1 ปต 4

1โกบ แฮะ คัม เฌา เยซู อี เฮา ดัว ดูก ดี โดว โบ็ง อัน, บอ เบ โลว เบลห น็อห, แตห อึณ ปี น็อห อัน ตี. เบ โลว โบง โมยว อี ดี แบน โปลม แบน แฮณ ดี น็อห เบ. โคว, อาเซ แฮะ คัม ดูก แคง โดว โบ็ง อัน ปาย ตี, อัน มืร ฮู โบง หมาบ. 2ปาย ตี, ซีณ ดอ ตี นี ฮาว, ดอ ซี กอย เบ แดง กาดาย นี, เบ ตู โลว โบง โดบ ปี อึง น็อห บรีม เบ. เบ แฮะ ปึอน โบง โดบ ปี อึง เฌาพรา. 3อาคราว แปะ แฮะ โบง เบ ปี ปี โบง เฆ ดูอี อี ตู นับ เฌาพรา แฮะ ฮอต เหลณ. เบ แฮะ โบง ปี ตู กาอาบ โบง, โดบ น็อห กาวาต เบ, เดียง ป็อห กอ ยึต, โบง บลอย ตาง บอ ซีนัน ซีนืง, บอ กรึบ อารึบ อี หมึอม กาอีห. 4ดอ ตี นี, แฮะ วี บลืง ดี น็อห เฆ โกบ ฮู โบง เบ อี ฮาย อี มืก ปี เฆ. โคว, เฆ วี ลูกตาย เบ. 5ดูอี เฆ ตี ดอน อี ดี โลว กาลาง โลว เวียะ โฆรห ปี ดีหมอด เฌาพรา ดี เฆ. บอ มูห ดูอี อีม บอ มูห ดูอี ยัม, อัน เฌา มืร แฮะ โพรม ดี ซูงพยาด อามู เฆ บอกาเฆลียด. 6โคว อัน ตี บอ เฆ ดูอี อี แฮะ ฮอต ยัม, เฆ แฮะ ดึอม โทม โฆรห เฌาพรา อี แตห น็อห ดูอี ดาคึย. อึณ แตห เฌาพรา ซูงพยาด บอ อามู เฆ, แตห อึณ ปี อัน ซูงพยาด อามู เฆ อี ซี อีม. โดว โบ็ง เฆ ยี ฮู มึห. อึณ ฆีด มี น็อห พึอม เฆ อี ซี อีม ปี น็อห พึอม เฌาพรา.

7ดอ ตี นี, อึณ แฮะ กาตัด ดี ฌัม อาคราว ดี โตต ดอน โมยว อี กอย แดง กาดาย นี. โคว, แตห เบ บอ แป ดี อึบ โดว บรีม เบ บอ บัร เซเซ, แตห เบ บอ โหลห ดี ซาคึร เซเซ. 8เซ เบ ลาย ร็อก, อึณ แฮะ อาเร ตาง หลึอม โมยว เฮา. โคว, น็อห ร็อก ตี, อึณ บอ แป ดี ฆ็อห แวน กืน หมาบ อี เฮา. 9แตห เบ ลาย รวห ลาย แบน แคต. แกวะ แตห เบ ปึณ. 10แตห เบ ดอน อี บอ นับ ดี จัร ปี เฆฌู เฌาพรา, แปะ แฮะ อาบ ดัว อัน ดี เบ แบน โมยว แบน โมยว. แตห เบ บอ โพรม ดี จัร แปะ แฮะ ดัว เฌาพรา ดี เบ วี เหมา วี อัน. แตห อึณ แบน อาฆยึร ดี อี เฮา. 11เซ อึณ มึห ดูอี อี กาลาง โฆรห, แตห อัน กาลาง ปี ปี กาลาง เฌาพรา. เซ อึณ มึห ดูอี อี จอย อี เฮา, แตห อัน จอย แคะ ปี ดัว เฌาพรา โปลม ดี อัน. เซ เบ โบง ปาย ตี, อี เฮา ดี ปึอน ดี อืบ มยูก เฌาพรา โกบ โดบ เบ ดี เฌา เยซู. บอ เอ อืบ เฌาพรา อี มึห อาพูง ดังโคว ตาง เซเซ ดอน โจว ดอน บาน. ซาตู.

12อึย เบ บีนอง ปี ร็อก โอว, เบ แกวะ แตห น็อห เบ บลืง โกบ คัม เบ ดูก อี หณาบ กาเซา. ปาย ตี เฌาพรา เทว ดี ยอด น็อห เบ. แกวะ แตห เบ ทาง แปะ แฮะ กาดูห เบ ตี แฮะ บลืง. 13อึณ บอ ปี เบ แฮะ คัม ดูก โดบ เฌา เยซู. โคว, แตห เบ ยี ดาคึย ลอง อัน ตี. เซ อาพูง ดังโคว เฌาพรา ฮี ลึห ซีคยา, เบ มืร ดี โคย กาเซา. 14เซ อี เฮา ลูกตาย เบ โกบ แบน เบ ดีแบ เฌา เยซู, แตห เบ โบยว ดาคึย. โคว, น็อห พึอม เฌาพรา อี มึห อาพูง ดังโคว ตาง แฮะ กอย รึม โดบ เบ. 15เซ เบ บอ กาดูห ดูก, แกวะ แตห อึณ มูห โกบ ง็อห ยัม เบ อาซาก อี, แกวะ แตห อึณ มูห โกบ ปรา เบ โกรว อี เฮา บอ โบง ลูต อี เฮา. แกวะ แตห อึณ มูห โกบ วีน ดี ปี นับ เบ ฆาน อี เฮา. 16เซ เบ ยี คัม ดูก โกบ หณึม เบ เฌา เยซู, อาว โลว ซาย. แตห เบ อืบ เฌาพรา โกบ แฮะ นับ เฆ ลอง แฮะ โดบ เบ เฌา เยซู. 17โคว, แฮะ กาตัด ดี ฌัม อาคราว ดี ซูงพยาด เฌาพรา อามู ดูอี. เฆ ดูอี แคง อึณโฮม เฌาพรา, อัน เฌา ยี โลว ซูงพยาด เฆ ดี อาต. เซ อึณ ปาย ตี, อาว นับ ดี กาลาง ปี ดี ปาย ดี เฆ ดูอี อี ตู โทม โฆรห เฌาพรา อี แตห น็อห ดูอี ดาคึย ตึอน. 18แฮะ หมาน แปะ แฮะ แดม อูน แคง บับ เฌาพรา ต็อห, “เซ อึณ ตู หงึย คยอด ดูอี อี มึห น็อห ซืร น็อห หมาน, เฆ ดูอี อี ตู โรวเซ เฌาพรา บอ เฆ ดูอี อี มึห หมาบ, เหมา เฆ ดี ปาย ดี ลอด?”

19โคว, เฆ อี คัม ดูก ตาง โกบ โบง เฆ ปี อึง เฌาพรา, แตห เฆ อาบ น็อห พึอม เฆ ดี อัน เฌา อี แฮะ พาน เบลห เฆ อี ตู แวน เฆ ดอ เหมา. แฮะ ฮอต, แตห เฆ บอ โบง ฮาว นา บอด นา หมึอม ปี ดึอม โบง เฆ.

Currently Selected:

1 ปต 4: pce

Highlight

Copy

Compare