1 อาซามูเอน 18
18
ลอง อาซอลู ซีแฆะ อาดาวีด
1อาดาวีด แฮะ ฮอต กาลาง ดี อาซอลู ตึอน, น็อห อาโยวนาทาน อี มูห ฆอน อาซอลู ตึอน บอ ดึก ดี อาดาวีด. อัน บอ ร็อก กาเซา อาดาวีด, กอ แหนน อัน ร็อก โดว บรีม อัน. 2-4โกบ ร็อก อาโยวนาทาน ดี อาดาวีด ปี อัน ร็อก โดว บรีม อัน, อัน ดัว กาดีก ซัดฌา ดี อาดาวีด. อัน บอ บูต ซีโตว ปี ตา อัน, วี ดัว ดี อาดาวีด. บอ ครึง ปี ตา อัน ดอน โมยว, มาปัวะ ลาง อัน, อัะ อัน, บอ แซะ อัน, อัน ดัว โตต ดี อาดาวีด. อู ซีณ ดอ แป อาดาวีด ดูอี พีลีที ตึอน, อาซอลู บอ แตห อาดาวีด กอย โดบ อัน. วาย อัน ตี อัน อาว ฮู แตห อาดาวีด ปึอน ดี เวณ ดี กาง ฆูณ อัน.
5อาดาวีด บอ โบง ปี จัร อาซอลู อัน โบง. อัน โบง โตต ดอน โมยว, แตห อึณ หมึอม. โคว, อาซอลู บอ แตห อัน อึบ ดา ซึก บอกาเฆลียด. เฆ ดูอี บอกาเฆลียด บอ อามู อามาด อาซอลู เฆ บอ โรวเซ อัน.
6วาย แฮะ ฮอต ง็อห ยัม อาดาวีด ดี ดูอี พีลีที ตึอน, ดอ วี เวณ อาซอลู เฆ ดา ซึก อัน โดบ อึณเตณ, อึณ มึห เฆ อีบึณ แคง เรา แคง มืง อีซาเรลัะ ตึอน, เฆ บอ เลห ตัห, บอ ต็อห โหมว บอ ฆา โดบ, โฆ็ง บอ ฆรึง บอ ครึง ปี ดอย ปี บัห. น็อห เฆ มืร แฮะ โบยว ดาคึย. เฆ ฮาว บัร ดี รวห คูนดีคัม อาซอลู บอ เฆ อี โดบ อัน. 7อีบึณ เฆ ตึอน บอ ฆา, ต็อห บอ โหมว. เฆ ต็อห,
“อาซอลู ง็อห ยัม ดูอี แบน แหรณ แบน แหรณ. อาดาวีด ยี ง็อห ดูอี แบน หมึณ แบน หมึณ.”
8อาซอลู แฮะ ยึร โฆรห ตี, อัน บอ รู กาเซา. อาว ฮู ล็อะ น็อห อัน. อัน วี ต็อห, “เฆ ต็อห, อาดาวีด แฮะ ง็อห ดูอี แบน หมึณ, แบน หมึณ. อี มูห โอว เฆ ต็อห, แบน แหรณ แบน แหรณ. อาว เหลณ, อัน ดี อึบ โตต บอ มืง.” 9ซีณ ซีแง ตี, อาซอลู อูน น็อห, วี บัร ดี ยอด อาดาวีด เซเซ.
10ปา แคหณา กานัม ฮาย ปี ตึย เฌาพรา วี ตัห ดัว ดูก กาเซา ดี อาซอลู. อัน บอ กาลาง โฆรห กานัม ตี. อาดาวีด วี บัห ดีง อัน, แตห อึณ ปี ซีแง อาต ตึอน. อาซอลู แฮะ ปา กาเนียม บลา เลียห อัน. 11อัน บอ ดึห บลา เลียห ตึอน, ซีโนห. อัน บอ ต็อห, “แตห อึณ ล็อะ อาดาวีด, แตห อัน ดึก ดี แรง.” อาดาวีด บอ วัห เตา, แฮะ มูห อา เฌณ.
12โกบ อาว ฮู กอย เฌาพรา รึม โดบ อาซอลู, แฮะ วี ฮาว กอย โดบ อาดาวีด, อาซอลู บอ โยว อาดาวีด.
13อาซอลู บอ แตห อาดาวีด กาโทะ โดง กอย อัน, แตห อัน อึบ ดูอี อู แหรณ วี. อัน บอ กาดูห ดี แยต ดา ซึก ดอ กาโฆห เฆ. 14อาดาวีด บอ มึห อางยาน ดี โบง ดอน โมยว โกบ เฌาพรา กอย รึม โดบ อัน. 15ดอ ยึร อาซอลู ลอง อาดาวีด นับ ดี โบง ซีคยา ดอน โมยว, อัน บอ แว โยว. 16เฆ ดูอี อีซาเรลัะ บอ เฆ ดูอี อายูดา บอกาเฆลียด ยี ร็อก อาดาวีด โกบ นับ อัน ดี แยต เฆ.
17อู ซีแง, อาซอลู กาลาง ดี อาดาวีด ต็อห, “แม ยอด, โอว ดึห ฆอน อีบึณ โอว, วี ตาง อี จืร นาง เมราบ, ดัว ดี แม. มาแล, แตห แม ยัะ กยัะ ดี กาโฆห ดี อี เฮา ดาง โอว, บอ อาดา เฌาพรา.” อัน ต็อห ปาย ตี โกบ ทาง อัน แคง น็อห, “แกวะ แตห อึณ มูห โอว, อี กาดูห ดี โบง อี ตู หมึอม ดี อัน. แตห อึณ มูห ดูอี พีลีที อี โบง.”
