JAW JAU 6
6
1Dai Madu gaw Mawshe hpe lawu de na hkan sa na tara ni jaw ya wu ai. #Bhk 5:5-8. 2Marai langai ngai gaw Israela manang wa ap da ai arai nhtang ap ya na ningdang kau let, shi kaw na arai lama ma lagu la ai, mawp sha ai, 3shing n rai mat mat ai arai lama ma a majaw masu hkalem ai, arai n mu tam la sai ngu nna dagam let dai Madu hpe yubak galaw hkrup ai hte, 4-5shing re ai lam langai ngai hpe shi yubak galaw hkrup ai rai yang, dai zawn n ding n man ai hku lu la ai arai shi bai jaw lu na rai nga ai. Shi galaw shut kau ai mara dan dawng wa ai shani chyawm gaw arai madu hpe tsa lam shadang 20% bai kahtap jaw nna jahpring ya na rai wu ai. 6Shi gaw dai Madu hpe htang jaw ai hkungga a matu kachyi mi mung ra n rawng ai sagu la shing n rai bainam hkinjawng wa hpang de la sa na rai wu ai. De a manu hpe chyawm gaw tara shang lang ai joi jang hte maren manu sawn la na rai nga ai. 7Hkinjawng wa gaw shi shut kau ai yubak mara a matu shagu hkungga nawng ya ai hte shi gaw mara raw dat kau ya ai hkrum na rai nga ai.
Hkum Ting Nat Nawng Ai Hkungga Ni
8Dai Madu gaw wan nat hkungga nawng jau yang hkan sa na tara a lam ni, 9Arun hte shi a shadang sha ni hpe matsun madun na matu Mawshe hpe hkang da wu ai. Wan nat hkungga hpe tawn hkungri ntsa e shana tup nat nna wan mung shagrung da na rai nga ai. 10Dai hpang hkinjawng wa gaw shi a lachyit palawng galu hte labu kadun la nna tawn hkungri ntsa e hkru ngam nga ai wan wu magawn la nhtawm tawn hkungri makau e tawn da na rai wu ai. 11Shi gaw hpun palawng ni galai kau nhtawm dap a shinggan na san da ai shara de dai wan wu sa sa kau na rai wu ai. 12Tawn hkungri na wan gaw galoi mung n si mat ai sha agrung nga lu na rai nga ai. Hkinjawng wa mung jahpawt shagu hpun ju nna, de a ntsa e wan nat hkungga hkyen lajang da nhtawm mahku hkungga sau nat na rai wu ai. 13Tawn hkungri na wan gaw galoi mung agrung nga nna si krip mat lu na n rai.
Shadung Hkungga Ni
14Ndai gaw shadung hkungga ni nawng ya na matu hkan sa na tara ni rai nga ai. Arun a shadang sha hkinjawng wa gaw dai shadung hkungga hpe tawn hkungri a man e dai Madu hpe nawng ya na rai wu ai. 15Dai hpang shi gaw mani ai shadung latup mi, sau hte manam pyaw ai lawban ni tawn hkungri de la sa nhtawm dai ni yawng dai Madu hpe nawng jau sai masat dingsat langai zawn tawn hkungri hta nat na rai wu ai. Dai hkungga sangau bat gaw dai Madu hpe awng sharawng shangun nga ai. 16-17Ngam ai hpe chyawm gaw hkinjawng ni sha na rai ma ai. Dai hpe matsi n bang ai sha muk kabaw nna dai Madu a hpung shingkang shanu nga ai Sum wang kata na Chyoi Pra ai Shara hta sha na rai ma ai. Dai Madu gaw hkinjawng ni hpe shanhte a lusha tai nga na matu dai hpe jaw da nu ai. Dai gaw htingrai hkungga hte mara raw hkungga ni zawn grai chyoi pra nga ai. 18Arun a lakung lama na lasha ni kadai mung dai Madu hpe nawng jau ai lusha kamhtaw dai hpe prat mi hte prat mi sha lu na rai ma ai. Dai lusha hkungga hpe sa jum ai ni kadai mung de a chyoi pra ai daru magam n-gun a majaw machyi shoi chyum hkrum na rai nga ai.
19Dai Madu gaw Arun hte shi a shadang sha ni hkinjawng aya hkam la na matu hkan sa na tara ni Mawshe hpe jaw ya wu ai. 20Arun hte shi a kasha ni hkinjawng aya dang la ai shani hta dai Madu hpe nawng jau na shadung mani pawng lahkawng (shani shagu nawng jau ai shadung hkungga madang hte maren rai na) hpe jahpawt de ka-ang hkup, shana de ka-ang hkup sak jaw na rai nga ai. 21Dai hpe sau hte kayau gumrin nhtawm di dam hta kangau ngut jang, gang gyi ahkyep nna dai Madu awng sharawng ai sangau hpe shadung hkungga zawn sak jaw na rai wu ai. 22Ndai hkungga hpe Hkinjawng Kaba amu hta daw jau nga ai Arun a hkringhtawng amyu matu mara shagu prat mi hte prat mi galaw na rai ma ai. Dai gaw dai Madu hpe tsep kawp nat nawng na shagu hkungga rai nga ai. 23Dai shadung hkungga hpe hkinjawng wa mung sha lu na n rai; dai yawng nat nawng kau lu na rai nga ai.
Htingrai Hkungga Ni
24Dai Madu gaw Arun hte shi a shadang sha ni hpe htingrai hkungga a matu hkan sa na tara ni jaw ya na Mawshe hpe hkang da wu ai. 25Wan nat hkungga a matu yam nga sat ai shara dai tawn hkungri a dingdung maga hta htingrai hkungga a matu yam nga sat na rai ma ai. Dai gaw chyoi pra htum ai hkungga rai nga ai. 26Dai htingrai hkungga nawng ya ai hkinjawng wa gaw hkungga shan hpe dai Madu a hpung shingkang shanu nga ai Sum wang kata na chyoi pra ai shara hta sha lu na rai wu ai. 27Dai yam nga shan hpe hkra ai wa hte hkra ai arai hpa mung de a chyoi pra ai daru magam n-gun a majaw machyi shoi chyum hkrum na rai wu ai. Yam nga asai hte gamang hkra ai hpun palawng hpa hpe mung chyoi pra ai shara hta hkrut kau na rai nga ai. 28Dai shan shadu ai ga di bu hpe chyawm gaw agrawp kau na rai wu ai. Nhprang arai hte galaw ai di lang ai rai yang, dai hpe arut kau nhtawm hka hte kashin kau na rai nga ai. 29Hkinjawng dinghku masha ni hta na lasha ni kadai mung dai hkungga sha mai nga ai; dai gaw chyoi pra htum nga ai. 30Rai ti mung chyoi pra ai shara hta yubak mara htingrai na matu, Sum kata de la shawn ai asai shagu hte ashan hpe chyawm gaw sha lu na n rai; dai hpe wan hta nat kau na rai nga ai.
Currently Selected:
JAW JAU 6: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
