2 บืน 27
27
ลอง อาโยวทาม แบน คูนดีคัม อี อึบ มืง ยูดา
1ดอ แบน อาโยวทาม คูนดีคัม, อาซาก อัน แฮะ ปึอน อา ฆึร ดี พัน ซีนัม. อัน บอ อึบ บึง มืง, กอย แคง มืง เยรูซาแลม อาดา ฆึร ดี เดา ซีนัม. มา อัน จืร นาง เยรูซา อี มูห ฆอน อาฌาโดก. 2อัน โบง นา บอด นา หมึอม ปี อึง เฌาพรา. อัน โบง โดบ ปี ปาย ฆูณ อัน อี จืร อาอูฌียา ตึอน. อึณ มึห มี อู โมยว ปี ตู โบง อัน. อัน ตู ลึบ แคง โฮว เฌาพรา โบง หมาบ บอ โดะ หลู ซีนัม อูห หงูน ปี ฆูณ อัน. มาแล, เฆ ดูอี เรา ดูอี กาง ยี แนะ ซี โบง หมาบ. 3อาโยวทาม บอ อึณปราย มาโลห โฮว เฌาพรา อี กอย บลาก นา กัว. อัน บอ วี โฆว, วี อึณปราย แรง มืง เยรูซาแลม โดง จืร ออแพลัะ. โดง วี อึณปราย อัน แฮะ กืน กาเซา ดี ตี. 4อัน บอ วี แด มืง แดง นอน แคง กาดาย มืง ยูดา, วี ซัม โดง เครียง ดา ซึก บอ โฮว จา แคง แปร.
5อาโยวทาม บอ แยต ดา ซึก อัน, แตห เฆ ฮาว กาโฆห แป คูนดีคัม ดูอี อัมโมน. อัน วี แตห เฆ ดูอี อัมโมน ฮับ จึง ดี อัน. ซีนัม กาโฆห เฆ ตี, เฆ โลว ฮับ รึอน อู มาย็อห ทาเลน. เฆ โลว ฮับ บอ เคาคยูง อู หมึณ กอรัะ บอ เคาบาลี อู หมึณ กอรัะ. เฆ โลว ฮับ จึง ตี ดี อัน, แตห อึณ กอ โนะ โอย ซีนัม.
6ปาย ตี ปวน เฆ อาพูง ดังโคว อาโยวทาม บอ แกร ดี ตาง โกบ มึห อัน น็อห ซืร น็อห หมาน ดี โทม โดบ เฌาพรา อี มูห เฌาพรา ปี กรึบ อัน.
7ลอง ปี ปาย อาโยวทาม ดี อึบ ดา ซึก บอ ปี ปาย อัน ดี กาโฆห บอ ลอง แฮะ อึบ อัน มาน มืง, อึณ แฮะ แดม อูน แคง บับ บืน คูนดีคัม อีซาเรลัะ บอ คูนดีคัม ยูดา. 8ดอ แบน อาโยวทาม คูนดีคัม, อาซาก อัน แฮะ ปึอน อา ฆึร ดี พัน ซีนัม. อัน บอ กอย อึบ แคง มืง เยรูซาแลม อาดา ฆึร ดี เดา ซีนัม. 9อัน บอ ยัม ฮาว โดบ ดา ดา อัน. เฆ บอ ดีบ โดว โบ็ง อัน แคง มืง อาดาวีด โดบ ดา ดา อัน เฆ ตึอน. ฆอน อีมาย อัน อี จืร อาคาด บอ วี แบน คูนดีคัม วี ปลูะ อัน.
© 2021, Wycliffe Bible Translator, Inc. All rights reserved.