YAWSHU 24
24
Yawshu Gaw Shehkem Mare E Amyu Masha Ni Hpe Ga Shaga Ai
1Yawshu gaw Israela amyu bawsang ni yawng hpe Shehkem mare e jahpawng da wu ai. Myit su salang ni, ningbaw ni, tara agyi ni hte Israela du magam ni hpe shaga dat wu ai rai nna Karai Kasang a man de shanhte pru sa ma ai. 2Yawshu gaw amyu masha ni yawng hpe, “Dai Madu Israela a Karai Kasang tsun ai ga ning nga nga ai: ‘Moi prat e, nanhte a kaji kawa ni gaw Uhprat hka nu a wora hkran de nga nna kaga hpara shaje ni hpe nawku ma ai. Dai kaji kawa ni hta Abraham hte Nahora yan a kawa rai nga ai Htera langai lawm nga ai. #Nin 11:27. 3Dai hpang, nanhte a kaji kawa Abraham hpe Uhprat hka nu wora hkran na ngai woi la nhtawm Hkanan mung ting de woi hkawm let amyu matu law law shi hpe jaw ni ai. Ngai gaw shi hpe Isak jaw nna, #Nin 12:1-9; Nin 21:1-3. 4Isak hpe mung Yaku hte Esaw jaw nngai. Esaw hpe Edom bum ga madu la na ngai jaw ni ai. Rai ti mung nanhte a kaji kawa Yaku hte shi a kashu kasha ni chyawm gaw Egutu mung de yu wa ma ai. #Nin 25:24-26; Nin 36:8; Trj 2:5; Nin 46:1-7. 5Dai hpang Mawshe yan Arun hpe ngai shangun dat nhtawm Egutu mung hta ru yak tsin-yam tsindam kaba ngai shabyin dat nna nanhte hpe ngai woi shapraw la ni ai. #Pru 3:1-12:42. 6Nanhte a kaji kawa ni hpe Egutu mung na ngai shaw woi wa yang, Egutu masha ni shanhte hpe hpyen leng hte gumra jawn ai hpyen ni hte hkan shachyut ma ai. Rai ti mung, nanhte a kaji kawa ni Nawng Hkyeng de du ai shaloi, #Pru 14:1-31. 7karum la na matu ngai hpe hpyi jahtau ma ai rai nna, shanhte hte Egutu masha ni a lapran e nsin madin din da ni ai. Egutu masha ni hpe panglai hka gumdin taleng bun shangun nhtawm galup kau we ai.
“ ‘Nanhte gaw dai nam mali hkan e mung tsawmra mi na hkra nga kau manit dai. 8Dai hpang Yawdan hka a sinpraw hkran e nga ai Amori masha ni nga ai mung de ngai nanhte hpe woi shawn la ni ai. Shanhte gaw nanhte hpe hkap gasat ma ti mung, shanhte hpe gasat dang lu ai awng padang ngai nanhte hpe jaw ni ai. Shanhte a lamu ga hpe nanhte madu la na nga, nanhte rawt lung wa myit yang, ngai shanhte hpe shamyit kau mase ai. #Bhk 21:21-35. 9Shaloi Moba Hkawhkam Zipora a kasha Balak rawt nna nanhte hpe hkap gasat wu ai. Beora a kasha Balam hpe shaga shangun dat nna nanhte hpe matsa shangun wu ti mung, #Bhk 22:1-24:25. 10ngai chyawm gaw Balam a ga n madat ya we ai; dai rai nna shi nanhte hpe shaman ya nga ai. Dai hku nna ngai nanhte hpe Balak a lata kaw na hkye mawai la made ai. 11Nanhte gaw Yawdan hka rap nna Yerihko de du wa myit dai. Amori, Perizi, Hkanani, Hiti, Girgashi, Hiwi hte Yebusi masha ni galaw ai zawn Yerihko masha ni nanhte hpe hkap gasat ma ai. Rai ti mung shanhte yawng hpe gasat dang lu ai awng padang ngai nanhte hpe jaw mawe ai. #Ysh 3:14-17; Ysh 6:1-21. 12Nanhte rawt lung wa myit yang, dai Amori hkawhkam yan hpe shaden shapraw kau na matu shanhte hpang de hkrit kajawng ai baw ngai dat dat nngai. Nanhte a nhtu ndan ni lang ra myit dai n rai. #Pru 23:28; Trj 7:20. 13Nanhte hkai nmai galoi mung garai n jahkrat yu ai lamu ga, nanhte n de da ai mare ni, ngai nanhte hpe jaw ni ai. Ya chyawm gaw dai shara hta nanhte nga nga lu nna nanhte n hkai ai sabyi sun hta na sabyi si, tsanlun hpun hta na tsanlun si ni sha lu na rai myit dai,” ngu nna tsun wu ai. #Trj 6:10-11.
14Yawshu gaw, “Ya dai Madu hpe shagrau sha-a nhtawm sadi sahka hte ding man ai hku shi hpe daw jau nga mu. Mesopotamia hte Egutu mung hta nanhte a kaji kawa ni nawku ai hpara sumla ni hpe kau da nhtawm dai Madu hpe chyu sha daw jau nga mu. 15Nanhte shi hpe daw jau na n ra sharawng myit yang chyawm gaw Mesopotamia mung e nanhte a nji nwa ni nawku ai hpara ni, shing n rai ya nanhte nga nga ai mung na Amori hpara ni hta gara hpe mahtang jaw jau na gaw, dai ni jang daw dan la mu. Ngai hte nye a nta masha ni chyawm gaw dai Madu hpe nawku daw jau na ga ai law,” ngu nna tsun wu ai.
