MAHTE 26
26
Yesu Hpe Sat Na Maw Mawn Ai Lam
(Mrk 14:1-2; Luk 22:1-2; Yhn 11:45-53)
1Ya, Yesu dai lam yawng mayawng sharin shaga ngut jang, shi a sape ni hpe shi kahtap tsun wu ai gaw, 2“Lahkawng ya lai jang, dai Shalai wa ai Poi du na ra ai, nanhte chye nga myit dai rai nna, Masha Kasha hpe wudang hta e jen da na matu ap kau ai hkrum na ra ai,” ngu mu ai. #Pru 12:1-27; Mrk 14:1; Luk 22:1; Yhn 13:1.
3Dai shaloi hkinjawng agyi ni hte mung masha ni a salang ni gaw Kayahpa ngu ai hkinjawng agyi kaba wa a htingnu wang kata e zuphpawng hpawng nga ma ai rai nna, 4Yesu hpe kadai n chye ai sha rim la na hte sat kau lu na lam bawng ban lajang nga ma ai. 5“Rai ti mung, mung masha ni n kabrawng wa mu ga, Poi laman e n rai u ga,” nga nna shanhte hkang da ma ai.
Behtani Kahtawng E Yesu A Baw Hpe Sau Hte Chya Ya Ai Lam
(Mrk 14:3-9; Yhn 12:1-8)
6Ya, Yesu gaw Behtani kahtawng na, manggang kap ai Simun a nta e rai nga ai. #Mat 21:17; Mrk 14:3. 7Yesu shat sha na matu hkrawn taw nga yang, numsha langai mi shang wa nna, nachying hpu ging ai mura sau rawng ai lunghpraw ndum langai mi la sa nhtawm shi a baw hta e ru bun ya wu ai. #Luk 7:37-38. 8Sape ni dai hpe mu jang, yu pawt nna, “Ndai hpe hpa rai nna lahpawt lama di kau wu ta?,”#Yhn 12:4. 9Dai hpe manu kaba hte dut la nna matsan mayan ni hpe garan jaw na mai nga ai, nga ma ai.
10Yesu mahtang shanhte tsun nga ai lam chye nna, “Dai numsha hpe hpa rai nme shatsang nga myit ta? Shi gaw ngai hta kaja ai hte tsawm htap ai hku galaw nu ai. 11Matsan mayan ni gaw nanhte hte rau tut nawng e anga nga na ma ai, rai ti mung ngai chyawm gaw, nanhte hte tut e rau nga lu na n rai. #Trj 15:11; Yhn 12:8. 12Ndai Mura hpe nye a hkum hta shi ru bun ai gaw, ngai hpe lup makoi na matu lajang da ai rai nga ai. 13Nanhte hpe ngai teng teng tsun made ga, ndai Kabu Gara Shiga hpe mungkan ga ting shara shagu hkan e hkaw dan ai shaloi, ndai numsha hpe myit dum nga na matu shi galaw sai kaja ai amu hpe mung tsun hkai dan na maru ai,” ngu nna shanhte hpe tsun mu ai.
Yesu Hpe Ap Kau Na Matu Yuda Myit Hkrum Ai Lam
(Mrk 14:10-11; Luk 22:3-6)
14Dai shaloi sape shi lahkawng hta na langai mi rai nga ai, Yuda Iskarut ngu ai wa langai mi, hkinjawng agyi ni kaw pru sa nna, 15“Ngai nanhte a lata hta Yesu hpe ap ya jang, ngai hpe gade jaw na myit ta?,” ngu nna san mu ai. Dai rai nna shanhte gaw gumhpraw lap sumshi hti ya mu ai. #Mat 27:3; Zeh 11:12. 16Dai kaw nna Yuda gaw Yesu hpe ap ya na mai ang ai ginjang kaja shi tam nga ai.
