2 บืน 7
7
ลอง เฆ หลู โฮว เฌาพรา
1อาซาโลวโมว แฮะ ฮอต ซาคึร ปาย ตี อึณ บอ มึห เงา อี เลห โลง แคง ฆางหราว, ตัห กาซึม ปี หลู เฆ ตึอน. อาพูง ดังโคว เฌาพรา มืร แฮะ โนะ แคง โฮว เฌาพรา. 2เฆ ดา อี หลู ดี เฌาพรา กอ ฮู ปึอน ลึบ แคง โฮว เฌาพรา โกบ แฮะ โนะ อาพูง ดังโคว เฌาพรา แคง โฮว เฌาพรา ตี. 3ดอ ยึร เฆ ดูอี อีซาเรลัะ เงา แฮะ โจห โลง แคง ฆางหราว บอ อาพูง ดังโคว เฌาพรา แฮะ โนะ แคง โฮว เฌาพรา ตี, เฆ มืร วี มูด ฆึบ แดง มาว ปี ดัะ เฆ ตึอน.#7:3 ดอ มึอน เฆ ดัะ มาว โดบ อึณเตณ บอ แบน โปละ แบน โปละ, แกวะ แตห โณะ ณัะ เฆ วี อืบ มยูก เฌาพรา บอ กาลาง ฆูง เฆฌู ดี อัน เฌา ต็อห, “แตห เอ อืบ มยูก เฌาพรา โกบ แฮะ บอด มยาด กาเซา อัน เฌา. อัน เฌา มืร มึห น็อห ร็อก กาเว เซเซ.” 4วาย อัน ตี อาซาโลวโมว บอ เฆ ดูอี อีซาเรลัะ บอกาเฆลียด วี ดึห ปี ดี หลู เฆ บอ หลู ดี เฌาพรา. 5อาซาโลวโมว บอ ดึห มัก อา หมึณ ดี อา แหรณ โดว, มาบู อู แซน ดี อา หมึณ โดว, แตห อึณ แบน ปี ดี หลู อี กอย กาฌูะ โฮม รึม. ปาย ตี คูนดีคัม บอ เฆ ดูอี อีซาเรลัะ บอกาเฆลียด บอ กาโพรม ดี หลู โฮว เฌาพรา, แตห อึณ แบน โดง ซีงา บอด. 6เฆ ดา อี หลู ดี เฌาพรา มืร แฮะ จ็อง โดง แฮะ แรน อี เฮา อาดา เฆ. เฆ ดูอี อาโมยว อาเลวี บอ วี จ็อง นา อาต เฆ ตี, วี โฆ็ง บอ อาโมยว ปี ดอย ปี บัห อี มูห ปี โบง อูน อาดาวีด, แตห เฆ กรึบ เฌาพรา. เฆ มืร ปาก โหมว ต็อห, “น็อห ร็อก เฌาพรา กอย เซเซ.” เฆ มืร ต็อห โดบ ปี โบง อูน อาดาวีด ตึอน. เฆ ดา อี หลู ดี เฌาพรา มืร บูด เวา. เฆ บอ จ็อง ลาย กาซืร ดี เฆ ดูอี อาเลวี. บอ เฆ ดูอี อีซาเรลัะ บอกาเฆลียด แฮะ จ็อง.
7อาซาโลวโมว บอ โบง แตห แวง อี กอย นา อาต โฮว เฌาพรา แบน โดง ซีงา บอด. อัน บอ หลู โดว ปี ดี หลู อี โดะ ดี เงา, บอ เบรียง อี เลห ดี ปี ดี หลู อี กอย กาฌูะ โฮม รึม. อัน โบง ปาย ตี โคว, กาโช็ง บ็อง เดณ แปะ แฮะ โบง อูน อัน ตึอน, อึณ ดีแตด, อาว โกบ ปึอน เบลห โตต โกรว ปี ดี หลู เฆ บอกาเฆลียด, อี มูห ปี ดี หลู อี โดะ ดี เงา บอ ปี ดี หลู ดีฆาว แบน โมยว แบน โมยว.
8ปาย ตี อาซาโลวโมว บอ เฆ ดูอี อีซาเรลัะ บอกาเฆลียด โบง บลอย อาดา บู ซีแง. เฆ มืร แฮะ ตัห กาฌูะ จูห ดี อึณเตณ อี ฮาว ดี มืง เลโบวฮามาด กอ วี ฌัม ดี กาอูน กาดาย มืง แอฆึบ บลาก นา เตต. แฮะ มึห ดูอี กืน กาเซา อี ตัห ลึบ บลอย เฌาพรา. 9เฆ แฮะ โบง บลอย ตี แฮะ โนะ บู ซีแง, เฆ ปี วี โบง ฮาว อาดา ปอ บู ซีแง. บอ โนะ ซีแง อึณดา, เฆ วี ตัห กาฌูะ โบง บลอย หลู กาโช็ง หลู. 10บอ ฌัม ซีแง อา ฆึร ดี ฮาโอย, มาเฆียน อึณ บู, อาซาโลวโมว มืร วี จัร ดูอี เฆ ตึอน, แตห เฆ เวณ กาง เฆ ราง อาเซ ราง อัน. เฆ มืร แฮะ โคย ดาคึย โกบ แฮะ ม็องการา ดัว เฌาพรา ดี ดูอี อีซาเรลัะ, บอ ดี อาดาวีด บอ ดี อาซาโลวโมว.
