BU HKAWM 10
10
Gumhpraw Pahtau Ni
1Dai Madu gaw Mawshe hpe, 2“Amyu masha ni hpe shaga na matu mung, dap gun yang lang na matu mung, gumhpraw hte dup ai pahtau lahkawng galaw u. 3Pahtau lahkawng yan hpe nsen galu hku dum dat yang, shawa hpung ting gaw nye a hpung shingkang shanu nga ai Sum chyinghka lam de nang kaw sa zup lu na rai ma ai. 4Rai ti mung pahtau langai sha ngoi ai rai yang amyu lakung lama ni hta na ningbaw ni chyu sha nang kaw sa zup na rai ma ai. 5Nsen kadun ai hku dum dat jang, sinpraw maga de dap jung ai amyu bawsang ni rawt pru na rai ma ai. 6Nsen hpe kadun ai hku lahkawng lang dum dat jang dingda maga de dap jung nga ai amyu bawsang ni rawt pru na rai ma ai. Nsen kadun hku hkrai hkrai dum jang dap gun na rai ma ai; 7rai ti mung shawa hpung hpe shaga hpawng na rai yang, nsen galu ai hku dum na rai myit dai. 8Arun a shadang sha hkinjawng ni mahtang pahtau dum na rai ma ai.
“Ndai hkan sa na tara gaw prat dingsa hkan sa nga na tara ni rai nga ai. 9Nanhte a mung hta majan byin nna nanhte hpe sa htim gasat ai gumlau hpyen hpe nanhte nan ninghkap shadaw nhtawm dai pahtau ni hte majan byin kumla hku dum dat ai shaloi Ngai Madu nanhte a Karai Kasang nan nanhte hpe karum la ai hte gumlau hpyen ni a lata kaw nna hkye hkrang la na made ai. 10Kabu gara ai shani ngu ai Shata Praw hta galaw ai Poi ni hte kaga nawku htung hte seng nna galaw ai poi ni hta mung, wan nat hkungga hte mahku hkungga ni hpe nanhte nawng jau ai shaloi mung, dai pahtau ni dum na rai myit dai. Dai shaloi ngai nanhte hpe karum la na made ai. Ngai gaw dai Madu nanhte a Karai Kasang rai nga nngai,” ngu nna tsun wu ai.
Israela Masha Ni Dap Gun Ai
11Amyu masha ni Egutu mung na pru wa ai lahkawng ning e shata lahkawng a nhtoi hkun ya shani hta dai Madu a hpung shingkang shanu nga ai Sum ntsa hta sumwi dawm mat wa ai rai nna; 12Israela amyu masha ni Sina Nam Mali kata kaw na bu htawt hpang wa ma ai. Dai sumwi chyawm gaw Paran Nam Mali e jung nga ai.
13Shanhte gaw dai Madu Mawshe hpe hkang da ai hku hkawm hpang ma ai rai nna, 14shanhte hkawm sa ai aten shagu hkang da ai hte maren hkan galaw ma ai. Dai hpung dawwa ni gaw dawnghkawn npu e Yuda amyu bawsang ni lam shawng let Aminadab a kasha Nashon woi awn ai hku hpung hte hpung rawt sa wa ma ai. 15Dai zawn Yisahka amyu bawsang hpe woi awn ai wa gaw Zua a kasha Nehtanela rai nga ai. 16Zebulun amyu bawsang hpe woi awn ai wa gaw Helon a kasha Eliaba rai nga ai.
17Dai hpang Sum hpe run nna dai hpe hpai na Gershon hte Merari lakung lama ni pru sa na rai ma ai.
18Dai ni a hpang e, Rubin amyu bawsang ni gaw dai hpung dawwa a dawnghkawn npu hta Shedura a kasha Elizura woi awn ai hku, hpung hte hpung rawt sa wa na rai ma ai. 19Dai zawn Simun amyu bawsang hpe woi awn ai wa gaw Zurishadi a kasha Shelumila rai nga ai. 20Gad amyu bawsang hpe woi awn ai wa gaw Duela a kasha Eliasap rai nga ai.
21Dai hpang Lewi amyu Kohat a lakung lama ni chyoi pra ai arai ni hpe hpai nna rawt sa wa na rai ma ai. Shanhte wa de na dabang de du jang Sum hpe bai sharawt da na rai ma ai.
22Dai ni a hpang e, Ehprim a amyu bawsang ni dai hpung dawwa a dawnghkawn npu hta Amihu a kasha Elishama woi awn ai hku hpung hte hpung rawt sa wa na rai ma ai. 23Manashe amyu bawsang hpe woi awn ai wa gaw Pedazura a kasha Gamale rai nga ai. 24Benyamin amyu bawsang hpe woi awn ai wa gaw Gidoni a kasha Abidan rai nga ai.
25Hpang jahtum ngu na dap gaw Dan a amyu bawsang ni rai nna dai hpung dawwa a dawnghkawn npu hta hpung yawng hpe makawp maga ai hku nna Amishadi a kasha Ahiza woi awn ai hte hpung hte hpung rawt sa wa na rai ma ai. 26Dai zawn Ashe amyu bawsang hpe woi awn ai wa gaw Ohkran a kasha Pagila rai nga ai. 27Naphtali amyu bawsang hpe woi awn ai wa gaw Enan a kasha Ahira rai nga ai. 28Dai rai nna ndai gaw Israela amyu masha ni dap gun nna hpung hte hpung rawt hkawm sa ai lam rai nga ai.
29Mawshe gaw Midian masha Yehtru a kasha, shi a kahkau Hoba hpe, “Dai Madu anhte hpe jaw na ngu ai shara de pru sa wa nga saga ai; Israela amyu masha ni hpe ngamu ngamai shangun na lam shi ga sadi jaw da mani ai rai nna nang mung anhte hte rau sa wa saga; anhte nang hpe sut gan karan ya na ga ai,” ngu nna tsun wu ai.
30Hoba gaw, “N rai law, nye a daidaw buga de mahtang nhtang wa na nngai,” ngu nna htan wu ai.
31Mawshe gaw, “Chyeju hte anhte hpe kau da nna hkum wa mat et; anhte nam mali hkan kaning rai but na mung nang sha chye ndai; dai majaw nang gaw anhte hpe lam madun ai wa she tai na rai ndai. 32Nang anhte hte rau sa ndai rai yang gaw dai Madu anhte hpe jaw ya ai shaman chyeju yawng hta na nang hpe karan jaw na ga ai,” ngu nna tsun wu ai.
Amyu Masha Ni Hkawm Sa Ai
33Amyu masha ni dai chyoi pra ai Sina Bum kaw nna pru wa nhtawm masum ya lam hkawm ma ai. Dai Madu a Ga Shaka Sumpu mung shanhte but na shara tam let, shanhte a shawng e galoi mung sa wa nga ai. 34Shanhte gaw dap shagu kaw nna htawt hkawm ma yang, dai sumwi gaw shanhte a ntsa e shani aten hta ka-up nga ai.
35Dai Ga Shaka Sumpu rawt pru wa na rai jang, Mawshe gaw, “Madu e, rawt u, na a gumlau hpyen ni hpe shabra kau nna nang hpe n dawng ai ni hpe jahtaw kau u law!,” ngu nna tsun wu ai. #Shk 68:1. 36Dai Sumpu hkring na rai jang, shi gaw, “Madu e, Israela dinghku masha hkying mun nga ai shara de nhtang wa rit law,” ngu nna tsun na wu ai.
Currently Selected:
BU HKAWM 10: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