Sape Ni Hte Rau Shalai Wa Ai Poi Sha Ai Lam
(Mrk 14:12-21; Luk 22:7-14,21-23; Yhn 13:21-30)
17Ya dai matsi n lawm ai muk sha ai poi a shawng shani e, sape ni gaw, Yesu hpang de sit sa nna, “Dai Shalai wa ai Poi hpe sha na gara shara hta e na a matu anhte shachyip da na, nang ra nga n ta?,” ngu mu ai.
18Shi gaw, “Dai mare hta na masha langai mi kaw sa nna, ‘Sara tsun dat mi ai gaw, nye a ahkying ni wa sai, na a nta e nye a sape ni hte rau dai Shalai wa ai Poi hpe ngai sha na nngai,’ nga ai ngu nna shi hpe tsun mu,” ngu dat wu ai.
19Shaloi sape ni gaw, Yesu hkang dat mu ai hte maren galaw nna, dai shalai wa ai poi hpe shachyip da ma ai.
20Ya nrim rim rai jang, shat sha na matu dai sape shi lahkawng hte rau shi hkrawn taw nga ai.
21Shanhte shat sha nga ma yang shi gaw, “Ngai nanhte hpe kaja wa teng teng tsun made ga, nanhte hta na langai mi ngai hpe ap kau na ra ai,” ngu wu ai.
22Sape ni mahtang nachying myit yawn nna, langai hte langai, “Madu e, ngai rai na a ni?,” ngu nna shi hpe san mu ai.
23Yesu gaw, “Dai hka wan hta ngai hte rau, shi a muk tsing manaw sha nga ai wa gaw ngai hpe ap kau na ring ngai, #Shk 41:9; Luk 22:21; Yhn 13:18. 24Chyum laika hta ka da nga ai hte maren, dai Masha Kasha gaw si hkam na matu sa wa lu na rai nga ai; rai ti mung dai Masha Kasha hpe ap kau ai wa gaw dingnye lu na ra ai. Dai masha n shangai taw gaw shi a matu grau kaja nga ai!,” ngu wu ai.
25Shaloi shi hpe ap kau na wa rai nga ai Yuda mung htan nna, “Sara e, ngai rai na a ni?,” ngu nna san wu yang,
Yesu gaw, “Nang tsun ai hte maren rai nga ai,” ngu nna shi hpe tsun wu ai.
Madu A Shana Shat Sha Poi A Lam
(Mrk 14:22-26; Luk 22:14-20; 1Ko 11:23-25)
26Ya shana shat sha nga ma yang, muk langai mi la nna shaman ya nhtawm ahkyep alep di nna sape ni hpe jaw let, “La sha mu, ndai gaw nye a hkum rai nga li ai,” ngu mu ai.
27Bai, gawm hpe mung shi la nna, shakawn kungdawn ngut jang shanhte hpe, “Nanhte yawng dai hta na lu mu. 28Ndai gaw yubak hpe raw dat kau myit ga, law law a matu ru kau ya ai, dai ga shaka hte seng ai, nye a asai rai nga li ai. #Pru 24:8; Yer 31:31; Rom 5:15; Heb 9:22. 29Nanhte hpe ngai tsun made ai gaw, nye Wa a mungdan hta e, nanhte hte rau, sabyi nnan hpe ngai lu lu na nhtoi du hkra, ndai sabyi ru a asi hta na ngai bai lu na n rai,” ngu nna shanhte hpe gam jaw mu ai.
30Dai hpang mahkawn mangoi langai mi mahkawn nna, shanhte gaw Tsanlun bum de pru sa wa ma ai.
Petru Nyet Kau Na Ra Ai Lam Yesu Tau Tsun Ai
(Mrk 14:27-31; Luk 22:31-34; Yhn 13:36-38)
31Dai hpang Yesu shanhte hpe tsun mu ai gaw, “Ndai shana e nan nanhte yawng ngai hpe kabai kau da nna hprawng mat na marin dai, hpa majaw nga yang, ‘Karai Kasang gaw sagu rem wa hpe anu kayat sat nna, sagu hpung na sagu ni gaw bra ayai mat na mara ai,’ nga nna ka da nga ai. #Zeh 13:7; Mrk 14:27; Yhn 16:32. 32Rai ti mung ngai bai hkrung sharawt la ai hkrum ai hpang, Galile mung de nanhte a shawng e ngai sa wa magang na nngai,” ngu mu ai. #Mat 28:7,10,16; Mrk 14:28; 16:7.
