BU HKAWM 28
28
Tut Nawng Nawng Ya Na Hkungga Ni
(Pru 29:38-46)
1Dai Madu gaw Mawshe hpe 2shi a matu manam pyaw ai sangau shatai na, dai ra ai lusha hkungga ni hpe ladaw tawn da ai aten ni hta Karai Kasang hpe nawng jau na matu Israela amyu masha ni hpe matsun na lam hkang dat wu ai.
3Ndai ni gaw dai Madu hpe nawng jau na lusha hkungga ni rai nga ai: shani shagu na wan nat hkungga a matu ra n rawng ai hte laning mi ladu hkrum sai sagu la kasha lahkawng hpe nawng na rai myit dai. 4Sagu la kasha langai mi hpe jahpawt e mung, bai langai mi hpe shana de di nna, 5dai ni hpe nawng jau shagu jet ai tsanlun sau joi mi hte kayau ai shadung mani pawng lahkawng hpe shadung hkungga hku shalawm na rai myit dai. 6Dai gaw Sina Bum e shawng nawng ya ai hkungga rai nga ai hte maren, dai Madu a matu manam pyaw ai sangau shatai na lusha hkungga hpe tsep kawp nat nawng ai shani shagu na hkungga a matu rai nga ai. 7Shawng nawng ya ai sagu la kasha hte hpawn sabyi hkungga a matu tawn hkungri e palin 2 ru hkaw na rai wu ai. 8Shana de nawng ya na sagu la kasha hpe mung jahpawt na hta sabyi hkungga hte hpawn nawng ya ai zawn nawng ya na rai ndai. Dai mung lusha hkungga rai nga ai majaw dai manam pyaw ai sangau hpe dai Madu awng sharawng nga ai.
Bansa Nhtoi Hta Nawng Ya Ai Hkungga
9Bansa Nhtoi hta, ra n rawng ai hte laning mi ladu hkrum sai sagu la kasha lahkawng hte hpawn shadung hkungga shatai na tsanlun sau hte kayau ai mani ai shadung pawng 4 hte sabyi hkungga hpe mung shalawm na rai wu ai. 10Dai gaw sabyi hkungga hte shani shagu nawng jau ai hkungga hta kaga, Bansa Nhtoi shagu hta nawng jau na wan nat hkungga rai nga ai.
Shata Praw Shani Nawng Jau Ai Hkungga
11Shata shagu a praw shani e, dai Madu hpe wan nat hkungga shatai na ra n rawng ai usu uram lahkawng, sagu la langai, laning mi ladu hkrum sai sagu la kasha sanit ni hpe nawng jau na rai myit dai. 12Shadung hkungga a matu usu shagu hta tsanlun sau hte kayau ai mani ai shadung pawng 6, sagu la langai mi hta pawng 4, 13sagu la kasha shagu hta pawng 2 rai na rai nga ai. Ndai hkungga ni gaw lusha hkungga rai nga ai majaw dai Madu a matu manam pyaw ai wan nat hkungga ni rai nga ai. 14Sabyi hkungga mung usu langai mi hta sabyi ntsin palin 4, sagu la langai mi hta palin 3, sagu la kasha langai mi hta palin 2 rai na rai nga ai. Dai gaw shaning tup na shata shagu a praw shani e galaw na wan nat hkungga hte seng ai tara ni rai nga ai. 15Shani shagu na wan nat hkungga hte de a sabyi hkungga hta kaga, htingrai hkungga a matu bainam la langai mi hpe mung nawng jau na rai myit dai.
Matsi N Rawng Ai Muk Sha Poi Hta Nawng Ya Ai Hkungga Ni
(Jaw 23:5-14)
16Dai Madu hpe shagrau sha-a ai Shalai Wa Ai Poi hpe Langai ngu na shata a nhtoi shi mali ya shani e galaw na rai myit dai. #Pru 12:1-13; Trj 16:1-2. 17Dai shata a shi manga ya shani hta galaw hpang nna nhtoi sanit ya tup na ai nawku htung hte seng ai poi hta hkyen lajang da ai matsi n rawng ai muk hpe chyu sha sha lu na rai myit dai. #Pru 12:14-20; 23:15; 34:18; Trj 16:3-8. 18Shawng shani galaw ai poi hta nawku hpawng galaw na rai myit dai; 19dai shani e amu bungli galaw lu na n rai. Dai Madu a matu lusha hkungga hpe mung, ra n rawng ai usu uram lahkawng, sagu la langai mi hte sagu la kasha sanit hte hpe wan nat hkungga shatai nna nawng ya na rai myit dai. 20Kaja ai shadung hkungga a matu usu shagu hta tsanlun sau hte kayau ai mani ai shadung pawng 6, sagu la langai mi hta pawng 4 hte, 21sagu la kasha langai mi hta pawng 2 bang nna nawng ya na rai myit dai. 22Htingrai hkungga a matu bainam la langai mi hpe mung nawng ya na rai myit dai. Ndai hku nna amyu masha ni a matu jasan jaseng ai amu galaw na rai myit dai. 23Jahpawt shagu tut nawng jaw jau ai wan nat hkungga hta kaga, dai hkungga ni hpe mung kahtap nawng na rai myit dai. 24Shani shagu jaw jau ai wan nat hkungga hte sabyi hkungga hte maren, dai Madu a matu manam pyaw ai sangau shatai na, dai sanit ya tup lusha hkungga nawng ya na rai myit dai. 25Sanit ya ngu na shani hta mung nawku hpawng galaw na rai myit dai; dai shani e amu bungli galaw lu na n rai.
Nmut Shang Poi Hta Nawng Jau Ai Hkungga Ni
(Jaw 23:15-22)
26Dai Madu hpe nsi naisi nnan hkungga sak jaw ai shaloi Nmut shang Poi a shawng shani hta nawku hpawng na rai myit dai; dai shani e amu bungli galaw lu na n rai. 27Dai Madu a matu manam pyaw ai sangau shatai na wan nat hkungga a matu ra n rawng ai usu uram lahkawng, sagu la langai mi, laning mi ladu hkrum sai sagu la kasha sanit hte hpe nawng ya na rai myit dai. 28Kaja ai shadung hkungga shatai na usu shagu hta tsanlun sau hte kayau ai mani ai shadung pawng 6, 29sagu la a matu pawng 4 hte sagu la kasha langai ngai hta 30pawng 2 nawng ya na rai myit dai. Htingrai hkungga a matu bainam la langai mi hpe mung nawng ya na rai nga ai. Ndai hku nna amyu masha ni a matu jasan jaseng ai amu galaw na rai nga myit dai. 31Dai rai nna shani shagu nawng ya ai wan nat hkungga hte shadung hkungga ni hta kaga, ndai sabyi hkungga hpe mung jat nna nawng jau na rai nga ndai.
Currently Selected:
BU HKAWM 28: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
