1 ปต 1

1โอว อาเปตารู อี มูห ดูอี ปี ร็อห ปี ตึย เฌา เยซู, โอว แดม แปะ นี ตึย ดี เบ บีนอง อี กอย กาย็อห แบน อืง แบน อืง. อึณ บอ มูห อืง โพนทู, อืง ฆาลาที, อืง กาปาโดวนี, อืง อาซียา, บอ อืง บีซีนา. 2เบ แฮะ แบน ดูอี ปี ร็อห เฌาพรา, แตห อึณ โดบ แปะ แฮะ คราม เฌาพรา ดี โบง. น็อห พึอม เฌาพรา แฮะ แตห เบ แบน ดูอี อี ซีงา บอด, แตห เบ ปึอน ดี โทม โดบ ปี กาลาง เฌา เยซู, แตห เฌา เยซู ฆ็อห แวน หมาบ เบ โกบ แฮะ คัม อัน ดี ยัม กาดาง เบ. โอว หมาณ, แตห เบ ปึอน กืน ปี เฆฌู เฌา เยซู, แตห อัน ดัว บอ น็อห เฆียด กาเซา ดี เบ.

3เอ ดาง ฆูง เฆฌู ดี เฌาพรา อี มูห ฆูณ เฌา เยซู. ปี เฆฌู เฌาพรา ดี เอ แฮะ กืน กาเซา. อัน แฮะ โบง แตห เอ แบน ดูอี กามาย, แตห อึณ ปี เอ แฮะ วี ฆึอด ปอ อู เฌณ. โกบ แฮะ วี ยีต วี อีม เฌา เยซู วาย แฮะ ฮอต ยัม อัน, อึณ แตห เอ มึห ปี หน็อะ อึณด็อะ อี ตู นับ ดี กาลูต น็อห ดอ เหมา. 4เอ มืร แฮะ ปึอน คาฆูน อี บอด, อี ตู นับ ดี ลึร, อี ตู นับ ดี หราย. เฌาพรา แฮะ เบลห อูน ฌึร ตี แคง ฆางหราว อาดา เบ. 5อึณ บอ มูห ปวน เฌาพรา อี บัร รีด อาซาก เอ โกบ หณึม เอ ดี อัน, แตห อัน ปึอน ดี คยอด เอ. ปี ดี โบง เฌาพรา ฌึร ตี, อึณ ดี บอ ลึห ซีคยา ปัน ดี โตต ฌาด นี. 6ดอ ตี นี, เบ ปี บอ โลว คัม ดูก แบน โมยว แบน โมยว, ปี บอ มึห น็อห กลึร อาดา อู กาจัน มืร, แตห น็อห เบ ยี โคย ดาคึย กาเซา โกบ แปะ แฮะ กาลาง โอว ฌึร ตี ดี เบ ดอน โมยว. 7ปี โลว คัม เบ ตี, อึณ แตห เฌาพรา เทว ดี ยอด โยว เบ หณึม ซีคยา. อึณ ปี ครีว อี โลว ดัง แคง เงา บอ โลว ทารอง. เซ เบ หณึม ซีคยา, ง็อห เบ แฮะ ตาง หลึอม ครีว แฌด. ครีว ตี, ปี บอ แฮะ บอด มืร, อึณ ยี นับ ดี ลึร, นับ ดี หราย. เซ เบ แฮะ คัม ดูก ฌึร ตี, เฌาพรา ดี บอ อืบ มยูก เบ บอ แตห เบ มึห ซาเร ปัน ดี วี ตัห โลง เฌา เยซู. 8อัน เฌา ตี, เบ ปี ซัะ ดึอม ยึร อัน มืร, เบ ยี ร็อก อัน. บอ ดอ ตี นี มืร, เบ หณัม ยึร อัน, เบ ยี หณึม อัน บอ มึห น็อห ดาคึย กาเซา กอ ฮู นับ ดี กาลาง. น็อห ดาคึย เบ ตี, อึณ แตห เบ มึห ซาเร, มึห บอ อาพูง ดังโคว. 9เบ แฮะ ดาคึย ปาย ตี โคว, ปัน ดี วี ตัห เฌา เยซู, อัน ดี คยอด น็อห พึอม เบ. ปาย ตี, เบ ดี ปึอน โตต ดอน โมยว แคะ ปี หณึม เบ.

10เฆ ดูอี อี บยาน โฆรห เฌาพรา, เฆ แฮะ ดึอม กาลาง ลอง เฆฌู ปี ดี ดัว เฌาพรา ดี เบ ตี. เฆ บอ แฮะ เหรต บอ ดีหมอด กอ เฌะ ลอง เฌาพรา อี ดี คยอด ดูอี. 11เฆ แฮะ ซี นับ ซีคยา ปัน เหมา อัน ดี คยอด เฆ. เฆ ซี นับ บอ เหมา อัน ดี ปาย ดี คยอด เฆ. โคว, น็อห พึอม เฌา เยซู อี กอย แคง น็อห เฆ แฮะ บยัะ แตห เฆ นับ, ดูอี ปี ร็อห ปี ตึย เฌาพรา แตห อัน คยอด ดูอี, อัน โลว คัม ดูก ตาง กาเซา. แฮะ ฮอต, อัน ปี ดี วี มึห อาพูง ดังโคว ตาง. 12เฌาพรา แฮะ ฮอต บยัะ ดี เฆ ดูอี อี บยาน โฆรห เฌาพรา ตี, อึณ ตู มูห เฆ อี ดี ปึอน อาฆยึร ตี. อึณ ยี มูห เบ อี ดี ปึอน. ดอ ตี นี, อึณ มูห เฆ ดูอี อี แฮะ กาลาง ดี เบ ลอง โฆรห เฌาพรา อี แตห น็อห ดูอี ดาคึย, เฆ แฮะ วี กาลาง ลอง เฌาพรา ดี คยอด เบ. อึณ มูห น็อห พึอม เฌาพรา ปี ตึย เฌาพรา โลง แคง ฆางหราว, อัน แฮะ แตห เฆ กาลาง แตห เบ โทม. บอ เฆ อามู อามาด เฌาพรา ซี นับ กาเซา ลอง อัน ตี.

