1 อาซามูเอน 29
29
ลอง ดูอี พีลีที ตู แตห อาดาวีด กาโฆห โดบ เฆ
1ดูอี พีลีที บอ แดะ แคะ กอย ดา ซึก เฆ ตัห กาฌูะ ดี มืง เอแพก. ดูอี อีซาเรลัะ มืร คยัะ โคบ โตห อึม ดี มืง เยจาเรลัะ ตึอน. 2เฆ ดา โบว อี อึบ ดา ซึก พีลีที, เฆ บอ ฮาว แบน พึง อู มาย็อห บอ อู แหรณ. อาดาวีด เฆ ดูอี อัน บอ โดบ ดา ตาง อี จืร อาคีด, อี ฮาว ดี ปัน ซืด ตึอน. 3ปัน ตี เฆ ดา โบว อี อึบ ดา ซึก ดูอี พีลีที บอ ดีหมอด ต็อห, “ดูอี แฮแบร เฆ นี, เฆ ดี โบง มาเซ?”
ดา ตาง อาคีด ตึอน บอ ต็อห, “อึณ แหนน อัน มูห อาดาวีด, อี ดึอม โดบ อาซอลู อี มูห คูนดีคัม ดูอี อีซาเรลัะ ตึอน. อัน แฮะ กอย โดบ โอว อู ซีนัม โลย. ซีณ ซีแง เลห อัน โดง กอย อาซอลู ตึอน, กอ วี ฌัม ซีแง อาตึร นี, โอว ตู ยึร นา ตู หมึอม ดี อัน.”
4เฆ ดา ตาง ดูอี พีลีที ยี รู ดี อัน ต็อห, “แตห ดูอี วี ตี วี เวณ. แตห อัน วี ฮาว โดง คยัะ เฆ ตึอน, โดง แฮะ แตห แม เฆ กอย. แกวะ แตห อัน ฮาว โดบ เอ ดอ ลาย กาโฆห เอ นี. โยว อัน วี ฮาว กอย บลาก รันซู เอ, ดี วี ง็อห ยัม เอ. อาว มึห ปี ดี โบง อัน แดง ตี, อี แตห คูนดีคัม วี อึง อัน. 5วี นี, มูห อาดาวีด, ปี ดึอม กาโพรม เฆ ดูอี อีซาเรลัะ ดี ฆา ต็อห โหมว ตึอน, ‘อาซอลู ง็อห ยัม แบน แหรณ แบน แหรณ. อาดาวีด ยี ง็อห ยัม แบน หมึณ แบน หมึณ.’”
6เฆ แฮะ ฮอต ต็อห ปาย ตี ดา ตาง อาคีด บอ แดะ อาดาวีด ต็อห ดี อัน, “โอว แฮะ นับ ซีคยา, แม แฮะ โบง ซืร ซืร อาคัร หมาน. เซ แม ตัห กาโฆห โดบ โอว นี, อึณ ดี ล็อะ น็อห โอว. ซีณ ตัห ฌัม แม โดง กอย โอว, โอว มืร ตู ยึร อี ตู หมึอม ดี แม. อึณ ยี มึห มี เฆ ดา ตาง อี อึบ อี เฮา, เฆ ตู อึง แม. 7โกบ อึณ ปาย ตี, หมาณ แตห แม วี เวณ ดาคึย. แกวะ โบง แตห ดา ตาง ดูอี พีลีที เฆ นี รู.”
8อาดาวีด วี ดีหมอด ดา ตาง อาคีด ต็อห, “ซีณ ตัห กอย โอว โดบ แม อึณ กอ ฌัม อาตึร นี, โอว แฮะ โบง มาเซ? แม แฮะ ยึร อี ตู หมึอม มาเซ? เหมา อึณ ปาย ปี ตู ควาง เบ ดี โอว, แตห โอว ปึอน ดี กาโฆห ดี รันซู คูนดีคัม, อี มูห คูนดีคัม อี อึบ โอว?”
9ดา ตาง อาคีด วี กาลาง ดี อาดาวีด ต็อห, “โอว แฮะ นับ, โอว แฮะ ยอด ปี โบง แม. อึณ บอ ล็อะ น็อห โอว, อึณ แฮะ ปี ปี โบง อามู อามาด เฌาพรา. มาแล, ดา ตาง ดูอี พีลีที เฆ ตึอน, เฆ แฮะ ซูงพยาด ต็อห, ‘อาว ปึอน ฮาว กาโฆห โดบ เอ.’ 10โกบ อึณ ปาย ตี แคหณา ซีณวัห เจว, แปร ฮี บลาง, บอ แม บอ ดูอี อี โดบ แม, แตห เบ วี เวณ อู เฌณ.”
11ปัน ตี อาดาวีด เฆ ดูอี อัน บอ กาโพรม ดี ยีต ฮาว ซีณวัห เจว. ดูอี พีลีที เฆ ตึอน บอ แตห ดา ซึก เฆ ฮาว ดี มืง เยจาเรลัะ ตึอน.
Currently Selected:
1 อาซามูเอน 29: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
