JAW JAU 24
24
Sadi Sahka Hte Pyengdin Lang Na Lam
(Pru 27:20-21)
1Dai Madu gaw Israela amyu masha ni hkan sa na lam jaw ya na matu Mawshe hpe tsun wu ai. 2Sum kata na pyengdin ni a matu kaja htum ai hte jet ai tsanlun sau hpe la sa shangun mu; shing rai jang dai wan gaw n si mat ai sha tut e achyi nga na rai wu ai. 3Chyoi Pra Htum ai Shara hta tawn da ai Ga Shaka Sumpu a man na nba grang a shinggan dai Madu a hpung shingkang shanu nga ai shara hta jahpawt du hkra chyi nga na matu, Arun gaw shana de shagu sa shatu da na rai wu ai. Dai gaw prat mi hte prat mi hkan galaw nga na tara rai nga ai. 4Arun gaw ja jet hte galaw ai pyengdin shadun hta pyengdin ni hpe sadi sahka hte lajang nna dai Madu a man e tut nawng shachyi da na rai wu ai.
Karai Kasang A Matu Nawng Jau Ai Muk
5Mani ai shadung pawng hkun mali la nna muk tawng shi lahkawng kabaw na rai nga ai. 6Dai hpe dai Madu a man na ja jet hte galaw da ai ku ntsa e kawng lahkawng hkawng da nhtawm kawng mi hta muk tawng kru kru kahtap kawng da na rai wu ai.#Pru 25:30. 7Dai Madu a matu hkungga kumla shatai ai dai muk kawng lahkawng a ntsa e jet ai lawban mara tawn da na rai wu ai. 8Dai muk hpe Bansa Nhtoi shagu dai Madu a man e prat mi hte prat mi lajang tawn da na rai wu ai. Dai hpe Israela amyu masha ni htani htana agalaw nga na rai ma ai. 9Dai gaw hkinjawng ni a matu dai Madu hpe nawng ya ai chyoi pra htum ai lusha rai nga ai majaw Arun hte shi a lakung lama ni la lu nna chyoi pra ai shara hta sha lu na rai ma ai.#Mat 12:4; Mrk 2:26; Luk 6:4.
Teng Man Rap Ra Ai Ari A Kasi
10-11Egutu la hte Dan amyu bawsang hta na Dibri a shayi sha ngu ai Israela amyu mying ai Shelomit yan hta shadang sha langai nga nga ai. Dai wa gaw dap kata hta nga ai Israela masha langai mi hte ga law wu ai. Shing rai ga law rawng nga ma yang, shi gaw Karai Kasang hpe matsa wu ai. 12Shanhte gaw dai wa hpe Mawshe hpang de woi sa nna shi hpe kaning di na lam dai Madu shanhte hpe tsun ai aten du hkra shi hpe rim rawng da ma ai.
13-14Dai Madu gaw Mawshe hpe, “Dai masha hpe dap shinggan de shapraw kau mu. Shi mara lu nga ai hpe sakse tai ya na matu shi tsun ai ga na mana hte gaw shi a baw hta lata mara da na ma ai; dai hpang shawa hpung ting shi hpe nlung hte kabai sat kau na rai ma ai. 15Dai hpang, kadai rai ti mung Karai Kasang hpe matsa ai wa gaw shi a mara hkam sha nna si ai hkrum na lam, 16Israela masha ni hpe tsun u. Israela amyu masha mi rai ti mung, Israela mung hta nga ai maigan masha rai ti mung dai Madu hpe matsa ai wa kadai mung shawa hpung ting e nlung hte kabai sat kau ai hkrum na rai wu ai.
17“Masha sat ai wa kadai mung sat kau ai hkrum na rai wu ai;#Pru 21:12. 18Marai langai ngai a yam nga sat ai wa kadai mung de a matu wa lu na rai wu ai. Dai gaw asak a matu asak ngu ai tara rai nga ai.
19“Kaga masha wa hpe machyi hkra shangun ai wa kadai mung shi galaw ai hte maren bai hkam la na rai wu ai. 20Nra langai agrawp daw ai rai yang, shi a nra langai mung agrawp daw kau ai hkrum na rai wu ai; myi jahten kau ya ai wa mung shi a myi jahten kau ai hkrum na rai wu ai; awa adawt malawk kau ya ai wa gaw shi a awa mung adawt malawk kau ya ai hkrum na rai wu ai. Masha kaga wa hpe machyi hkra shangun ai wa gaw shi mung dai hte maren nhtang hkam sha na rai wu ai.#Pru 21:23-25; Trj 19:21; Mat 5:38. 21Yamnga sat kau ya ai wa gaw de a malai wa lu na rai wu ai; rai ti mung masha sat ai wa chyawm gaw sat kau ai hkrum na rai wu ai. 22Ngai gaw dai Madu nanhte a Karai Kasang rai nga nngai majaw ndai tara gaw Israela amyu masha ni rai ti mung, nanhte hta hkan nga ai maigan masha ni hte nanhte yawng a matu rai nga ai,” ngu nna hkang da wu ai. #Bhk 15:16.
23Mawshe gaw Israela amyu masha ni hpe dai lam tsun ngut jang shanhte gaw dai masha wa hpe dap shinggan de dun shapraw sa wa nhtawm nlung hte kabai sat kau ma ai. Ndai hku nna Israela amyu masha ni dai Madu Mawshe hpe hkang da ai hte maren hkan galaw nga ma ai.
Currently Selected:
JAW JAU 24: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
