GA SHAGAWP 7
7
1Sha e, ngai tsun ai ga hpe adum nga u; ngai nang hpe galaw shangun ai lam ni hpe, galoi mung hkum malap kau nga et. 2Ngai tsun matsun ai ga hte maren, galaw u; shing rai jang, nang hkrung nga lu na ndai; na a myi tum hpe nang makawp maga nga ndai zawn, nye a sharin shaga ai ga hta hkan nang na matu, sadi sahka ai myit rawng nga u. 3Nye a sharin shaga ai ga hpe aten shagu kyem mazing da nna, dai hpe na a myit masin salum hta ka da u. 4Hpaji byeng-ya hpe na a kajan zawn, myit kraw hpaji hpe na a manang majing zawn hkau chyap nga u. 5Shing rai, shanhte gaw masha jan ni hte hkalem hkalau chye ai ga tsun let lau la lu ai num ni kaw na, nang hpe mawai la na ra ai.
N Shawp N Kap Ai Num
6Lang mi hta, nye a nta hkuwawt hku nna, shinggan de yu dat yang, 7mahkrum madup n nga ai shabrang law law ni hpe ngai mu nngai; rai ti mung, shanhte hta laklai ai angawk angak masha langai mi hpe ngai yu matsing dat nngai. 8Shi gaw dai num shanu nga ai nta lam jut makau de, lai hkawm sa wa nna, 9shana nsin sin mat wa ai hpang dai num a nta makau hku garet lai mat wa nga ai. 10Dai shaloi dai num shi hpe sa hkrum la nga ai; dai num gaw shawa num langai mi zawn bu hpun sumli da nna shi hpe asoi la na nga, maw mawn da wu ai. 11Shi gaw nden ja ai hte myi man htat ai num rai nna, 12lam nmaw hkan e, tut nawng nwan hkawm nga ai; shing rai kalang lang mare lam jut hkan e mung, kalang lang ningmaw lam ntsa hkan e mung, kalang lang gat pa hkan e mung, la tsap hkawm nga ai. 13Shi gaw dai shabrang wa hpe hkap ahpum la nna, shi hpe pup wu ai; shing rai shi hpe azi yu let, 14“Dai ni nye a shagu hkungga ni hpe ngai lajang da ni ai, shagu hkungga kaw na shan hpe mung lu da nga nngai. 15Dai majaw, nang hpe sa tau la na, ngai pru sa nngai, ngai nang hpe hkan tam na pru wa nngai, nang gaw nang e she nga nga n hka i! 16Ngai gaw nye a yup ku hpe Egutu mung na pru ai nsam hkum sumpan ni hte nep da nna, mawn da se ai. 17Dai yup ku hpe mura, maling shingnam, maza hpun ni hte manam pyaw hkra gat shamawng da se ai. 18Sa rit! Shana tup pyaw chyai ga! An gaw shada da ahpum ginshum let, kabu gara lu na ga ai. 19Nye a madu wa mung nta e n nga ai; shi sumtsan sat nna bu hkawm mat wa sai. 20Shi gaw shi hte yep gumhpraw law law gun mat wa nhtawm, bat lahkawng a hpang e pyi, shi nhtang wa lu na n rai,” nga nna tsun wu ai. 21Shing rai, si mani ai arawn alai hte shi hpe lau la nna, shalen shapyaw ai ga hta shi lup shang mat wa nu ai. 22Sat na matu dun sa wa ai usu hte salum hpe pala hte gap htinggrang bang ya ai majaw, mahkam shara de gumtawng shang mat wa ai shannga la zawn, 23shi gaw akajawng sha dai numsha hpang de hkan nang mat wa nu ai. Shi gaw mahkam kata de pyen shang mat wa ai u zawn rai nga nna, shi a asak mung ru yak jam jau hkrum nga nu ai hpe shi n chye nga wu ai.
24Shing rai, ya chyawm gaw, sha ni e, nye a ga hpe madat mu. Ngai tsun ai ga hta myit maju jung nga mu. 25Dai zawn re ai num gaw na a myit masin hpe n lau la u ga; shi hpang de yit nna pyi hkum shang myit; 26Shi gaw la law law hpe sharun jahten kau yu sai hte, sat kau hkrum ai masha ni mung hti n dang hkra law nga nu ai. 27Nang lama, dai num a nta de sa wa ai rai yang nang gaw katsan ga de hkawm sa nga ai wa rai nga ndai; dai gaw Si du hpang de hkrang ai dingtawk lam rai nga ai.
Currently Selected:
GA SHAGAWP 7: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
