1 อาซามูเอน 31
31
ลอง อาซอลู ยัม
1ดูอี พีลีที เฆ ตึอน บอ กาโฆห ดี เฆ ดูอี อีซาเรลัะ. แคะ กอย ดูอี อีซาเรลัะ, เฆ บอ เตา ฮาว ตัะ ดูอี พีลีที. เฆ กืน แฮะ ยัม ดี นอน ฆีลัะปอ ตึอน. 2ดูอี พีลีที บอ คูงครัห อาซอลู เฆ ฆอน อีมาย อัน โอย วี ตึอน. เฆ บอ ดึห อาโยวนาทาน, อาพีนาดาบ, บอ อามาลัะคีซูวา บอ ง็อห ยัม ฆอน อาซอลู เฆ ตี. 3เฆ กาโฆห กาเซา, แฮะ ตัห เครียะ อาซอลู. เฆ ดูอี บัณ อัะ, เฆ บอ ตัห ครับ อาซอลู, บอ บัณ ล็อะ อัน.
4อัน บอ กาลาง ดี ดูอี อี โฆ็ง ครึง กาโฆห อัน ต็อห, “ทอด มาปัวะ ลาง แม ตี, ซัด โอว. เซ แม ตู ซัด, เฆ ดูอี อี ตู ซัวะ แวน ฮูน ลัะคานา, เฆ ดี ตัห ซัด, แตห โอว ชึม ซาเร.”
อัน แฮะ ฮอต ต็อห ปาย ตี ดูอี อี โฆ็ง ครึง กาโฆห อัน ยี ตู ยัะ โบง มาเซ โกบ โยว อัน. โคว, อาซอลู บอ ปีเกห ราง อัน, วี ทีบ ดี กาแดะ มาปัวะ ลาง อัน. 5ดูอี อี โฆ็ง ครึง กาโฆห ตึอน, อัน บอ ยึร อาซอลู แฮะ ฮอต ยัม, อัน มืร วี ปีเกห บอ อัน, ดี กาแดะ มาปัวะ ลาง อัน, แตห บอ อัน ยัม โดบ อาซอลู. 6ปาย ตี แคะ กอย อาซอลู เฆ ฆอน อีมาย อัน โอย วี, บอ แดเจณ อัน อี โฆ็ง ครึง กาโฆห ตึอน บอ แคะ กอย เฆ อี โดบ อัน ตึอน, เฆ บอ ยัม โตต ซีแง ตี.
7ดูอี อีซาเรลัะ อี กอย บลาก นา ดอย ดีลัยะ ตึอน, บอ เฆ อี กอย นา ดอย แบลง อึม ยอดาน ตึอน, เฆ บอ ยึร ลอง ดา ซึก อีซาเรลัะ แฮะ เตา, บอ ยึร ลอง อาซอลู เฆ ฆอน อีมาย อัน แฮะ ฮอต ยัม, เฆ บอกาเฆลียด วี เลห เตา, เวณ เรา เฆ มืง เฆ. เฆ ดูอี พีลีที บอ วี ตัห กอย แคง เรา แคง มืง เฆ ตี.
8ปา แคหณา, เฆ ดูอี พีลีที บอ ต็อห ดี ตัห บูต ครึง ปี ตา เฆ อี แฮะ ยัม ตึอน, เฆ บอ ยึร อาซอลู บอ ฆอน อีมาย อัน โอย วี ตึอน แฮะ ยัม ดี นอน ฆีลัะปอ ตึอน. 9เฆ บอ แดบ ฆีณ อาซอลู, บอ บูต ครึง กาโฆห อัน ตึอน. เฆ บอ ตึย ดาลาม ฮาว แคง มืง พีลีที ดอน นา ดอน โปละ, แตห เฆ ปึอน ดี กาลาง ลอง อัน ตี แคง โฮว ปี กรึบ เฆ อารึบ บอ ดี ดูอี บอกาเฆลียด. 10ครึง กาโฆห อัน, เฆ บอ ดึห อูน แคง โฮว ปี กรึบ เฆ อารึบ เอซาทารีด. โดว ยัม อัน, เฆ บอ ดึห อูน ดี แรง มืง เบดซัน. 11ดอ อัน ตี ดูอี แคง มืง ยาเบดฆีเลอาด, เฆ บอ ยึร ลอง ดูอี พีลีที แฮะ โบง ปาย ตี ดี อาซอลู, 12เฆ บอ แดะ แคะ กอย เฆ ดูอี อี ยัะ อี ตู โยว. เฆ บอ ฮาว ดอง คืน หมึร ตี, แตห เฆ ปึอน ดี ดึห เลห โดว ยัม อาซอลู บอ ฆอน อีมาย อัน โอย วี ตึอน. เฆ บอ ดึห โลง โดว อัน ดี แรง มืง เบดซัน, วี ดึห ตัห โดะ ดี มืง ยาเบด ตึอน. 13เฆ บอ ดึห กาอาง ดูอี ยัม เฆ ตี, วี ตัห ดีบ ครึม เฮ อี มูห ดี มืง ยาเบด ตึอน. เฆ บอ ยืน ปี ดี โฮม อาดา บู ซีแง.
Currently Selected:
1 อาซามูเอน 31: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
