LUKA 6:27-49

“Rai ti mung, madat la nga ai ni nanhte hpe ngai tsun made ga, nanhte a hpyen ni hpe tsaw ra mu; nanhte hpe n dawng n yawt ai ni hpe kaja ai hku galaw mu. Nanhte hpe dagam ai ni hpe shaman ya mu; nanhte hpe aroi arip di ai ni a matu akyu hpyi mu. Nanhte a shabyi maga mi bye ya ai wa hpe, maga mi naw ja ya u; na a ntsa palawng la kau ya ai wa hpe na a palawng mung hkum ndang u. Nang kaw hpyi ai wa kadai hpe mung jaw u; Marai langai ngai na a arung arai la kau ya ai shaloi bai hkum hpyi mu. Masha ni hpe nanhte a matu hkan galaw shangun mayu ai zawn, masha ni a matu hkan galaw mu. “Nanhte hpe tsaw ra ai ni hpe sha tsaw ra myit yang gaw, nanhte, Karai Kasang a shaman chyeju gara hku hkam la lu na myit ni? Yubak kap ai ni mung tinang hpe tsaw ra ai ni hpe gaw tsaw ra ma ai. Nanhte hpe kaja ai hku galaw ai ni hpe sha kaja ai hku galaw htang myit yang gaw, nanhte Karai Kasang a shaman chyeju gara hku lu la na myit ta? Yubak kap ai ni mung dai zawn galaw ma ai. Bai htang lu na zawn nawn ai ni hpe sha hkoi shap ya myit yang gaw, nanhte Karai Kasang a shaman chyeju gara hku hkam la lu na myit ni? Yubak kap ai ni pyi hkoi ya ai made bai lu la hkra yubak kap ai ni hpe hkoi shap ya ma ai. Nanhte chyawm gaw, nanhte a hpyen ni hpe tsaw ra mu; hpa mung lu la na n myit mada ai sha hkoi shap ya mu. Shing rai yang, nanhte shabrai kaba lu na hte, Tsaw Htum ai Karai Wa a kasha ni mung nanhte tai na marin dai; hpa majaw nga yang shi gaw chyeju malap kau ai ni hte, n hkru n hkra re ai ni hpe chyeju galaw mu ai. Nanhte a Kawa Karai Kasang matsan dum chye ai hte maren, nanhte mung matsan chye dum mu. “Masha ni hpe hkum jeyang myit, shaloi she Karai Kasang mung nanhte hpe n jeyang na ra ai, masha ni hpe mara hkum shagun mu, shing rai yang, Karai Kasang mung nanhte hpe mara n shagun na ra ai. Masha ni hpe mara dat ya mu, shaloi Karai Kasang mung nanhte hpe mara dat ya na ra ai. Masha ni hpe jaw mu, shing rai jang Karai Kasang mung nanhte hpe jaw na marin dai, kaja wa hpring kabrat anin garin nna teng man ai dang hte nanhte a lata hta hkap la lu ai made ru jaw bang ya na ra ai; nanhte masha ni hpe hteng ya ai dang hte maren, Karai Kasang gaw nanhte hpe bai hteng ya na marin dai,” ngu nna tsun mu ai. Dai hta kaga, ga shadawn mung shanhte hpe tsun mu ai gaw, “Myi n mu ai wa langai mi gaw, kaga myi n mu ai wa langai mi hpe lam n woi madun lu ai; shing rai yang, lahkawng yan nhkun hta di hkrat bang na mara ai. Sape gaw shi a sara hta grau ai n rai; rai ti mung, sape shagu gaw, shi sharin la ai hpaji hkum hkra sharin la ai hpang, tinang a sara zawn rai na ra ai. “Tinang a myi hta rawng ai hpun tawng hpe shawng n myit yu ai mi, na nhpu nnau wa a myi hta rawng ai nbun hpe hpa rai yu nga n ta? Tinang a myi hta rawng ai hpuntawng hpe n mu lu ai wa mi, ‘Hpu nau wa e, na a myi hta rawng ai nbun hpe ngai naw lai kau ya de ga!,’ nga nna hpu nau wa hpe kaning rai tsun lu n ta? Sawt ai wa e! Na a myi hta na hpuntawng hpe shawng la kau u; dai hpang na nhpu nnau wa a myi hta rawng ai nbun hpe lai kau ya na matu nang asan sha mu na rin dai. “Kaja ai hpun gaw, n kaja ai asi n si ai; dai hte maren, n kaja ai hpun mung, kaja ai asi n si ai. Hpun shagu hpe shi a asi hte chye ginhka lu nga ai, hpa majaw nga yang, ju hpun hta maihpang si kadai n di la yu ai; ju singwum hta na mung sabyi si kadai n di la yu ai. Kaja ai masha gaw, kaja ai arai hte hpring rawng nga ai kraw lawang sut dek hta na kaja ai rai shapraw dan ai; n kaja ai wa mung, n kaja ai sut dek hta na n kaja ai shapraw dan ai, hpa majaw nga yang, kraw hta hpring chyat nga ai kaw na shi a n-gup hte tsun pru nga ai. “Ngai tsun ai hte maren n hkan galaw myit dai mi hpa rai nanhte ngai hpe Madu e, Madu e, nga myit ta? Ngai hpang de sa nhtawm, nye a ga ni hpe madat la nna hkan galaw ai wa kadai mung, kaning re ai hte bung ai gaw, ngai nanhte hpe madun dan made ga. Dai wa gaw, wahpang gaw yang, sung sung htu nna lunghkrung ntsa e npawt gaw ai wa hte bung nga ai. Hka rawt hka tung wa yang, hka hpungla ni dai nta hpe ahtu adawt rai ti mung, ngang ngang kang kang gaw da sai majaw, dai hpe n shamawt lu ai. Rai ti mung, ga na la nna n hkan galaw ai chyawm gaw, npawt nhpang n gaw ai sha ga man hta wahpang gaw ai wa hte bung nga ai, hka hpungla ni dai nta hpe ahtu adawt nna kadawng daw mat ai, dai nta a hten run mat ai lam gaw hkrithpa kaba rai nga ai!”