16Amyu masha ni gaw, “Anhte gaw dai Madu hpe kau da nna kaga hpara ni hpe galoi mung n daw jau na ga ai! 17Dai Madu anhte a Karai Kasang gaw anhte hte anhte a kawa ni hpe Egutu mung e mayam tai nga ai kaw na woi shapraw wa mani ai rai nna, shi galaw dan sai mauhpa lamik kumla ni hpe anhte mu saga ai. Dai rai nna amyu baw ni yawng a man e anhte lai hkawm ai shara shagu hkan shi anhte hpe shim lum ai hte makawp maga da mi ai. 18Anhte dai mung de rawt lung wa yang, dai mung e nga ai Amori masha ni yawng hpe dai Madu shaden shapraw kau wu ai rai nna anhte gaw dai Madu hpe chyu sha daw jau na ga ai; shi chyu sha anhte a Karai Kasang rai nga ai law,” ngu nna htan ma ai.
19Yawshu gaw amyu masha ni hpe, “Rai ti mung, nanhte dai Madu hpe daw jau lu na myit dai n rai. Shi gaw chyoi pra ai Karai Kasang rai nga ai rai nna nanhte a shut hpyit ai yubak mara ni hpe raw dat ya na n rai; shi hte shingjawng kashun ai ni hpe yu sharang lu wu ai n rai; 20nanhte shi hpe kau da nna maigan hpara ni hpe daw jau dam myit dai rai yang, shi nanhte hpe nhtang tai nhtawm, ari jaw na rai wu ai. Shawng de nanhte hpe mai kaja ai hku galaw wu ti mung, shi nanhte hpe shamyit kau na rai wu ai,” ngu nna tsun wu ai.
21Amyu masha ni gaw Yawshu hpe, “N rai law, anhte dai Madu hpe chyu sha daw jau na ga ai law,” ngu nna tsun ma ai.
22Yawshu gaw shanhte hpe, “Dai Madu hpe daw jau na matu nanhte nan lata la manit dai gaw, nanhte nan sakse ni rai nga manit dai,” ngu nna tsun wu ai.
Shanhte mung, “Rai sa, anhte hkum nan sakse ni rai nga saga ai,” ngu nna bai tsun ma ai.
23Shi gaw, “Dai rai yang gaw nanhte hta nga ai maigan hpara ni hpe tsan kau nhtawm, dai Madu Israela a Karai Kasang hta sadi dung nga na ga sadi jaw mu,” ngu nna tsun wu ai.
24Amyu masha ni gaw Yawshu hpe, “Dai Madu anhte a Karai Kasang hpe anhte nawku daw jau na ga ai. Shi a hkang da ai ga hpe anhte madat mara hkan sa na ga ai,” ngu nna tsun ma ai.
25Dai rai nna, Yawshu gaw dai shani e amyu masha ni hte Shehkem mare e ga shaka tawn nna, shi shanhte hpe dai hkan sa na matsun maroi ga hte tara ni jaw ya wu ai. 26Yawshu mung ga dai ni hpe Karai Kasang a Tara Laika hta ka da wu ai. Dai hpang nlung kaba langai mi hpe shi la nhtawm dai Madu a chyoi pra ai shara hta tu ai wamyi hpun npu hta sharawt jung da nga ai. 27Shi gaw amyu masha ni yawng hpe, “Ndai nlung gaw anhte a sakse tai nga na rai nga ai. Dai Madu anhte hpe tsun ai ga yawng mayawng na la saga ai; dai rai nna, nanhte a Karai Kasang hpe n gumlau kau myit ga, dai gaw nanhte a matu sakse tai na ra ai,” ngu nna tsun wu ai. 28Dai ngut jang, Yawshu gaw amyu masha ni hpe wa shangun mu ai rai nna masha shagu tinang a sali ga de nhtang mat wa ma ai.
Yawshu Hte Eleaza Si Mat Ai
29Dai hpang, dai Madu a shangun kasa Nun a kasha Yawshu gaw asak latsa e shi ning hta si mat wa sai. 30Shi hpe Ehprim bum ga, Gasha Bum a dingdung maga na shi a sali ga ngu na Timnat Sera mare e lup makoi da ma ai. #Ysh 19:49-50.
31Yawshu ahkrung nga dingsa Israela amyu masha ni mung dai Madu hpe nawku daw jau ma ai; shi n nga mat wa ai hpang e mung, dai Madu gaw Israela a matu galaw dan nu ai lam magup hpe ningbaw ni ahkrung nga dingsa shanhte hkum nan matut galaw nga ma ai.
32Israela amyu masha ni Egutu mung na la wa ai Yosep a moi mang hpe Shehkem a kawa Hamura a shadang sha ni kaw na Yaku gumhpraw latsa hte hkap mari la wu ai dai Shehkem mare na ga dachyawk hta wa lup da ma ai. Dai shara gaw Yosep a matu mara ni madu da ai sali ga rai nga ai. #Nin 33:19; 50:24-25; Pru 13:19; Yhn 4:5; Kas 7:16.
33Arun a kasha Eleaza si mat sai rai nna, shi a kasha Hpineha hpe jaw ai Ehprim bum ga na Gibea mare e lup makoi da ma ai.
Currently Selected:
YAWSHU 24: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.