33Shaloi Petru htan nna, “Kaga ni yawng nang hpe kabai kau ma ti mung, ngai chyawm gaw galoi mung, nang hpe n kabai kau na de ai,” ngu nna shi hpe tsun wu ai.
34Yesu gaw, “Ngai nang hpe kaja wa teng teng tsun de ga, dai na u garai n goi yang, nang ngai hpe masum lang nyet kau na rin dai,” ngu nna shi hpe tsun wu ai.
35Petru gaw, “Nang hte rau ngai si yang si u ga, nang hpe ngai n nyet kau lu na nngai!,” ngu nna shi hpe htan wu ai.
Kaga sape ni yawng mung dai hte maren tsun nang ma ai.
Yesu Getsemane Sun E Akyu Hpyi Ai Lam
(Mrk 14:32-42; Luk 22:39-46)
36Dai hpang Yesu gaw shi a sape ni hte rau Getsemane ngu ai shara de du ai rai nna, shanhte hpe, “Ngai akyu hpyi na wora de sa nga yang, nang e naw dung nga mala,” ngu wu ai. 37Shaloi Petru hte Zebedi a kasha yan hpe shi hte rau shaga woi sa mat wa ai. Shi gaw yawn hkyen hkrum nna, myit ru myit tsang grai byin nga ai. 38Dai rai nna, shi shanhte hpe, nye a myit masin si hkra yawn kaba hkrum nga li ai; ngai hte rau amaja nga na nang e naw nga nga mu, ngu mu ai.
39Shaloi, dai yang na shi loi mi lai sa nhtawm, ga de myi man gum dagup let akyu hpyi wu ai gaw, “Wa e, ndai n ni n kri ngu ai gawm hpe ngai kaw na shalai kau lu yang gaw, shalai kau ya e! Rai ti mung nye a myit n rai, na a myit she rai u ga,” ngu nna tsun wu ai.
40Dai hpang Yesu gaw sape ni marai masum kaw shi nhtang wa nna shanhte yup pyaw nga ma ai hpe mu mu ai; dai rai nna shi gaw Petru hpe, “Ataw hkying hkum mi sha pyi, ngai hte rau n maja nga lu myit ni? 41Agung alau ai n hkrum myit ga, maja nga ai hte akyu hpyi nga mu; Wenyi gaw teng man ai Karai Kasang a myit ra ai hku galaw mayu nga ai, hkum shan mahtang n-gun kya nga ai,” ngu mu ai.
42Lang mi bai sa nna, “Wa e, ndai nni nkri gawm hpe ngai n lu ai sha, ngai kaw na shalai kau lu yang gaw, na a myit ra ai hku rai u ga law,” ngu nna akyu hpyi nga ai. 43Shi lang mi bai nhtang wa yang, shanhte a myi yup shamwi ai majaw yup pyaw nga ma ai hpe wa mu mu ai.
44Bai shi shanhte hpe kau da nna sa mat wa nhtawm, shawng na ga hte maren masum lang ngu na akyu hpyi wu ai. 45Dai hpang sape ni kaw shi bai nhtang wa nna, “Nanhte gaw naw yup pyaw nga nna hkring sa la nga myit ni? Yu mu! Dai ahkying ni wa magang ra ai rai nna dai Masha Kasha gaw yubak kap ai ni a lata hta e, ap kau ai hkrum na ra ai. 46Rawt mu, anhte sa wa saga: yu mu, ngai hpe ap kau na wa gaw nang e du ra ai,” ngu nna shanhte hpe tsun mu ai.
