YAWSHU 9
9
Gibeon Masha Ni Yawshu Hpe Masu Hkalem Ai
1Ya, Yawdan hka a sinna hkran up ai hkawhkam ni yawng mung, bum ga, bum lagaw, pa layang hkan, Lebanon dingdung maga, Ka-ang Panglai hka kau mayan yawng hkan up ai Hiti, Amori, Hkanani, Perizi, Hiwi hte Yebuzi amyu ni a hkawhkam ni gaw Israela masha ni a awng padang shiga na ma ai. 2Yawshu hte Israela amyu masha ni hpe shanhte yawng n-gun galung la nna jawm htim gasat na matu rau hpawng ma ai.
3Rai ti mung Hiwi amyu Gibeon masha ni chyawm gaw Yerihko hte Ai mare hta Yawshu galaw nu ai amu hpe na mu ai rai nna 4shi hpe masu hkalem na lam shanhte daw dan ma ai. Dai rai nna shanhte a lawze daw ni hta tingsan dingsa ni htaw nna aje amya kapa gala re ai shanhpyi sabyi ndum dingsa ni gun sa ma ai. 5Shanhte gaw kapa gala re ai kyepdin dingsa ni htaw, bu hpun palawng shaje hpun sa nna shanhte gun sa ai muk mung hkraw nna nshu lamu kap mat sai lusha ni gun let sa wa ma ai. 6Dai hpang shanhte gaw Gilgala e jung ai dap de sa nhtawm Yawshu hte Israela amyu masha ni hpe, “Anhte gaw sumtsan mung na du sa raga ai. Nanhte hte ga shaka tawn da na anhte ra sharawng ga ai,” ngu nna tsun mu ai.
7Rai ti mung Israela amyu masha ni mahtang, “Nanhte hte anhte hpa lam ni a majaw ga shaka tawn da na rai nga ga ni? Nanhte ndai ani sha hkan nga sam ang nga myit dai,” ngu nna tsun mu ai. #Pru 23:32; 34:12; Trj 7:2.
8Shanhte mung Yawshu hpe, “Anhte gaw na a mayam ni rai nga ga ai,” ngu nna tsun mu ai.
Yawshu gaw shanhte hpe, “Nanhte kadai ni rai nga myit ni? Nanhte kanang na du sa wa myit ni?,” ngu nna san yu wu ai.
9-10Dai hpang shanhte mung ndai maumwi shanhte hpe tsun dan mu ai: “Dai Madu na a Karai Kasang a lam anhte na ga ai majaw mung, Egutu mung hta shi galaw dan sai lam magup a lam hpe anhte na ga ai majaw mung, Yawdan hka a sinpraw hkran na Amori hkawhkam lahkawng rai nga ai Heshbon Hkawhkam Sihon hte Ashtarot e nga ai Bashan Hkawhkam Oga yan hta galaw nu ai lam ni a majaw mung, grai tsan ai sumtsan mung na anhte du sa raga ai. #Bhk 21:21-35. 11Anhte a ningbaw ni hte anhte a mungdan hta nga ai masha ni yawng gaw lam e sha na lusha jarit hpe jin jin la gun nhtawm nanhte hpe sa tau la na lam anhte hpe tsun dat mi ai. Anhte gaw nanhte a mayam tai na matu mung, anhte hte ga shaka tawn da na matu san jahkrup na matu mung shatsam hkrum nga ga ai. 12Anhte a muk ni hpe yu yu mu. Nanhte hpe sa tau la na ngu nta kaw na anhte pru wa yang gun ai ndai muk ni akahtet sha rai nga ai. Rai ti mung yu yu mu! Ya chyawm gaw dai ni hkraw mat nna nshu lamu kap mat hkra rai mat sai. 13Anhte ndai sabyi shanhpyi ndum ni hta sabyi ntsin hte jahpring da ga yang dai ni nnan hkrai rai nga ai; rai ti mung yu yu mu, dai ni je waw mat sai. Anhte a bu hpun palawng hte kyepdin ni lam galu hkawm ai a majaw aje amya rai mat sai.”
