ZEHKARIA 4
4
Pyengdin Shadun A Shingran
1Ngai hpe ga shaga yu sai dai lamu kasa gaw ngai kaw bai sa du nna yup pyaw nga ai hpe jasu ai zawn ngai hpe jasu nna shi gaw, 2“Nang hpa mu n ta?,” ngu nna san wu ai. Shaloi ngai gaw, “Ja hte galaw ai pyengdin shadun langai mu nngai. De a ntsa e sau bang na ndi langai hte dai pyengdin shadun hta pyengdin sanit nga nhtawm, langai hte langai hta wan shat sanit a matu shara ni nga nga ai. 3Pyengdin shadun a makau e tsanlun hpun lakung tu nga ai rai nna, de a makau shagu de langai ngai nga nga ai,” ngu nna htan wu ai. #Shr 11:4. 4Dai hpang, ngai gaw lamu kasa hpe, “Madu e, ndai arai ni hpa baw a matu rai ta?,” ngu nna san we ai.
5Shi gaw ngai hpe, “Nang n chye n ni?,” ngu nna san wu ai.
Shaloi, ngai mung, “N rai law, Madu e, ngai n chye nngai,” ngu nna htan we ai.
10bLamu kasa gaw ngai hpe, “Dai pyengdin sanit gaw ginding aga ting hpe mu lu ai dai Madu a myi sanit rai nga ai,” ngu nna tsun wu ai. #Ezr 5:2.
11Dai hpang ngai gaw shi hpe, “Pyengdin shadun a lahkawng maga nga nga ai tsanlun hpun yan gaw hpa baw lachyum rai ta? #Shr 11:4. 12Tsanlun sau ru shalen dat ai aja pyun lahkawng a makau na tsanlun lakung lahkawng a lachyum gaw hpa rai ta?,” ngu nna san we ai.
13Shi gaw ngai hpe, “Nang n chye n ni?,” ngu nna san wu ai.
Ngai gaw, “N rai, Madu e, ngai n chye nngai,” ngu nna htan dat nngai.
14Dai hpang, shi gaw, “Dai gaw ginding aga ting a Madu rai nga ai shi hpe daw jau na matu Karai Kasang e lata san da nna namman jaw hkam sai masha lahkawng rai nga ai,” ngu nna tsun wu ai.
Zerubabela Hpe Jaw Ai Karai Kasang A Ga Sadi
6Dai lamu kasa gaw Madu kaw na pru ai ndai mungga Zerubabela hpe jaw ya na matu ngai hpe ning nga nna tsun ai: “Nang gaw hpyen dap n-gun hte mung n rai, na a n-gun atsam hte mung n rai; rai ti mung nye a wenyi hte sha awng dang lu na rai ndai. 7Bum ni zawn sumpum ai dingbai dingna ni gaw na a man kaw nna hkoi mat wa na ra ai. Nang gaw Nawku Htingnu hpe bai gaw gap ai shaloi magum nlung mara da na rai ndai; amyu masha ni mung, ‘Tsawm htap ai, tsawm htap ai!,’ nga nna jahtau tsun na mara ai.
8Dai hta n-ga, kaga mungga mung dai Madu kaw nna ngai kaw du ai. 9Shi gaw, “Zerubabela gaw Nawku Htingnu a npawt nhpang jahkrat da nu ai; dai Htingnu hpe shi shangut na ra ai. Ndai lam byin wa ai shaloi, shanhte hpang de ngai nang hpe shangun dat ai hpe nye a amyu masha ni chye lu na mara ai. 10aAmu kachyi mi sha galaw lu ma ai majaw shanhte myit daw ma ai. Rai ti mung Zerubabela gaw dai Nawku Htingnu hpe matut gaw gap nga ai hpe shanhte mu na mara ai rai nna kabu gara na mara ai.
Currently Selected:
ZEHKARIA 4: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