Yesu Hpe Rim La Ai Lam
(Mrk 14:43-50; Luk 22:47-53; Yhn 18:3-12)
47Yesu ga naw tsun nga yang, sape shi lahkawng hta lawm ai Yuda du sa wa ai. Hkinjawng agyi ni hte mung masha ni a salang ni e shangun dat ai nhtu hte dawhkrawng ni lang ai shawa hpawng kaba shi hte rau lawm sa wa ma ai. 48Yesu hpe, hpyen ni a lata de ap kau na wa chyawm gaw, “Ngai pup ai wa gaw nanhte ra ai wa rai nga ai. Shi hpe rim la mu!,” ngu nna shanhte hpe kumla jaw da manu ai.
49Yuda gaw Yesu kaw hkre di sa nna, “Sara e, nang hta ngwi pyaw nga n ga law!,” ngu nna shi hpe pup wu ai.
50Yesu mahtang, “Jinghku wa e, nang galaw na matu sa ai amu hpe alawan galaw u!,” ngu wu ai.
Shaloi shanhte gaw Yesu hpe rim la nna ngang ngang jum tek da mu ai. 51Dai shaloi Yesu hte rau nga ai ni hta na marai langai mi shi a nhtu shaw nhtawm hkinjawng agyi a mayam hpe kahtam nna, shi na di mat lu ai. 52Yesu gaw, “Na a nhtu hpe de a shara e bang da u; nhtu hpe shaw ai ni yawng mayawng hte gaw nhtu hte si na mara ai, ngu nna shi hpe tsun wu ai. 53Ngai gaw nye Wa kaw karum hpyi na ahkang lu nna, shi gaw kalang ta lamu kasa dap shi lahkawng n ga hkra, ngai hpang de shangun dat na ra ai hpe nang n chye nga n ni?,” ngu nna shi hpe tsun wu ai. 54Rai ti mung ngai shing di yang, ndai lam byin wa lu na ra ai nga nna Chyum Laika hta tsun da ai hte maren, kaning rai dik wa lu na a ta? ngu nna shi hpe tsun wu ai.
55Dai hpang Yesu gaw shawa masha ni hpe, “Damya hpe rim la ai zawn, ngai hpe rim la na, nanhte nhtu, dawhkrawng hte pru sa wa marin ni? Ngai shani shagu Nawku Htingnu hta e dung nna sharin shaga nga ai ten hta, nanhte ngai hpe n rim la manit dai. 56Rai ti mung ndai lam yawng hte byin wa ai chyawm gaw, myihtoi ni ka da ai laika ni dik wa mu ga majaw byin wa sai,” ngu mu ai.
Shaloi jang sape ni yawng shi hpe kau da nna hprawng mat wa ma ai.
Yuda Salang Kongsi Hpawng Hta Yesu Hpe Jep San Ai Lam
(Mrk 14:53-65; Luk 22:54-55,63-71; Yhn 18:13-14,19-24)
57Yesu hpe rim la ai ni gaw, tara sara ni hte salang ni hpawng nga ai Hkinjawng Agyi Kaba Kayahpa a nta de shi hpe woi shang mu ai. 58Petru chyawm gaw Hkinjawng Agyi Kaba a wang du hkra Yesu a hpang, tsan tsan e hkan nang nga ai. Dai hpang wang de shang nna, Yesu a amu hpe gara hku shangut ya na lam chye lu hkra, Hkinjawng Agyi Kaba a sin langa ni hte rau dung nga ai. 59Shaloi hkinjawng agyi ni hte salang Kongsi hpawng ting gaw Yesu hpe sat kau lu hkra shi a lam masu ai sakse mu tam hkra shakut ma ai. 60Masu ai sakse hkam ai ni law law salang hpawng a man de pru sa nna masu tsun ma ti mung, hpa mara n mu tam mu ai. Hpang jahtum e marai lahkawng pru sa nna, 61“Ndai wa gaw, ‘Karai Kasang a Nawku Htingnu hpe ngai run kau nna, masum ya laman dai hpe bai gaw gap lu na we ai,’ nga nna shi tsun sai,” ngu mu ai. #Mat 27:40; Yhn 2:19.