14Israela amyu masha ni mung dai Madu hpe n san yu ai sha, shanhte a lusha nkau mi hpe hkap la ya ma ai. 15Yawshu gaw Gibeon masha ni hte jinghku ga shaka shagrin da nhtawm nga lu na ahkang mung shanhte hpe jaw mu ai. Israela shawa hpung a ningbaw ni mung ga shaka hkan shatup na matu dagam sadi jaw mu ai.
16Shanhte hte ga shaka tawn da ai masum ya na ai hpang, ndai masha ni kaja wa teng teng ni nawn ai shara hkan nga ai ni rai nga ma ai hpe Israela masha ni chye ma ai. 17Dai rai nna, Israela amyu masha ni pru sa wa nhtawm masum ya sat yang, dai masha ni nga ai Gibeon, Hkehpira, Berot hte Kiriat Yarim mare ni de du ma ai. 18Rai ti mung dai Madu Israela a Karai Kasang a mying ningsang hta shanhte a ningbaw ni hte dagam shaka da sai ga sadi a majaw Israela amyu masha ni shanhte hpe n sat kau ma ai. Amyu masha ni yawng hte chyawm gaw dai lam hte seng nna ningbaw ni hpe mara shagun let aput ma ai. 19Rai ti mung, shanhte chyawm gaw, “Dai Madu Israela a Karai Kasang a mying ningsang hta shanhte hte dagam shaka da sai ga sadi anhte tawn da saga ai re majaw ya shanhte hpe machyi shangun lu na ga ai n rai. 20Anhte a ga sadi a majaw shanhte hpe jahkrung da saga, anhte shing n di ai rai yang, Karai Kasang anhte hpe ari jaw na mi ai. 21Shanhte hpe jahkrung gaw jahkrung da ga, rai ti mung shanhte gaw anhte a matu hpun hta ya ai hte hka ja ya ai amu galaw ya na rai ma ai,” ngu nna htan mu ai. Ndai gaw ningbaw ni hpaji jaw ai ga rai nga ai.
22Yawshu gaw Gibeon masha ni hpe shi hpang de woi shawn na matu hkang dat wu ai; shi gaw shanhte hpe, “Nanhte gaw ndai yang e sha nga nga myit htawm, grai tsan ai kaw na ni rai ga ai, ngu hpa majaw anhte hpe masu hkalem kau myit ni? 23Dai zawn nanhte galaw kau myit dai majaw Karai Kasang gaw nanhte hpe daw dan ya manit dai. Nanhte a masha ni gaw prat dingsa mayam tai nhtawm nye Karai Kasang a chyoi pra ai shara a matu hpun hta amu hte hka ja ai amu galaw lu na rai myit dai,” ngu nna tsun wu ai.
24Shanhte gaw, “Madu e, nanhte shang wa myit yang, nanhte hpe ndai mungdan ting jaw kau nna, dai mung hta nga ai masha amyu ni hpe sat shamyit kau na nga, dai Madu na a Karai Kasang shi a shangun kasa Mawshe hpe hkang da nu ai gaw teng sha wa teng nga ai hpe anhte chye ga ai majaw dai hku anhte galaw kau saga ai. Dai sha n-ga, anhte a asak a matu hkrit tsang ai hte nanhte hpe hkrit gari nga ga ai majaw dai hku galaw kau saga ai. 25Ya rai tim, anhte gaw na a lata hta rai nga ga ai; nang myit ai lam jaw ai hku anhte hpe galaw mi,” ngu nna htan ma ai. 26Dai rai nna Yawshu ndai hku galaw wu ai: shi shanhte hpe makawp maga la mu ai hte shanhte hpe sat kau na ahkang Israela ni hpe n jaw wu ai. 27Rai ti mung dai aten hta nan shi shanhte hpe mayam shatai nhtawm Israela amyu masha ni hte dai Madu a tawn hkungri amu ni a matu hpun hta, hka ja na hpajang da wu ai. Dai rai nna dai ni du hkra nawku na matu dai Madu lata san da nu ai shara hta dai amu matut galaw nga ma ai.
Currently Selected:
YAWSHU 9: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
