LUKA 3
3
Hkalup Sara Yawhan A Hkaw Tsun Ai Ga
(Mat 3:1-12; Mrk 1:1-8; Yhn 1:19-28)
1Kehta#3:1: Kehta: Roma hkawseng Gaius Julias si ai hpang Augustu a lakhtak kaw nna (BC 31-A.D 14) shaning 200 ning du hkra Roma hkawseng ni a aya hte seng nna shamying ai mying rai malu ai. Tiberi hkaw dung ai shi manga ning hta, Yuda mung e Pontu Pilat gaw munggyi aya hta, Galile mung e Herod gaw du aya hta, Ituri hte Trakuni ginwang hta e Herod a kanau Hpilip gaw du aya hta, Abili mung e Lusanu gaw du aya hta, rai shajang nga ma ai. 2Dai ten hta Anna yan Kayahpa gaw hkinjawng agyi aya hta rai shajang ma ai shaloi, Karai Kasang a mungga gaw nam mali e Zahkaria a kasha Yawhan kaw du ai. 3Shi gaw Yawdan hka ginwang shara shagu hkan e du hkawm let, “Nanhte a yubak mara ni kaw na myit malai lu nna hkalup hkam la mu, shaloi she Karai Kasang gaw nanhte a yubak mara ni hpe raw dat kau ya na ra ai,” nga nna hkaw tsun nga ai. 4Myihtoi Esaia Laika hta ka da sai hte maren ning nga nga ai:
“Nam mali kata e masha langai mi jahtau ai nsen gaw,
“Dai Madu a matu lam lajang da mu!
Shi a lam masun ni hpe shading da mu!#Esa 40:3-5; Mat 3:3; Mrk 1:3; Yhn 1:23.
5Hkaraw hkamwam shagu kaput lu na rai nga ai,
Bum hte kawng shagu hpe daw shara kau lu na rai nga ai;
Magaw ai lam ni hpe shading lu na rai nga ai,
machyawk marawk re ai lam ni hpe shara lu na rai nga ai.
6Shaloi, masha amyu ni yawng gaw, Karai Kasang a hkye hkrang la ai lam mu lu na mara ai!’”
7Dai majaw, Yawhan a lata hta hkalup hkam la na pru sa wa ai shawa masha ni hpe shi tsun mu ai gaw, “Pu htum#3:7: Pu htum: myit magaw rawng ai ni, masha sat ai baw gung rawng ai ni, zai ladat law ai ni ngu mayu ai kumla ga re. amyu ni e, Karai Kasang kaw na du magang ra ai yubak a ari hta na hprawng lawt lu myit ga, nanhte hpe kadai shadum myit ta? #Mat 3:7; 12:34; 23:33. 8Dai majaw nanhte a yubak mara ni kaw na myit malai kayin wa sai ngu nna tsun lu hkra re ai lam hkan sa galaw mu. Abraham#3:8: Abraham: Abraham a aru arat kashu kasha, Yuda amyu re ai majaw, dai Yubak a ari kaw na htingtsi lu na zawn hkum nawn ngu mayu ai. gaw anhte a ji wa rai nga ai, nga nna nanhte shada da hkum tsun myit; nanhte hpe ngai tsun made ga, Karai Kasang gaw ndai nlung ni hpe la nna shi a matu kashu kasha ni hpe hpan shapraw dat lu ai.#Yhn 8:33. 9Dai nwa gaw, hpun ni hpe ru kaw nna hkawt kran kau na matu hkyen da chyalu rai nga sai, dai rai nna, asi kaja n si ai hpun shagu hpe kran daw kau nna, wan hta kabai bang kau na rai nga ai,” ai.#Mat 7:19.
10Shaloi shawa masha ni, “Dai rai taw gaw, anhte kaning rai na rai ta?,” nga nna shi hpe san ma ai.#Kas 2:37.
11Shi shanhte hpe htan mu ai gaw, “Palawng lahkawng lu ai wa gaw, n lu ai wa hpe karan u ga, shat lusha lu ai wa mung dai hte maren jaw u ga,” ngu mu ai.
12Kang hta ai ni nkau mi mung hkalup hkam la na sa nna, “Sara e, anhte gara hku galaw na rai ta?,” nga nna shi hpe san ma ai.#Luk 7:29; Mat 21:32.
13Shi gaw, “Nanhte hta la na shadang tawn ai hta jan nna hkum hta la myit,” ngu nna shanhte hpe tsun mu ai.
14Hpyenla ni mung, “Anhte wa gaw kaning rai na rai ta? Anhte hpa rai ta?,” nga nna shi hpe san ma ai.
Shi gaw, “Kadai wa kaw na mung adip arip di nna, gumhpraw hkum kashun la myit, n tara ai hku mara hkum shagun myit, nanhte lu ai shabrai hte myit dik dum nga mu,” ngu nna shanhte hpe tsun mu ai.
