1 ทม 6

1เฆ อี มูห หมาย อี แฮะ กาอาบ โรวเซ ดา กาณา เฆ, แกวะ แตห อี เฮา ปึอน ดี ลูกตาย เฌาพรา บอ ปี มาโนว เอ. 2หมาย เฆ ตี, เซ ดา กาณา เฆ มูห ดูอี อี หณึม เฌา เยซู, อาว ปึอน ต็อห, โกบ มูห เอ อู บีนอง โกบ หณึม เอ เฌา เยซู, อาว บอ โลว โรวเซ อัน. มาแล, เฆ แฮะ แว โลว โบง ซีคยา ฆาน ดา กาณา เฆ ตี. โคว, ฆาน ปี โบง เฆ อึณ แบน อาฆยึร ดี บีนอง ปี ร็อก เฆ. แตห แม มาโนว เฆ บอ กาซูห เฆ, แตห เฆ โบง โดบ ปาย ตี.

3เซ อึณ มึห ดูอี อี ตัห มาโนว อี ลาย บลืง ดี ปี มาโนว โอว, เซ ปี มาโนว อัน ตี อาว โดบ นา มูห นา หมาน ปี มาโนว เฌา เยซู อี มูห ดา กาณา เอ, เซ อึณ มืร ตู โดบ โฆรห เฌาพรา ปี โรวเซ เอ, 4ดูอี วี ตี, อัน มูห ดูอี ปีคึก, ตู นับ มาเซ. แคง น็อห อัน, อัน ซี กาแทณ ดี อี, โบง แตห โฆรห อัน แป อี, โบง แตห อี ลาย หลัยะ, ลาย กาลูต. อัน ซี โบง แตห อี ลาย กาย็อง, ตู ลาย หณึม น็อห. 5อัน แตห เฆ อี มึห น็อห ตู หมึอม ลาย กาเอห กาแทณ. ดูอี ตี อาว ฮู นับ นา มูห นา หมาน. อัน บอ ทาง เซ อัน โรวเซ เฌาพรา, อัน ดี ปึอน รึอน กืน แตห อัน ครัม. 6อึณ ยี แฮะ หมาน, เซ เอ โรวเซ เฌาพรา, เซ แคะ ปี มึห เอ แตห อึณ เบระ ดี น็อห, อึณ แบน อาฆยึร กืน กาเซา ดี เอ. 7โคว, ดอ ฆึอด ตัห เอ แดง กาดาย นี, เอ มืร ตู มึห ดี ดึห ตัห มาเซ. เซ เอ ปี วี เลห ฮาว, เอ มืร ตู ปึอน ดึห ฮาว มาเซ อี กอย แดง กาดาย นี. 8เซ อึณ ปาย ตี, เซ เอ แฮะ มึห ดี โฮม โบม, มึห ดี ตา ครึง, แตห น็อห เอ ดาคึย, แตห อึณ จู แคะ ตี. 9มาแล, เฆ อี มึห น็อห ซี ครัม, เฆ ดี กาดูห อี ปยาต อี เกา เฆ, อึณ บอ ปี เฆ แฮะ เคร ยอต. น็อห ลอพัะ เฆ, อึณ ดี แยต เฆ โบง อี รึร กาเซา, แตห เฆ ลึร ชึม โตต. 10โคว, น็อห อี ร็อก รึอน, อึณ บอ ปี เรียห เฮ. เซ อึณ ลัต, อึณ ดี เลห อี ตู หมึอม ดอน โมยว. ดูอี มัง อี แฮะ กาดึก กาด็อะ ดี รึอน เฆ ครีว บอ แวน ปี หณึม เฆ. น็อห เฆ มืร, อาว ฮู ดาคึย โกบ กาดูห เฆ ดูก แบน โมยว แบน โมยว.