62Shaloi Hkinjawng Agyi Kaba wa gaw rawt nna Yesu hpe, “Ndai nang hpe mara shagun nga ai lam hte seng nna nang hta hpa ga htan na n nga sani?,” ngu nna tsun wu ai. 63Yesu mahtang atsin sha nga nga ai. Bai Hkinjawng Agyi Kaba wa gaw, “Nang gaw Karai Kasang a Kasha ngu ai Meshia rai nga ndai kun? Anhte hpe tsun dan mi ga, ngu nna ahkrung nga ai Karai Kasang a mying nsang hta ya ngai nang hpe dagam da de ai,” ngu nna shi hpe tsun wu ai.
64Yesu gaw, “Nang tsun ai hte maren rai nga ai. Rai ti mung ngai nanhte yawng hpe tsun made ga, ya kaw nna dai Masha Kasha gaw daru magam ahkang aya lu ai wa a hkra maga e dung nga nna lamu na sumwi ni hte du sa ai hpe nanhte mu na marin dai!,” ngu nna shi hpe tsun wu ai. #Dan 7:13; Luk 21:27; Kas 7:55; 1Ht 4:16; Shr 1:7.
65Shaloi Hkinjawng Agyi Kaba wa gaw, shi a hpun palawng gang je kau nna, “Shi gaw Karai Kasang hpe masu matsa shatan nhkan ai ga tsun nu ai! Anhte kaga hpa sakse mi n tam ra saga ai! Karai Kasang hpe shi masu matsa shatan nhkan ai ga nanhte nan na manit dai! #Bhk 14:6; Mrk 14:63. 66Gara hku daw dan na ngu myit nga myit ta?,” ngu nna san wu ai.
Shaloi shanhte gaw, “Shi mara lu ai lam dan leng sai majaw shi gaw si ging ai wa rai nga ai,” nga ma ai. #Jaw 24:16; Yhn 19:7.
67Shaloi shanhte gaw shi a myi man hpe mayen mahtaw bun ai hte shi hpe htwi mu ai. Nkau mi shi hpe kahpret nna, #Mat 27:30; Esa 53:3; Luk 22:63; Yhn 19:3. 68“Meshia e, nang hpe bye ai kadai rai nga a ta? Myihtoi ga hte tsun dan mi!,” ngu mu ai. #Mrk 14:65.
Petru Gaw Yesu Hpe Nyet Kau Ai Lam
(Mrk 14:66-72; Luk 22:56-62; Yhn 18:15-18,25-27)
69Petru gaw dai wang kata e dung nga yang, Hkinjawng Agyi Kaba wa a nchyang numsha langai mi shi kaw sit sa nna, “Nang mung Galile masha Yesu hte rau nga ga ndai,” ngu wu ai.
70Rai ti mung Petru gaw, dai hpe shanhte yawng a man e nyet kau nna, “Nang tsun nga ai lam ngai hpa n chye nngai,” ngu wu ai. 71Bai nta jan de pru wa yang, nchyang numsha kaga shi hpe mu nna, “Ndai wa mung Nazaret na Yesu hte rau kanawn ai wa rai nga ai,” ngu wu ai.
72Bai Petru gaw, “Dai masha wa hpe ngai n chye nngai,” ngu nna dagam wu ai. 73Dai hpang gade n na yang, dai yang e tsap nga ai masha ni Petru kaw sit sa wa nna, “Kaja wa nang mung shanhte hta na langai mi rai nga ndai; nang tsun shaga ai mahku hte chye lu nga ai,” ngu nna tsun mu ai.
74Shaloi Petru gaw, “Ngai teng man ai lam tsun nga nngai, ngu nna ngai dagam nngai! Dai n rai yang, Karai Kasang ngai hpe ari jaw u ga! Dai masha hpe ngai n chye nngai!,” ngu mu ai. Shaloi jang u goi sai. 75Dai rai nna Petru gaw, “U garai n goi yang, nang ngai hpe n chye nngai nga nna masum lang nyet kau na rin dai,” nga nna Yesu tsun ai ga hpe bai myit dum dat wu ai. Shaloi shi gaw shinggan de pru nna ja ja hkrap nga ai.
Currently Selected:
MAHTE 26: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.