15Masha ni chyawm gaw, shanhte a myit mada ai lam law wa ai hte, “Yawhan gaw Meshia wa mi hkoi rai nga ai kun?,” nga nna yawng mayawng gaw tinang a kraw kata e shi a lam myit sumru shajang nga ma ai. 16Shing rai Yawhan gaw, “Ngai gaw nanhte hpe hka hte hkalup jaw made ai; rai ti mung, ngai hta atsam grau rawng ai wa gaw sa wa ra ai; shi a kyepdin sumri raw na pyi ngai n ging nngai. Shi gaw Chyoi Pra ai Wenyi hta mung, wan hta mung, nanhte hpe hkalup jaw na ra ai. 17Shi a lata hta shi hkuwawn lang nna shi a mam ni mahkra hpe yit jasan kau nhtawm, mam gu hpe shi a dum hta shinggyin da na ra ai, nsan hpe chyawm gaw galoi mung n krip ai wan hta nat kau na ra ai,” ngu nna shanhte hpe tsun mu ai.
18Shingrai Yawhan gaw, kaga lam amyu myu hku nna mung, dai Kabu Gara Shiga hkaw tsun ai hte shanhte a lam ni galai shai wa shangun na matu shadum jahprang da mu ai. 19Rai ti mung, munggyi Herod gaw shi a kanau Hpilip a madu jan Herodia hpe kashun la ai hta n ga, shi galaw ai n hkru n kaja ai amu kaga law law hte seng nna mung, daru sharin ai hkrum wu ai.#Mat 14:3; Mrk 6:17. 20Dai hpang, Herod gaw Yawhan hpe rim la nna htawng hta sharen da ai hte shawng de na hta grau sawng ai mara galaw wu ai.
Yesu Hkalup Hkam La Ai
(Mat 3:13-17; Mrk 1:9-11)
21Masha yawng hkalup hkam la ngut ai hpang, Yesu mung hkalup hkam la nhtawm, akyu hpyi nga yang, lamu hpaw malang wa nna,#Mat 3:13; Yhn 1:32. 22Dai Chyoi Pra ai Wenyi gaw hkrang dan dan shi a ntsa e hkrudu zawn yu hkrat wa nna, “Nang gaw nye a tsaw ra ai Kasha rai nga ndai; nang hta ngai sharawng awng nngai law,” nga nna lamu de na nsen du pru ai.
Madu Yesu A Ahtik Labau
(Mat 1:1-17)
23Yesu amu galaw hpang ai shaloi asak sumshi ning daram rai wa sai; shi gaw masha ni a myit yu ai hte maren, Yosep a kasha rai nga ai; Yosep gaw Heli a kasha Heli gaw Mahtat a kasha, rai nga ai. 24Mahtat gaw Lewi a kasha; Lewi gaw Melhki a kasha, Melhki gaw Yanna a kasha; Yanna gaw Yosep a kasha rai nga ai. 25Yosep gaw Matahtia a kasha; Matahtia gaw Amu a kasha; Amu gaw Nahum a kasha; Nahum gaw Esali a kasha; Esali gaw Nagai a kasha; 26Nagai gaw Maat a kasha; Maat gaw Matahtia a kasha; Matahtia gaw Semai a kasha; Semai gaw Yosek a kasha; Yosek gaw Yoda a kasha; 27Yoda gaw Yawhan a kasha; Yawhan gaw Resa a kasha; Resa gaw Zerubabela a kasha; Zerubabela gaw Salahtila a kasha; Salahtila gaw Neri a kasha; 28Neri gaw Melhki a kasha; Melhki gaw Adi a kasha; Adi gaw Kusam a kasha; Kusam gaw Elamadam a kasha; Elamadam gaw Era a kasha; 29Era gaw Yesu a kasha; Yesu gaw Elieza a kasha; Elieza gaw Yawrim a kasha; Yawrim gaw Mahtat kasha; Mahtat gaw Lewi a kasha; 30Lewi gaw Simun a kasha; Simun gaw Yuda a kasha; Yuda gaw Yosep a kasha; Yosep gaw Yawnam a kasha; Yawnam gaw Eliakim a kasha; 31Eliakim gaw Melia a kasha; Melia gaw Mena a kasha; Mena gaw Matahta a kasha; Matahta gaw Nahtam a kasha; Nahtam gaw Dawi a kasha; 32Dawi gaw Yese a kasha; Yese gaw Obed a kasha; Obed gaw Bua a kasha; Bua gaw Sala a kasha; Sala gaw Nasun a kasha; 33Nasun gaw Admin a kasha; Admin gaw Arni a kasha; Arni gaw Hezron a kasha Hezron gaw Hparet a kasha; Hparet gaw Yuda a kasha; 34Yuda gaw Yaku a kasha; Yaku gaw Isak a kasha; Isak gaw Abraham a kasha; Abraham gaw Htera a kasha; Htera gaw Nahora a kasha; 35Nahora gaw Serak a kasha; Serak gaw Ragu a kasha; Ragu gaw Hpelek a kasha; Hpelek gaw Ebera a kasha; Ebera gaw Sala a kasha; 36Sala gaw Kainam a kasha; Kainam gaw Arhpaza a kasha; Arhpaza gaw Shem a kasha; Shem gaw Noa a kasha; Noa gaw; 37Lamek a kasha; Lamek gaw Mahtusela a kasha; Mahtusela gaw Enuk a kasha; Enuk gaw Yared a kasha; Yared gaw Mahalalela a kasha; Mahalalela gaw Kainam a kasha; 38Kainam gaw Enusha a kasha; Enusha gaw Shet a kasha; Shet gaw Adam a kasha; Adam gaw Karai Kasang a kasha rai nga ai.
Currently Selected:
LUKA 3: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
