MIHKA 3
3
Israela Ningbaw Ni Hpe Mihka Jahpyak Ai
1Israela a mungdu salang ni e, madat mu! Nanhte gaw teng man ai lam hta lit nga ai ni zawn myit nawn la nga myit dai, 2ti mung, nanhte gaw mai kaja ai hpe n dawng nna, n hkru ai hpe tsaw ra nga myit dai. Nanhte gaw nye a amyu masha ni ahpyi hpe katsing gawng kau nna shanhte a nrut nra ni hta kap ai ashan hpe se machyin kau nga myit dai. 3Nanhte gaw nye a amyu masha ni hpe sha kau myit dai. Shanhte a ahpyi ni hpe gawng kau nna nrut nra ni hpe daw kahtum kau nhtawm di bu hta shadu na matu shan azat ai zawn, shanhte hpe azat kau nga myit dai. 4Nanhte dai Madu hpe hpyi jahtau na aten gaw du wa nga sai, rai ti mung shi nanhte hpe htan ya na ra ai n rai. Shi gaw nanhte a akyu hpyi ga ni hpe madat ya na n rai, hpa majaw nga yang nanhte mahtang n hkru ai amu galaw kau manit dai.
5Nye a amyu masha ni hpe masu hkalem ai myihtoi ni gaw shanhte hpe jaw ya ai ni hpe ngwi pyaw sim sa lam lu na ga sadi jaw ma ai, rai ti mung jaw ya ai lam n nga ai ni a matu gaw majan hte jahkrit shama hkrum nga ai. Dai zawn re ai myihtoi ni hpe dai Madu gaw, 6“Myihtoi ni e, nanhte a ahkyak ai nhtoi lai wa magang rai wa nga myit dai; jan gaw nanhte a ntsa e shang mat wa nga sai. Nanhte gaw nye a amyu masha ni hpe lam woi shadam myit dai majaw, nanhte hta myihtoi shingran galoi mung mu lu sana myit dai n rai; hpa lam hta rai tim, nanhte myihtoi ga tsun lu na myit dai n rai,” nga nna tsun ai. 7Du na ra ai aten a matu myihtoi htoi ai ni shanhte a hkrat sum lam a majaw kaya kahpa hkrum na mara ai. Karai Kasang shanhte a ga n htan ya ai majaw, shanhte yawng jahpoi asawng ai hkrum na mara ai.
8Rai ti mung, nye a matu chyawm gaw, dai Madu ngai hpe shi a wenyi hte daru magam n-gun hte jahpring ya nna tara dara ai nyan hpaji hte Israela amyu masha ni shanhte a yubak lam ni hpe tsun dan lu ai share shagan ai myit ni jaw bang ya nga ai. 9Teng man ai lam hpe n dawng ai hte shut hpyit maga de kayin hkawm nga ai Israela a mungdu salang ni e, nye a ga madat mu. 10Nanhte gaw Karai Kasang a mare ngu ai Yerusalem hpe asai hte n teng n man ai amu a ningpawt ninghpang hta gaw gap da nga myit dai. 11Mare du salang ni gaw mayun kumhpa a matu up hkang nga ma ai; hkinjawng ni gaw shabrai a matu, Tara laika ni hpe lachyum htai sharin ya nga ma ai. Myihtoi ni gaw shanhte lu la na gumhpraw a matu shanhte a shingran ni hpe jaw ya nga ma ai. Shanhte yawng mung dai Madu shanhte hte rau rai nga ai nga nna tsun nga ma ai. Shanhte gaw, “Anhte hta hpa mung machyi hkra na ra ai n rai; dai Madu gaw anhte hte rau anga nga ai,” ngu nna tsun ma ai.
12Shing rai, nanhte a majaw, Ziun gaw sun zawn shawt kau ai hkrum nna Yerusalem gaw marawng marang sumpum shara tai mat na ra ai; Nawku Htingnu kawng gaw maling tai mat na ra ai. #Yer 26:18.
Currently Selected:
MIHKA 3: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