13โกบ อึณ ปาย ตี, แตห เบ เบลห อางยาน เบ, แตห อึณ ปี ดา ซึก อี แฮะ ครึง ดี กาโฆห. แตห เบ บอ ซาดีก บึง ซีคยา ปี ดี เฆฌู เฌา เยซู ดี เบ ปัน ดี วี ตัห โลง อัน แดง กาดาย นี. 14แกวะ แตห เบ โบง โดบ ปี อึง เบ ปี อาต หณึม เบ เฌาพรา. โคว, เบ แฮะ ฮอต แบน ฆอน เฌาพรา อี นับ ดี โทม โฆรห อัน. 15ปี โบง เบ ดอน โมยว แตห อึณ ซีงา บอด, แตห อึณ กาดาน ดี เฌาพรา อี แฮะ ร็อห เบ, อี แฮะ ซีงา บอด. 16โคว, แคง บับ เฌาพรา อึณ แฮะ แดม อูน ต็อห, “โกบ แฮะ ซีงา บอด โอว, โอว ซี แตห บอ เบ ซีงา บอด.”

17เฌาพรา ตู มึห โดง ร็อก โดง ฌ็อง. อัน มืร ดี ซูงพยาด โดบ แคะ ปี โบง วี เหมา วี อัน. เบ มืร แฮะ ซาคึร ดี อัน เฌา ตี ต็อห, “อึย ฆูณ เย.” โคว อัน ตี แตห เบ โรวเซ บอ โยว อัน เฌา เซเซ, แตห เบ กอย แดง กาดาย นี, แตห อึณ ปี เบ มูห แคต. 18เบ แฮะ ดึอม โดบ ฮีด เบ อี ตู มึห ดีโคว. เฆ ฆูณ ดัง เบ ดอ มึอน แฮะ ดึอม โบง ฌึร ตี บอ มาโนว เบ แตห เบ โบง โดบ. เฌาพรา ยี แฮะ ทูด เลห เบ, แกวะ ฮู แตห เบ โลว โดบ ฌึร ตี. โคว, แตห เบ โหลห เซเซ, อึณ ตู มูห รึอน เฆ ครีว ปี ดัว เฌาพรา แตห อัน ทูด เลห เบ. อึณ มืร ตู มูห โกรวกราม อี นับ ดี ลึร, ปี ดัว อัน เฌา. 19อึณ ยี มูห เฌา เยซู อี แฮะ คัม ดี ยัม กาดาง เบ. เฌาพรา แฮะ ดัว อาซาก อัน อี แฮะ ง็อห ตาง กาเซา, แตห อัน คยอด เบ. อัน แฮะ ปี ฆอน มาบู อี ตู มึห โดง เช, ปี โลว หลู เฆ ดูอี. 20เฌาพรา แฮะ ร็อห เฌา เยซู ตี ซีณ อาต มึห กาดาย บอ ฆางหราว. อัน เฌา ยี แฮะ แตห อัน โลง แดง กาดาย ดอ ตี นี ดอ มูห อาคราว ดี กาแดะ ฮอต โตต. อัน แฮะ โบง ปาย ตี, แตห อึณ แบน อาฆยึร ดี เบ. 21โกบ ตัห เฌา เยซู ตี, เบ มืร ปึอน ดี หณึม บึง เฌาพรา อี แฮะ แตห เฌา เยซู วี ยีต วี อีม. อัน มืร แตห เฌา เยซู มึห อาพูง ดังโคว. โคว อัน ตี เบ มืร หณึม บอ หน็อะ อึณด็อะ เฌาพรา.

22โกบ แฮะ โทม เบ โฆรห เฌาพรา, อึณ บอ แตห เบ แบน ดูอี อี ซีงา บอด. อึณ แตห เบ บอ นับ ดี ร็อก คาคัร เฆ บีนอง อี หณึม เฌา เยซู. โคว, แตห บอ น็อห บอ พึอม เบ แว ลาย ร็อก. 23เบ โลว ลาย ร็อก โกบ แฮะ แบน เบ ดูอี กามาย โกบ หณึม เบ โฆรห เฌาพรา อี ตู นับ ดี ลึร อี กอย เซเซ. อึณ ปี เบ แฮะ ฆึอด ปอ อู เฌณ, ยี ตู ปี ฆอน อี ฆึอด ดี ดูอี. 24โคว, แคง บับ เฌาพรา อึณ แฮะ แดม ต็อห, “แคะ กอย ดูอี บอกาเฆลียด, เฆ ปี เปต เฆ แปร. อาพูง ดังโคว เฆ มืร, อึณ ปี โบห เปต เฆ โบห แปร. แปร เฆ เปต บอ นับ ดี เฮียะ กาฮ็อห. โบห อัน มืร บอ นับ ดี รัห ดี โจห. 25อี มูห โฆรห เฌาพรา, อึณ ยี กอย เซเซ.” โฆรห เฌาพรา ตี, อึณ มูห ลอง เฌา เยซู อี แตห น็อห ดูอี ดาคึย. เบ มืร แฮะ ฮอต โทม โฆรห ตี.

Currently Selected:

1 ปต 1: pce

Highlight

Copy

Compare