11มาแล, อี มูห แม, แม มูห ดูอี ปี อึบ เฌาพรา, แตห แม วัห หมาบ ฌึร ตี. แตห แม นังฆัน ดี โบง นา มูห นา หมาน บอ โรวเซ เฌาพรา. แตห แม มึห น็อห หณึม, น็อห ร็อก, บอ คัม ดี โอด น็อห, บอ มึห น็อห อึณจูะ อึณจัม. 12แตห แม หณึม ซีคยา ดอน โมยว ลอง อาซาก กามาย ปี ดัว เฌาพรา ดี แม. เฌาพรา แฮะ แดะ แม บอ ดัว อาซาก กามาย ตี ดี แม ดอ กาลาง แม ดี อาต ดูอี กืน ลอง แฮะ หณึม แม เฌา เยซู. 13บอ เฌาพรา อี แฮะ ดัว อาซาก ดี ดอน โมยว, บอ เฌา เยซู อี แฮะ กาลาง ซืร ดี ดา กาณา อาพีลาด ตึอน, ฆาย แฮะ นับ ลอง ปี กาลาง โอว ดี แม. 14แตห แม โบง โดบ โฆรห ปี จัร อัน เฌา ดี แม. แกวะ แตห แม กาลึบ, แกวะ แตห อี เฮา ปึอน ดี กาลาง นา ตู หมึอม ลอง แม, แตห อึณ กอ ฌัม ปัน ดี ตัห เฌา เยซู อี มูห ดา กาณา อี อึบ เอ. 15เฌาพรา ดี แตห เฌา เยซู วี ตัห ปัน ดี ฌัม อาคราว อัน. โคว, แตห เอ อืบ เฌาพรา. อัน เฌา อู กาดัง ตี อี อึบ โตต บอกาเฆลียด, อัน บอ มูห คูนดีคัม อี อึบ โตต แคะ กอย คูนดีคัม แดง กาดาย. อัน บอ มูห ดา กาณา อี อึบ โตต แคะ กอย ดา กาณา ดอน นา ดอน โปละ. 16มี อัน เฌา อู กาดัง ตี ตู ยัม ดอ เหมา. อัน บอ กอย โดง บลาง, โดง ตู ปึอน อาเซ ตัห กาตัด. อาว มึห อาเซ อี แฮะ ดึอม ยึร. อาว มึห อาเซ อี ปึอน ยึร. อัน เฌา บอ มึห ปวน ดี อึบ เซเซ. แตห เอ โรวเซ อัน เฌา ตี. ซาตู.

17อี มูห เฆ ดูอี อี มึห โกรวกราม แดง กาดาย นี, แม โลว มาโนว เฆ, แกวะ แตห เฆ ปีคึก น็อห เฆ. แกวะ แตห เฆ บึง โกรวกราม เฆ อี นับ ดี หราย. แตห เฆ บึง มี เฌาพรา อี นับ ดี ดัว โตต ดอน โมยว ดี เอ, แตห อึณ แบน น็อห ดาคึย ดี เอ. 18แม โลว จัร เฆ, แตห เฆ โบง นา หมึอม. นา บอด นา หมึอม ปี โบง เฆ ตี แตห อึณ กืน, แตห เฆ มึห น็อห ดีฮาง อี นับ ดี กาซาง ดัว ดี อี เฮา. 19เซ เฆ โบง ปาย ตี, อึณ ปี เฆ เบลห อูน โกรว อี บอด อี หมึอม อี นับ ดี จอย เฆ. ฌาด ดี ตัห แตห เฆ ปึอน ดี บึง อาซาก กามาย อี มูห อี หมาน อาคาคัร.

20อึย อาทีโมวเท, แตห แม ยอด แมน ซีคยา ดอน โมยว แปะ แฮะ อาบ อูน เฌาพรา ดี แม. แตห แม วัห โฆรห อี ตู โรวเซ เฌาพรา บอ โฆรห อี ตู มึห ดีโคว, โฆรห อี กาบัห ดี เฌาพรา ปี กาลึบ ดูอี ดี ต็อห แฮะ มูห อางยาน. 21ดูอี มัง อี เฆ แฮะ โดบ อางยาน ฌึร ตี. เฆ แฮะ แวน ปี หณึม เฆ.

แตห เฌาพรา เฆฌู เบ ดอน อี.

Currently Selected:

1 ทม 6: pce

Highlight

Copy

Compare