18อาดาวีด วี กาลาง ดี อาซอลู ต็อห, “โอว บอ ฆูณ โอว บอ ครึร โอว อาว มูห ดูอี ตาง แคง ดูอี อีซาเรลัะ. โอว อาว ปึอน แบน เอียะ แม คูนดีคัม.” 19เฆ บอ ต็อห ดี ดัว นาง เมราบ อี มูห ฆอน อาซอลู, แตห อัน แบน อีบึณ อาดาวีด. ดอ ฌัม ซีแง ปี ต็อห เฆ ตี, เฆ ยี ตู วี ดัว อัน ดี อาดาวีด. เฆ วี อาบ ดัว ดี อาดาเรลัะ อี มูห ดูอี อาโมยว เมโฮวลัะ ตึอน, แตห ฆาย คัด.
20ปัน ตี อึณ มูห ฆอน อีบึณ อาซอลู อี จืร นาง มีคาลัะ ตึอน, อัน บอ ร็อก อาดาวีด. ดอ กาลาง เฆ ลอง อัน ตี ดี อาซอลู, อึณ วี ล็อะ น็อห อัน. 21อาซอลู คราม แคง น็อห อัน ต็อห, “โอว ดี อาบ ดัว ฆอน ตี ดี อัน, แตห อึณ แบน ยอต ดี อัน. โอว ดี โบง แตห ดูอี พีลีที แบน รันซู ดี อัน.” แฮะ ฮอต, อาซอลู วี ต็อห ดี อาดาวีด, “อาตึร นี แฮะ มูห ปอ อู เฌณ, โอว ดี แตห แม วี ปึอน ดี แบน เอียะ โอว.”
22อัน วี กาลาง อูน ดี ดูอี แคง โฮว อัน มัง อี ต็อห, “เบ ปรา ดี กาลาง ดี อาดาวีด ต็อห, ‘แม โบง เซเซ แตห อึณ ล็อะ น็อห คูนดีคัม. บอ เฆ แดเจณ คูนดีคัม บอกาเฆลียด มืร อึง แม. โกบ อึณ ปาย ตี แม กาดูห ดี แบน เอียะ คูนดีคัม.’”
23แดเจณ อาซอลู บอ ดึห โฆรห ตึอน วี กาลาง ดี อาดาวีด. อาดาวีด วี ต็อห, “โอว นี มูห ดูอี พลาน, ตู มึห ซาเร. อึณ ตู หงึย แบน เอียะ คูนดีคัม.”
24แดเจณ อาซอลู ปี วี กาลาง ดี ดา กาณา เฆ ต็อห, “อาดาวีด แฮะ ต็อห ปาย นี.” 25อาซอลู ปี วี กาลาง ดี เฆ อึณ ปัว ต็อห, “เบ ต็อห ดี อาดาวีด, ‘เซ แม ซี ปึอน ฆอน คูนดีคัม, แม โลว ดึห ดัว ฮูน ลัะคานา อีมาย ดี ดูอี พีลีที อู มาย็อห วี. แดง ตี, อัน ตู โลว มาเซ. ปาย ตี อัน ซี โบง เวียะ นา จีจีว ปี โบง เฆ ดี อัน.’” ปาย ตี อาซอลู คราม ดี แตห อาดาวีด ชึม ดี ดูอี พีลีที.
26ปัน ตี แดเจณ อัน บอ วี กาลาง ดี อาดาวีด. อึณ บอ ล็อะ น็อห อาดาวีด. อัน ดี ปึอน ดี แบน เอียะ คูนดีคัม. เฆ บอ กาแซณ, แกวะ แตห อึณ ปวน ซีแง ปี ต็อห คูนดีคัม. 27อาต โตต ซีแง เฆ ตี, อาดาวีด บอ ดึห ดูอี อี โดบ อัน, ฮาว. อัน บอ ง็อห ยัม ดูอี พีลีที เฆ อา มาย็อห วี, บอ ดึห ตัห ฮูน ลัะคานา เฆ ตึอน, ตัห ดัว โตต ดี คูนดีคัม, แตห อัน ปึอน ดี แบน เอียะ คูนดีคัม. อาซอลู บอ อาบ ดัว ฆอน อัน อี จืร นาง มีคาลัะ ดี อาดาวีด.
28อาซอลู บอ นับ บอ ยึร ลอง เฌาพรา กอย รึม กอย โดบ อาดาวีด. อัน บอ นับ ลอง ฆอน อัน อี จืร นาง มีคาลัะ แฮะ ร็อก อาดาวีด. 29อาซอลู บอ แว มึห น็อห โยว อาดาวีด. อัน บอ แบน รันซู อาดาวีด บอ โจว อัน.
30ปัน ตี ดูอี พีลีที ต็อห ดี กาโฆห ดี ดูอี อีซาเรลัะ แบน เฌณ แบน เฌณ. ดอน เฌณ อาดาวีด บอ แว มึห อางยาน หลึอม อามู อามาด อาซอลู บอกาเฆลียด, แตห อี โรวเซ รีมาด อัน, แตห ดอน อี กอ นับ ลอง อัน.
Currently Selected:
1 อาซามูเอน 18: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