ลอง เฌาพรา วี กาลาง โฆรห ดี อาซาโลวโมว ปอ อู เฌณ
11อาซาโลวโมว แฮะ ฮอต โบง โฮว เฌาพรา บอ โฮว อัน, แฮะ ฮอต โตต ดอน โมยว แคะ ซี โบง อัน แคง โฮว เฌาพรา บอ แคง โฮว อัน. 12วาย อัน ตี, เฌาพรา วี ตัห กาปลูห ดี อัน แคง หมึร บอ กาลาง ดี อัน ต็อห, “โอว แฮะ ฮอต ยึร โฆรห ปี ซาคึร แม. โอว มืร แฮะ ร็อห โฮว นี, แตห อึณ แบน โดง ดี ตัห หลู อี ดี โอว.
13นา อาต ฮาว โอว ดี บอ โบง แกวะ แตห ฆลาย โจห. โอว มืร วี จัร มา อาโม็ง ตัห โฮม ปี ซัม ปี ปีด เบ บอ แตห เฆ ดูอี ปี อึบ โอว มึห เซา รอฆา. 14เซ เฆ ดูอี ปี อึบ โอว อี แฮะ คัม ดี โดบ โอว ยี วี โหลห ปี กาลึบ เฆ, วี แวน ปี โบง เฆ ตี, วี โฆม ดี อาต โอว บอ ซาคึร ดี โอว, โอว อี กอย แคง ฆางหราว โอว ดี โทม โฆรห เฆ. โอว ดี บอ ฆ็อห แวน หมาบ เฆ, วี แตห มาน มืง เฆ ดาคึย ซีคยา ปี บรีม. 15โอว มืร บัร ดี ยอด โฮว นี เซเซ, บอ โทม โฆรห ปี ซาคึร ซาโดง เฆ ดี นี. 16โอว มืร แฮะ ร็อห โฮว นี, แตห อึณ แบน โดง ซีงา บอด. โอว มืร ดี กอย ดี นี เซเซ. งาย โอว มืร ดี ยอด โฮว นี บอ น็อห โอว ดี ร็อก โฮว นี เซเซ.
17อึณ ยี มูห แม, แม โลว มึห น็อห ซืร บอ โบง นา บอด ปี ปี ดึอม โบง อาดาวีด อี มูห ฆูณ แม. แม บอ โลว โทม แปะ แฮะ กาลาง อูน โอว บอ โดบ ดารา เฆ อากยาม อางยาน โอว. 18เซ แม บอ โบง ปาย ตี, โอว มืร ดี แตห หลูกหลาน แม แบน คูนดีคัม เซเซ. อึณ ดี บอ โดบ โฆรห กาดีก ซัดฌา ปี ดึอม กาลาง อูน โอว ดี ฆูณ แม อี มูห อาดาวีด. โอว แฮะ ดึอม ต็อห ดี อัน, ‘ครึร หลูกหลาน แม ดี ปึอน ดี อึบ มืง อีซาเรลัะ เซเซ.’
19มาแล, เซ แม บอ เฆ ดูอี ปี อึบ แม วี โบง ลูต ดารา โอว บอ ตู วี โดบ โฆรห ปี กาลาง อูน โอว, วี กรึบ เฌา ปอ กาดัง, โอว มืร ตู โบง โดบ กาดีก ซัดฌา ตี. 20โอว ดี แวน เฆ ดูอี อีซาเรลัะ, ตู แตห เฆ กอย แคง มืง ปี ดัว โอว ดี เฆ. บอ โฮว แปะ แฮะ แตห โอว แบน โฮว บอด นี, โอว ดี แวน, แตห อึณ แบน ปี แนนัะ ปี กาณัห เฆ ดูอี เฮา. 21โฮว ตาง อี แฮะ จา แฮะ ชีด กาเซา นี มืร, เซ อี ฮาว โดบ อึณเตณ กาโลห ดี นี, เฆ ดี บอ อาม กาเซา ต็อห, ‘โกบ มาเซ เฌาพรา แฮะ โบง แตห บอ มืง บอ โฮว นี ชึม ปาย นี?’ 22เฆ อี เฮา ปี ดี วี เวียะ ต็อห, ‘เฌาพรา แฮะ ดัม หมาบ ดี เฆ โกบ แฮะ แวน เฆ เฌาพรา อี แฮะ ดึห เลห ดา ดา เฆ แคง มืง แอฆึบ ตึอน. เฆ แฮะ วี ฮาว กรึบ บึง เฌา ปอ กาดัง.’” แคะ ตี เฌาพรา แฮะ กาลาง ดี อาซาโลวโมว.
© 2021, Wycliffe Bible Translator, Inc. All rights reserved.