1 คร 16

1ลอง รึอน ปี แฆบ เบ อาดา ดูอี อี หณึม เฌาพรา อี กอย แคง อืง ยูดา ตึอน, เบ โลว โบง แตห อึณ ปี ปี กาลาง อูน โอว ดี เฆ ดูอี แคง พึง เฌา เยซู อี กอย แคง อืง ฆาลาที ตึอน. 2ซีแง ดีเหลา ดอน ซีแง, แตห เบ ดอน อี หลู แคะ ปี ปึอน เบ หลู. แตห เบ แฆบ กาฌูะ อูน รึอน ปี หลู เบ ตี. ปัน ดี ตัห โอว โดง กอย เบ, เบ อาว ฮู โลว แฆบ ปอ อึณ ปัว. 3ปัน ดี ตัห ฌัม โอว โดง กอย เบ, โอว ดี ดัว แปะ ดี ดูอี ปี ร็อห ปี ตึย เบ, แตห เฆ โฆ็ง บอ แปะ บอ รึอน ปี หลู เบ ตี, ฮาว ตึย ดี มืง เยรูซาแลม. 4เซ อึณ บอ ซังโดว, บอ โอว ดี ฮาว โดบ, แตห เฆ ตี มืร ฮาว รึม โดบ โอว.

5โกบ โลว ฮาว โอว ดี อืง มาเคโดน, โอว ดี ตัห โดง กอย เบ วาย แฮะ ฮอต ฮาว โอว ดี อืง มาเคโดน. โคว, โอว ต็อห ดี กาโลห อืง มาเคโดน ตี. 6โอว แฮะ คราม ดี กอย ราม เหลณ โดง กอย เบ, แตห อึณ กอ ปวน อาคราว ฆัด. เบ มืร ดี ปึอน จอย คราว อึณเตณ โอว, แตห โอว ปึอน ดี ฮาว โดง ดี ฮาว โอว ปอ อึณ ปัว. 7โอว ตู ซี ตัห จัร เบ อู กาจัน ปี วี กาโลห ฮาว. เซ บอ มูห ปี อึง เฌาพรา, โอว ดี กอย ราม เหลณ. 8โอว ปี บอ แฮะ ต็อห ปาย ตี มืร, โอว ดี กอย แคง มืง แอแพ, แตห อึณ กอ ฌัม บลอย เพนเทโคด. 9ดี นี อึณ ปี บอ แฮะ มึห กืน อี กาบัห ดี โอว, โอว ยี ปึอน ดี กาลาง ซีคยา ลอง เฌาพรา ดี ดูอี กืน.

10ปัน ดี ตัห ฌัม อาทีโมวเท โดง กอย เบ, แตห เบ ยอด ลึมลา ซีคยา อัน. แกวะ แตห อัน มึห ปี ดี โลว โยว. อัน บอ มูห อี โบง ฆาน เฌาพรา ปี โอว. 11โคว, แกวะ แตห อาเซ ลูกตาย อัน. แตห เบ จอย อัน, แตห อัน ปึอน ดี ฮาว ดาคึย, วี เจว ตัห ฌัม โดง กอย โอว. บอ โอว บอ บีนอง อี กอย รึม โดบ โอว, เย บอ หน็อะ อึณด็อะ อัน ดี วี ตัห.

12อี มูห บีนอง เอ อาพอโลน, โอว แฮะ ออน ดี กาลาง ดี อัน, แตห บอ อัน บอ บีนอง มัง อี ฮาว แล ฮาว จัร เบ. มาแล, อัน ตู ซี ฮาว ดอ ตี นี. อัน ยี ต็อห ดี ฮาว ฌัม โดง กอย เบ เซ อัน ฮี ดัน.

13แตห เบ ซาดีก. แตห น็อห เบ หณึม ซีคยา. แตห เบ มึห น็อห ยัะ บอ มึห โปลม มึห แฮณ แคง น็อห เบ. 14ฆาน ปี โลว โบง เบ ดอน โมยว, แตห เบ โบง โดบ น็อห ร็อก น็อห กาเว.

15อึย เบ บีนอง, เบ แฮะ นับ ลอง อาซาพาน บอ ดูอี แคง อึณโฮม อัน, เฆ แฮะ มูห ดูอี อี หณึม เฌา เยซู ดี อาต อี เฮา อี กอย แคง อืง อาคายา. เฆ แฮะ คัม ดี โบง, แตห เฆ จอย ดอน อี อี หณึม เฌาพรา. 16โอว ซี กาซูห เบ บีนอง, แตห เบ โทม โฆรห ดูอี อี แยต เบ ปี เฆ ตี, แตห เบ โทม บอ เฆ อี โบง รึม ฆาน เฌาพรา โดบ เฆ ตี. 17ดอ แฮะ ตัห จัร อาซาพาน บอ อาโพวทูนีด บอ อาคาคู ดี โอว, โอว แฮะ โคย กาเซา. โคว, ปี ตู ปึอน โบง เบ ดี โอว, เฆ แฮะ โบง แตห อึณ ฮอต โตต ดอน โมยว. 18เฆ แฮะ โบง แตห น็อห โอว วี ดาคึย. เฆ มืร แฮะ โบง แตห บอ น็อห เบ ดาคึย. อึณ แฮะ กาอาบ เอ โรวเซ ดูอี ฌึร ตี.

19เฆ ดูอี แคง พึง เฌา เยซู อี กอย แคง อืง อาซียา แฮะ นัมโหลห เบ. บอ อาคีลา ฆาย อีบึณ อัน อี จืร พีคีลา บอ พึง อี หณึม เฌา เยซู อี กอย แคง กาง ฆาย ตี, เฆ แฮะ นัมโหลห เบ โกบ หณึม เบ เฌา เยซู. 20เฆ บีนอง ดอน อี บอ นัมโหลห เบ. แตห เบ บอ ลาย รวห ลาย อูห ปี อู บีนอง แฮะ ลาย ร็อก.

21ดอ ตี นี, โอว อาปอลู วี แดม โฆรห นัมโหลห ตึย ดี เบ.

22อาเซ ยี ตู ร็อก เฌาพรา, แตห อัน คัม กาซัม ดืง. อึย แม เฌาพรา, แตห แม ตัห.

23แตห เฌา เยซู เฆฌู เบ เซเซ.

24โกบ หณึม เบ เฌา เยซู โอว มืร ร็อก เบ ดอน อี. ซาตู.

Currently Selected:

1 คร 16: pce

Highlight

Copy

Compare