MALAHKI LAIKA 2
2
1Chyahtum Chyalai N-gun rawng ai dai Madu gaw hkinjawng ni hpe, “Ndai gaw nanhte a matu hkang da ai ga rai nga ai: 2Nanhte galaw ai amu hte ngai hpe shagrau sha-a lu na rai myit dai. Nanhte gaw ngai tsun ai ga hpe n madat myit dai rai yang, nanhte hpe dagam dala hkrum shangun na nngai. Nanhte a matu ngu nna hkam la lu ai karum arai ni hta dagam dala tawn da na nngai. Nanhte gaw nye a hkang da ai ga hpe ahkyak n la ya myit dai majaw shanhte hpe teng teng dagam tawn da ya mase ai. 3Ngai gaw nanhte a kashu kasha ni hpe ari jaw na we ai, nanhte nawng ya ai dusat ni a ahkyi hte nanhte a myi man hta chya ya na nngai; nanhte gaw hkyi bum de shapraw kau dat hkrum na myit dai. 4Dai hpang, ndai hkang da ai ga nanhte hpe ngai jaw ya sai hpe nanhte chye na marin dai; ndai hku nna Lewi amyu matu hkinjawng ni hte tawn da ai nye a ga shaka gaw hten mat na ra ai n rai. #Bhk 3:11-13.
5“Ngai shanhte hpe ga sadi jaw ai nye a ga shaka gaw asak hte ngamu ngamai lam rai nga ai, dai gaw ngai shanhte hpe jaw ni ai, shaloi shanhte ngai hpe hkungga na mu ai. Ndai nhtoi ni hta, shanhte ngai hpe hkungga ai hte hkrit kamyin nga ma ai. #Bhk 25:12. 6Shanhte gaw shut ai lam hpe n rai, jaw ai lam sharin ya ma ai. Shanhte gaw ngai sharawng awng ai hku nga ma ai; shanhte gaw shanhte hkum nan jaw ai amu sha galaw ma ai n rai, masha law law ni hpe mung n hkru ai amu jahkring kau na matu karum nga ma ai. 7Karai Kasang a teng man ai machye machyang hpe sharin ya na gaw hkinjawng ni a lit rai nga ai. Nye a myit ra ai lam hpe sharin la na matu, masha gaw shanhte hpang de sa ang nga ma ai, hpa majaw nga yang, shanhte gaw Chyahtum Chyalai N-gun rawng ai dai Madu a kasa ni rai ma ai.
8“Rai ti mung ya chyawm gaw nanhte hkinjawng ni jaw ai lam kaw na yit mat wa manit dai. Nanhte a sharin shaga ai ga gaw masha law law hpe woi shut manit dai. Nanhte hte ngai tawn da ai ga shaka hpe mung run kau manit dai. 9Dai rai nna, ngai gaw Israela amyu masha ni hpe lang let nanhte hpe nhpu nru di shangun na made ai, hpa majaw nga yang nanhte gaw nye a myit n hkan ai sha, nye a amyu masha ni hpe sharin achyin ai shaloi masha shagu hpe maren mara n di nga myit dai.”
Karai Kasang Hta Sadi N Dung Ai Amyu Masha Ni
10Anhte yawng kawa langai sha lu ga ai n rai ni? Anhte yawng hpe hpan da ai Karai Kasang mung langai sha rai nga ai n rai ni? Dai rai yang, shada da tawn da ai anhte a ga sadi ni hpe anhte hpa majaw run kau nna, anhte a kaji kawa ni hte Karai Kasang tawn da sai ga shaka hpe hpa majaw n sawn n sang di ga ta? 11Yuda amyu masha ni gaw Karai Kasang hpe jaw ai shanhte a ga sadi hpe run kau nhtawm Yerusalem hte mungdan ting hta matsat shabat amu galaw ma ai. Dai Madu tsaw ra ai Nawku Htingnu hpe shanhte awu asin di kau mu ai. Lasha ni gaw maigan karai ni hpe nawku ai numsha ni hpe hkungran la ma ai. 12Israela masha wuhpung kaw na ndai zawn re ai amu galaw ai ni hpe dai Madu yeng seng kau u ga; anhte a amyu baw ni dai Chyahtum Chyalai N-gun rawng ai dai Madu hpang de la sa ai shagu hkungga ni hta shanhte hpe galoi mung bai n shang lawm shangun u ga.
13Ndai gaw nanhte galaw ai kaga amu rai nga ai. Nanhte gaw dai Madu a tawn hkungri hpe myi prwi, hkrap ngu hkrap ngoi hte madai nna ka-up da myit dai, hpa majaw nga yang nanhte shi hpang de la sa ai shagu hkungga ni hpe loi mi mung hkap la ai n rai. 14Nanhte gaw hpa majaw dai ni hpe shi galoi mung n hkap la ai hpe san myit dai. Dai gaw na a brang ram prat e nang hkungran da sai madu jan hpe jaw ai na a ga sadi hpe nang run kau nit dai hpe shi chye ai majaw rai nga ai. Shi gaw na a kanawn manang rai nga ai hte shi hta sadi dung na nngai ngu, Karai Kasang a man e nang ga sadi jaw ti mung na a ga sadi hpe nang run kau nga ndai. 15Karai Kasang gaw nang hpe shi hte hkum shan wenyi langai sha di hpan da sai n rai ni? Ndai lam hta shi a yaw shada ai gaw hpa rai nga a ta? Dai gaw jet ai Karai Kasang a amyu masha ni rai nga ai kashu kasha ni hpe nang shangai nga ndai. Dai re ai majaw nanhte kadai mung tinang madu jan hpe jaw da ai tinang a ga sadi hpe teng teng run lu na n rai. 16Dai Madu Israela a Karai Kasang gaw, “Ngai gaw num jahka ai hpe n dawng nngai. Nanhte hta na langai ngai tinang a madu jan hpe dai zawn n hkru ai amu galaw ai shaloi, dai hpe ngai n dawng nga nngai. Na a madu jan hta sadi dung nga na ngu nna, jaw ai na a ga sadi hpe nang teng teng hkum run kau et,” ngu nna hkang da wu ai.
Tara Jeyang Na Nhtoi Ni Wa Sai
17Nanhte gaw dai Madu hpe tsun shaga ai ga hte hki ba shangun myit dai. Rai ti mung nanhte chyawm gaw, “Anhte shi hpe kaning rai hki ba shangun ga ta?,” ngu nna san myit dai. Bai Chyahtum Chyalai N-gun rawng nga ai dai Madu gaw “N hkru ai amu galaw ai ni yawng mai kaja nga ma ai; ngu nna myit ma ai, teng teng shi gaw shanhte hpe ra sharawng nga ai. Shing n rai, tara malang ai hku zawn hkan ai Karai Kasang gaw kanang rai nga a ta?,” ngu nna san ai hku nna mung, shi hpe shatsang nga ai.
Currently Selected:
MALAHKI LAIKA 2: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.