณ กาหลูห ดี น็อห เบ. โอว บอ หณึม ปี ดี แดม เย ดอน โมยว, อึณ ดี กาหลูห โตต ดี น็อห เบ. 14มัง โมยว มัง โมยว แฮะ ฮอต กาหลูห ดี น็อห เบ. ปาย ตี, บอ ดอน โมยว ดี บอ กาหลูห ดี น็อห เบ. โคว, ปัน ดี วี ตัห เฌา เยซู, เบ ดี บอ ปึอน ดี ปีพูง เบ โกบ เย. เย มืร ดี ปึอน ดี ปีพูง เย โกบ เบ ปัน ดี ฌัม ซีแง อัน ตี.
15โกบ นับ ซีคยา โอว ลอง อัน ตี, โอว แฮะ ดึอม คราม ดี ตัห จัร เบ, แตห เบ ปึอน อาฆยึร อา เฌณ. 16โคว, ดอ ฮาว เย ดี อืง มาเคโดน, บอ ดอ วี เวณ เย, โอว แฮะ คราม ดี ว็อะ โดง กอย เบ, โยว เบ บอ ปึอน จอย ปึอน ฆัม คราว อึณเตณ, แตห โอว วี ฌัม อืง ยูดา. 17ดอ ตู วี ตัห โอว เบ ทาง, แปะ แฮะ ต็อห โอว ดี ตัห จัร เบ ตี, อึณ มูห โฆรห ปีเยณ. เบ บอ ทาง โอว นับ ต็อห, “แฮะ มูห, แฮะ มูห,” ปี วี กาปลูะ น็อห ต็อห, “อาว มูห, อาว หมาน.”
18อาว มูห ปาย ตี. เฌาพรา แฮะ มึห น็อห ซืร น็อห หมาน. ปาย ตี บอ โฆรห ปี ต็อห โอว, “แฮะ มูห” ตึอน, โอว ตู วี บยอง ต็อห, “อาว มูห.” 19โคว, อาซีลาด บอ อาทีโมวเท บอ โอว แฮะ ดึอม กาลาง ดี เบ ลอง เฌา เยซู อี มูห ฆอน เฌาพรา. บอ เฌา เยซู ตู ต็อห, “แฮะ หมาน,” ปี วี กาวีว โฆรห ต็อห, “อาว หมาน.” โบ็ง หมาน อัน, อัน เฌา ต็อห มี “แฮะ หมาน.” 20โคว, แคะ กอย โฆรห กาดีก ซัดฌา ปี ดัว เฌาพรา, อัน เฌา บอ ต็อห โตต, “แฮะ หมาน แฮะ มูห.” อึณ มูห เฌา เยซู อี แฮะ แตห อึณ แบน โตต ดอน โมยว แปะ แฮะ ดึอม กาลาง เฌาพรา. โกบ อึณ ปาย ตี, บอ เอ ดูอี อี บึง เฌา เยซู, เอ ต็อห, “แฮะ มูห แฮะ หมาน,” แตห อึณ ลึห อาพูง ดังโคว เฌาพรา ดี อี. 21อึณ ยี มูห เฌาพรา อี แฮะ ร็อห บอ เบ บอ เย, แตห เอ หณึม ซีคยา เฌา เยซู. 22อึณ ปี อัน เฌา แฮะ ดอก ฌึม อัน ดี เอ, แฮะ หมาย อูน เอ, แตห เอ แบน ดูอี ปี อึบ อัน. อัน แฮะ แตห น็อห พึอม เฌาพรา กอย แคง น็อห เอ, แตห อึณ ปี โดว หมาน อัน อี แตห เอ นับ ซีคยา ลอง ปี ต็อห เฌาพรา ดี ดัว, อัน ดี บอ ดัว.
23เฌาพรา แฮะ นับ น็อห โอว, โอว ปี บอ ต็อห ดี ตัห จัร เบ, โอว ยี ตู ตัห. โคว, โอว แฮะ กาเว เบ.
24เย ตู มูห ดูอี อี คาหนาบ แตห เบ หณึม ซีคยา. เย ยี โบง ฆาน รึม โดบ เบ, แตห น็อห เบ ดาคึย. โคว, อึณ มูห น็อห หณึม เบ อี แตห น็อห เบ มัน เซเซ.
Currently Selected:
2 คร 1: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
